Monday, January 24, 2011

குறளின் குரல் - 19

பால்: பொருட்பால் இயல்: அமைச்சியல்
அதிகாரம்: 65. சொல்வன்மை
குறள் எண்: 643

கேட்டார்ப் பிணிக்கும் தகையவாய்க் கேளாரும்
வேட்ப மொழிவதாஞ் சொல்.


கேட்டார்ப் பிணிக்கும் தகை அவாய் கேளாரும்
வேட்ப மொழிவது ஆம் சொல்.

விளக்கம்:

தன் சொல்லை விரும்பிக் கேட்டவரைத் தன்வயப்படுத்தி வைக்கும் வகையிலும், தன் பேச்சைக் கேளாது இருந்தவரும் இவர் பேச்சைக் கேட்க வேண்டும் என்று விரும்பும்படியும் பேசப்படுவதே சிறந்த சொல்வன்மையாகும்.
----------------------

பால்: அறத்துப்பால்
இயல்: பாயிரவியல்
அதிகாரம்: 04. அறன் வலியுறுத்தல்
குறள் எண்: 38

வீழ்நாள் படாஅமை நன்றாற்றி னஃதொருவன்
வாழ்நாள் வழியடைக்குங் கல்.


வீழ் நாள் படாஅமை நன்று ஆற்றின், அஃது ஒருவன்
வாழ் நாள் வழி அடைக்கும் கல்.

விளக்கம்:

ஒருவன் நாள் தவறாமல் நல்லது செய்து வருவானாயின், அஃது அவனது வாழ்நாள் எனப்படும் வழியில் இடைவெளிகள் இல்லாது அடைக்கும் கல்லாகும். அது வாழும் நாட்களின் தொடர்ச்சியை / வாழ்க்கையைக் காக்கும் என்பது குறிப்பு. நல்லதைச் செய்யும் நாளெல்லாம் வாழும் நாளாகும்.

-------------------------

பால்: பொருட்பால்
இயல்: நட்பியல்
அதிகாரம்: 94. சூது
குறள் எண்: 940

இழத்தொறூஉங் காதலிக்குஞ் சூதேபோற் றுன்ப
முழத்தொறூஉங் காதற் றுயிர்.


இழத்தொறூஉம் காதலிக்கும் சூதே போல், துன்பம்
உழத்தொறூஉம் காதற்று உயிர்.

விளக்கம்:

ஆடும் போது பொருளை இழக்க நேர்ந்தாலும் சூது, இழந்ததை வென்றிட மீண்டும் மீண்டும் ஆடவேண்டுமென்று ஆசைப்படவைக்கும். அதே போல், இந்த உடம்பு மேன்மேலும் துன்பத்தால் உழன்று வருந்தினாலும், உயிரானது உடலையே மீண்டும் மீண்டும் காதலிக்கும்.

உயிர் / உடல் மேல் இருக்கும் ஆசையும், சூதின் மேல் இருக்கும் பற்றும் அவ்வளவு எளிதில் குறையாது.

--------------------------

பால்: பொருட்பால்
இயல்: அமைச்சியல்
அதிகாரம்: 70. மன்னரைச் சேர்ந்தொழுகல்
குறள் எண்: 700

பழைய மெனக்கருதிப் பண்பல்ல செய்யுங்
கெழுதகைமை கேடு தரும்.



பழையம் எனக் கருதிப் பண்பு அல்ல செய்யும்
கெழுதகைமை கேடு தரும்.

விளக்கம்:

அரசரிடம் தாம் நீண்ட நாட்கள் பழக்கமுடையவர் என்று எண்ணிக் கொண்டு, அந்த நட்பின் உரிமையால் தமக்குப் பொருந்தாத பண்பற்ற செயல்களைச் செய்வது துன்பம் மற்றும் அழிவைத் தரும்.

---------------

பால்: அறத்துப்பால்
இயல்: இல்லறவியல்
அதிகாரம்:17. அழுக்காறாமை
குறள் எண்: 163

அறனாக்கம் வேண்டாதா னென்பான் பிறனாக்கம்
பேணா தழுக்கறுப் பான்.


அறன் ஆக்கம், வேண்டாதான் என்பான் பிறன் ஆக்கம்
பேணாது அழுக்கறுப்பான்.

விளக்கம்:

பிறருக்கு வருகின்ற ஆக்கத்தைக் கண்டு அது அவருக்கு உரியதுதான் என்று கருதாமல் பொறாமைப்படுபவன், தனக்கு அறமாகிய ஆக்கம் வேண்டாம் என்பவனாவான்.

ஆக்கம்: செல்வம், பதவி, முன்னேற்றம் முதலிய ஆகி வரும் தகுதிகளையெல்லாம் குறிக்கும்.

-----------------

பால்: அறத்துப்பால்
இயல்: பாயிரவியல்
அதிகாரம்:01. கடவுள் வாழ்த்து
குறள் எண்: 05

இருள்சே ரிருவினையுஞ் சேரா விறைவன்
பொருள்சேர் புகழ்புரிந்தார் மாட்டு.


இருள்சேர் இருவினையும் சேரா இறைவன்
பொருள்சேர் புகழ் புரிந்தார்மாட்டு.

விளக்கம்:

நற்குணங்கள் அனைத்தும் கொண்ட இறைவன் அவனின் புகழே மெய்யான புகழாகும். அப்புகழுக்குரிய வகையில் நற்செயல்களைச் செய்பவர்க்கு, அப்புகழை எப்போதும் விரும்பிச் சொல்வார்க்கு அறியாமையோடு கூடிய நல்வினை தீவினை இரண்டும் சென்று சேரா.

Tuesday, January 4, 2011

வல்லவன் வில் - விமர்சிப்பது நல்லகண்ணன்

'உஸ் அப்பாடா...' என்று வீட்டிற்குள் நுழைந்த நல்லகண்ணன் காலை ஓடி வந்து கட்டிக் கொண்டாள் கீர்த்தி. கீர்த்தி, நல்லகண்ணன் - உமா தம்பதியரின் செல்ல மகள்.

நல்லகண்ணன்  ஒரு வார இதழின் சினிமா விமர்சகன். நடுநிலையான நல்ல விமர்சகர் என்று பரவலாகப் பலரும் பாராட்டும் புகழ் அவனுக்குண்டு. இது மேற்படி வருமானத்துக்கான பகுதி நேர வேலைதான். மற்றபடி தனியார் நிறுவனமொன்றில் சொற்பமான சம்பளத்துக்கு வேலை செய்து, தேதி இருபதைத் தாண்டுகையில் அடுத்த மாதம் எப்போது பிறக்கும் என்று நாட்காட்டியைப் பார்த்துக் குடும்பம் நடுத்துகின்ற கீழடுக்கு நடுத்தர வர்க்கம்.


'இந்தாங்க..' தண்ணீர் லோட்டாவைத் தந்தாள் உமா.


'என்னங்க...'வல்லவன் வில்' படத்துக்கு உங்கள் விமர்சனம் படிச்சாங்களாம் மல்லிகாக்கா...அவங்க மனசுல இருக்கிறதை அப்படியே சொல்லிருக்கீங்களாமே....புத்தகம் கொடுத்துட்டுப் போனாங்க....படிக்கணும். நல்லாருக்கா படம்? என்ன எழுதிருக்கீங்க'....என்றவள் குழந்தையைப் பார்த்துக் கொள்ள அவன் வந்துவிட்ட திருப்தியில் பக்கங்களைப் புரட்டிப் படிக்க ஆரம்பித்தாள். படத்தின் நாயகன் அவள் மனம் கவர்ந்தவர் ஆயிற்றே.



'என்னங்க...எல்லாரும் படம் நல்லாருக்குன்றாங்க. நீங்க இப்படி பாடாவதின்ற மாதிரி எழுதிருக்கீங்க....அதானே..மல்லிகாக்கா எப்படி இப்படிப் பாராட்டுனாங்கன்னு நான் அப்பவே நெனச்சேன். அவங்களும் உங்கள மாதிரிதான். எதையும் நல்லாருக்குன்னு அவ்வளவு சுலபமாச் சொல்லிர மனசு வராது.'



'காபி கொண்டு வா உமா'...'கீர்த்திக்குட்டி..அது மேல ஏறாத..விழுந்துறப் போற..'



'இந்த வாரம் இந்தப் படத்துக்குப் போலாம்னு நெனச்சேன்....நீங்க இப்படி எழுதிருக்கதைப் பாத்தாத் திரும்பியும் ஒரு வாட்டி பாப்பீங்களான்னு சந்தேகமாருக்குங்க...'


'...........'


'என்ன..பதிலே காணோம்...அவ்ள மோசமாவாருக்கு படம்?'


'யப்பா...உங்காளு நடிச்ச படம்னவுடன எவ்வளவு ஆர்வம் உமா உனக்கு?'


' ஆமாமா..கதநாயகியத்தான் மாஞ்சு மாஞ்சு வர்ணிச்சுருக்கீங்களே...'


அவளின் உதட்டுச் சுழிப்பை ரசித்தவன் சட்டப்பையிலிருந்து இரண்டு நுழைவுச்சீட்டுகளை எடுத்தான்.


'இந்தா... இந்த வாரம் வெள்ளிக்கிழமை அந்தப் படத்துக்குப் போறோம்...'


புருவத்தை நெறித்து அவனைப் பார்த்த உமா, தொடர்ந்து வந்த அவன் பேச்சைக் கேட்டு இன்னும் ஆச்சரியமானாள்.


'இயல்பா ஓடுற எதார்த்தமான படம். சந்தேகப் புத்தினால வர்ற கேடு, இப்ப சில டிவி சானல்கள் நடத்துற சில கேடுகெட்ட நிகழ்ச்சிகள், சில பணக்காரப் புத்திகள், கொஞ்சம் சோகம், கொஞ்சம் மிகை, கொஞ்சம் நகைச்சுவை, கொஞ்சம் அத்துமீறல்கள், கொஞ்சம் குழப்பம், தவிர்த்திருக்க வேண்டிய விஷயங்கள்.....இப்டில்லாம் நிகழ்ச்சிகள் தொட்டுக்காட்டி எழுதணும்னு ஆசைதான்.



ஆனா அதுக்கெல்லாம் எனக்குச் சுதந்திரம் இல்ல உமா.....எவ்வளவு மோசமா எழுதணுமோ அவ்வளவு மோசமா எழுதணும்...நேரடியா இல்லாம மறைமுகமா...படத்தை விட. படத்தின் இயக்குநரைவிட, மத்த விஷயங்களவிடப் படத்தின் நாயகனத் தாக்கணும்னு எனக்கு உத்தரவு....


ஆங்கிலப்படத்தின் அப்பட்ட காப்பி, தன் கேவலமான கருத்துகளை நாசூக்காய் வெளியிட்டு வேஷம் போடும் நாயகன்......அவர் சொந்த வாழ்க்கை பிரதிபலிப்பு, ஆத்திகம் / நாத்திகம் என்றெல்லாம் விமர்சனம் எழுதவேண்டிய தலையெழுத்து...


இப்ப 'தந்திரன்' படத்துக்கு என்ன எழுதுனேன்....ஆஹா..ஓஹோ...
ஆங்கிலப்படத்திற்கு நிகரான தமிழ்ப்படம்....நினைக்கவே முடியாத பட்ஜெட்டில் எடுத்த படம்.....மறந்தும் கூட நடிகரின் சொந்த வாழ்க்கைய விமர்சனத்தில் இழுக்கக்கூடாது...அதுவும் உத்தரவுதான்...என் எண்ணங்கள் சிலவற்றை மறைச்சு, நடுநிலை மறந்துதான் எழுதவேண்டிருக்கு.


என் சொந்த நினைப்பை நண்பர்கள்கிட்டக் கூடப் பகிர்ந்துக்க முடியாது....வெளிய தெரியாமருக்கணுமே...அலுத்துப்போச்சு உமா..

ஆங்கிலப்படச் சாயல் இருப்பதை ஒருபடத்தில் தூக்கி எழுதிவிட்டு, அடுத்த படத்தில் தாக்குவது...எனக்கே கொஞ்சம் அசிங்கமாத்தான் இருக்கு....என்ன பண்றது சொல்லு?


இதுல சம்பந்தப்பட்ட நாயகனின் ரசிகர்களிடமிருந்து மிரட்டல் கடிதங்கள் வேற போட்டுத் தாக்குது....


நடுநிலைமையோட விமர்சனம் எழுதுறது சொந்த விருப்பு வெறுப்பு இருக்குற ஒரு சாதாரண மனுஷனுக்கு ரொம்பச் சுலபமான காரியமில்ல. இருந்தும்  இப்டில்லாம் பண்ண வேண்டிருக்கு.


நல்லவேள...சமுதாய விமர்சனம் பண்ற வேல எனக்கில்ல...அதுலயும் இப்படி எழுத வேண்டிய கட்டாயம் இருந்துச்சுன்னா....கஷ்டம்தான்..




வேற நல்ல வேலை பாத்துட்டு இருக்கேன். கெடச்சதும் சீக்கிரம் இந்த வேலைய விட்டுறலாம்னு இருக்கேன்.... '



குறிப்பு: இது யாரையும் எதற்காகவும் தாக்க எழுதப்பட்டதல்ல...பார்வைகள் நபருக்கு நபர் எப்படி வேறுபடுகின்றன, விமர்சனங்கள் எப்படி,  எதனால் மாறுபடுகின்றன, விமர்சனம் செய்வது சுலபமான காரியமா, விமர்சகர்கள் மனநிலை எப்படியிருக்கும்என்று எண்ணிய விபரீத எண்ணத்தின் விளைவான கற்பனையே....

குறளின் குரல் - 18

பால்: பொருட்பால்
இயல்: அமைச்சியல்
அதிகாரம்: 72. அவையறிதல்
குறள் எண்: 714

ஒளியார்மு னொள்ளிய ராதல் வெளியார்முன்
வான்சுதை வண்ணங் கொளல்.


ஒளியார்முன் ஒள்ளியர் ஆதல், வெளியார்முன்
வான் சுதை வண்ணம் கொளல்.

விளக்கம்:

அறிவில் ஒளிர்பவர் முன் பேசும்போது, தாமும் அறிவில் ஒளிர்பவராகத் தம்மை வெளிப்படுத்திக் கொள்ள வேண்டும். அறிவொளி குன்றியவர் முன
பேசும் போது வெள்ளைச் சுண்ணாம்பின் நிறம் போல வெள்ளையாக, அறிவை வெளிப்படுத்திக் கொள்ளாதவராக இருக்க வேண்டும்.

----------------------
பால்: பொருட்பால்
இயல்: நட்பியல்
அதிகாரம்: 80. நட்பாராய்தல்
குறள் எண்: 795

அழச்சொல்லி யல்ல திடித்து வழக்கறிய
வல்லார்நட் பாய்ந்து கொளல்.


அழச் சொல்லி, அல்லது இடித்து, வழக்கு அறிய
வல்லார் நட்பு ஆய்ந்து கொளல்.

விளக்கம்:

தவறு செய்யும்போது அதற்காக வருந்துமாறு புத்தி சொல்லித்திருத்தியும், முறையற்ற நெறியில் செல்லும் போது இடித்துக் கூறித் திருத்தியும், தனது நடப்பை அறிய வல்லவராய்த் தன்னை வழிநடத்திச் செல்லுகின்றவரின் நட்பை ஆராய்ந்து அத்தகையவரிடம் நட்புக் கொள்ள வேண்டும்.
---------------------

பால்: அறத்துப்பால்
இயல்: இல்லறவியல்
அதிகாரம்: 16. பொறையுடைமை
குறள் எண்: 155

ஒறுத்தாரை யொன்றாக வையாரே வைப்பர்
பொறுத்தாரைப் பொன்போற் பொதிந்து.


ஒறுத்தாரை ஒன்றாக வையாரே; வைப்பர்,
பொறுத்தாரைப் பொன்பொல் பொதிந்து.

விளக்கம்:

தவறு செய்துவிட்ட காரணத்தால் ஒருவரைத் தண்டித்தவரை,  யாரும் ஒரு பொருட்டாக மதிக்க மாட்டார்கள். ஆனால், பெருந்தன்மையோடு அத்தவறைப் பொறுத்துக் கொண்டவரைத் தம் உள்ளத்தில் பொதிந்து வைத்துப் பொன் போல் மதிப்பார்கள்.

------------------

பால்: பொருட்பால்
இயல்: கூழியல்/பொருளியல்
அதிகாரம்: 76. பொருள்செயல்வகை
குறள் எண்: 753

பொருளென்னும் பொய்யா விளக்க மிருளறுக்கு
மெண்ணிய தேயத்துச் சென்று.


பொருள் என்னும் பொய்யா விளக்கம், இருள் அறுக்கும்
எண்ணிய தேயத்துச் சென்று.

விளக்கம்:

பொருட்செல்வம் என்னும் உண்மையான விளக்கு. அதை உடையவர்கள் நினைத்த இடங்களுக்கெல்லாம் சென்று அவருடைய பகையாகிய இருளைப் போக்க வல்லது.

-------------

பால்: பொருட்பால்
இயல்: நட்பியல்
அதிகாரம்: 82. தீநட்பு
குறள் எண்: 818

ஒல்லுங் கரும முயற்று பவர்கேண்மை
சொல்லாடார் சோர விடல்.


ஒல்லும் கருமம் உடற்றுபவர் கேண்மை
சொல்லாடார், சோரவிடல்.

விளக்கம் - 1:

ஒருவர் தன்னால் செய்ய முடியும் செயலையும் தன்னைச் செய்ய விடாமல் குழப்புபவரின் / கெடுப்பவரின் நட்பை, அவரிடம் சொல்லாமல் கொள்ளாமல் மெதுவாக விட்டுவிட வேண்டும்.

விளக்கம் -2:

தன்னால் செய்ய முடியும் செயலைச் செய்து உதவாமல், அதனைச் செய்ய இயலாதவர் போல் இருந்து குழப்புகிறவரின் / கெடுப்பவரின் நட்பை, அவரிடம் சொல்லாமல் கொள்ளாமல் மெதுவாக விட்டுவிட வேண்டும்.

இக்குறளுக்கு இருவேறு விளக்கங்கள் காணப்பெற்றேன். இரண்டுமே பொருத்தமாகத் தோன்றுகிறது.

------------------

பால்: காமத்துப்பால்
இயல்: கற்பியல்
அதிகாரம்: 131. புலவி
குறள் எண்: 1309

நீரு நிழல தினிதே புலவியும்
வீழுநர் கண்ணே யினிது.


நீரும் நிழலது இனிதே, புலவியும்
விழுநீர் கண்ணே இனிது.

விளக்கம்:

நிழலின் இடத்து இருக்கும் போதுதான் நீர் மிகவும் குளிர்ச்சியாக இனிதாக இருக்கும். அன்புடையவர்களிடத்து நிகழும்போதுதான் ஊடல் இனிமையாக இருக்கும்.

Monday, December 27, 2010

குறளின் குரல் - 17

பால்: பொருட்பால் இயல்: அரசியல்
அதிகாரம்: 63. இடுக்கண் அழியாமை
குறள் எண்: 628

இன்பம் விழையா னிடும்பை யியல்பென்பான்
றுன்ப முறுத லிலன்.


இன்பம் விழையான்; 'இடும்பை இயல்பு' என்பான்
துன்பம் உறுதல் இலன்.

விளக்கம்:

இன்பத்தை விரும்பமாட்டான். வாழ்க்கையில் துன்பம் வருவது இயல்பு எனப் புரிந்து கொள்வான். இத்தகையவனைத் துன்பங்கள் ஒருபோதும்
துன்பப்படுத்துவது இல்லை.

------------

பால்: அறத்துப்பால்
இயல்: துறவறவியல்
அதிகாரம்: 29. கள்ளாமை
குறள் எண்: 289

அளவல்ல செய்தாங்கே வீவர் களவல்ல
மற்றைய தேற்றா தவர்.


அளவு அல்ல செய்து, ஆங்கே வீவர், களவு அல்ல
மற்றைய தேற்றாதவர்.

விளக்கம்:

களவாடுவதைத் தவிரப் பிற நல்ல வழிகளைத் தெரிந்து கொள்ளாதவர், அளவில்லாத தீய செயல்களை, வரம்பு மீறிய செயல்களைச் செய்து
கெட்டழிவர்.

-------------

பால்: அறத்துப்பால்
இயல்: துறவறவியல்
அதிகாரம்: 25. அருளுடைமை
குறள் எண்: 249

தெருளாதான் மெய்ப்பொருள் கண்டற்றாற் றேரி
னருளாதான் செய்யு மறம்.


தெருளாதான் மெய்ப்பொருள் கண்டற்றால்-தேரின்,
அருளாதான் செய்யும் அறம்.

விளக்கம்:

அருள் இல்லாதவன் அறச்செயலைச் செய்தல் கூடும். ஆனால் அச்செயலை ஆராய்ந்து பார்த்தால், அது தெளிந்த ஞானமில்லாதவன் உண்மைப் பொருளைக் கண்டறிந்ததற்கு ஒப்பாகும்.

-------------

பால்: பொருட்பால்
இயல்: அரசியல்
அதிகாரம்: 59. ஒற்றாடல்
குறள் எண்: 581

ஒற்று முரைசான்ற நூலு மிவையிரண்டுந்
தெற்றென்க மன்னவன் கண்.


ஒற்றும் உரை சான்ற நூலும், இவை இரண்டும்
தெற்றென்க மன்னவன் கண்.

விளக்கம்:

ஒற்று, புகழமைந்த அறநூல் - இவ்விரண்டையும் அரசன் தன் இரு கண்களெனக் கொள்ள வேண்டும். (புறக்கண்களால் காண முடியாதவற்றை
இவையிரண்டும் புலப்படுத்தும் என்பதால் இவற்றைக் கண் எனக் கொள்ள வேண்டும்.)

----------

பால்: பொருட்பால்
இயல்: அரசியல்
அதிகாரம்: 44. குற்றங்கடிதல்
குறள் எண்: 432

இவறலு மாண்பிறந்த மானமு மாணா
வுவகையு மேத மிறைக்கு.


இவறலும், மாண்பு இறந்த மானமும், மாணா
உவகையும் ஏதம் இறைக்கு.

விளக்கம்:

செலவு செய்ய வேண்டிய இடத்திலும் செலவு செய்யாத கருமித்தனம், பெருமைதராத மான உணர்வு, தகுதியற்ற மகிழ்ச்சி - இவை எந்தவொரு
தலைவனுக்கும் கேடு தரும் குற்றங்களாகும்.
------------------

பால்: அறத்துப்பால்
இயல்: துறவறவியல்
அதிகாரம்: 30. வாய்மை
குறள் எண்: 295

மனத்தோடு வாய்மை மொழியிற் றவத்தொடு
தானஞ்செய் வாரிற் றலை.


மனத்தொடு வாய்மை மொழியின் தவத்தொடு
தானம் செய்வாரின் தலை.

விளக்கம்:

ஒருவன் தன் உள்ளத்தோடு பொருந்துமாறு வாய்மையுள்ள சொற்களையே பேசுவானேயானால், அவன் தவமும் தானமும் செய்பவர்களை விட மேலான சிறப்புடையவனாவான்.

Monday, December 20, 2010

காதல் கொள்!

நிகழ்வுகள்
கிடுக்கிப்பிடியில்
கழுத்தை நெரிக்கும்.

காதல் கொள்.
அது
கழுத்து நீவிக்
கவலைகள் சுத்திகரிக்கும்.

உணர்வுகள்
உடலெங்கும்
ஊசிகள் குத்தும்.

காதல் கொள்.
அது
ஊசிகள் பிடுங்கி
உபாதைகள் நீக்கும்.

குழப்பங்கள்
கடலில் அலையெனச்
சுழன்று தொடரும்.

காதல் கொள்.
அது
எதிர்நீச்சல்
கற்றுக் கொடுக்கும்.

வாழ்வில்
வெற்றி கொள்ள..
வாழ்வை
வெற்றி கொள்ள...

காதல் கொள்.

குறளின் குரல் - 16

பால்: பொருட்பால் இயல்: அமைச்சியல்
அதிகாரம்: 66. வினைத்தூய்மை
குறள் எண்: 660

சலத்தாற் பொருள்செய்தே மார்த்தல் பசுமட்
கலத்துணீர் பெய்திரீஇ யற்று.


சலத்தால் பொருள் செய்து ஏமார்த்தல் - பசு மண்
கலத்துள் நீர் பெய்து, இரீஇயற்று.

விளக்கம்:

தீய, வஞ்சகச் செயல்களால் ஒருவன் செல்வம் தேடிச் சேர்த்து, அதனை நீண்ட காலத்துக்குக் கட்டிக் காக்கலாம் என் எண்ணுதல், ஈரம் உலராத பச்சை மண் பானையில் தண்ணீரை ஊற்றிக் காத்து வைப்பது போன்றதாகும். பானையும் கரைந்து, நீரும் கசிந்து போவது போல, வஞ்சனையால் செல்வம் பெற்றவனும் அழிந்து, செல்வமும் அழிந்து போகும்.

------------

பால்: அறத்துப்பால்
இயல்: இல்லறவியல்
அதிகாரம்: 12. நடுவு நிலைமை
குறள் எண்: 120

வாணிகஞ் செய்வார்க்கு வாணிகம் பேணிப்
பிறவுந் தம்போற் செயின்.


வாணிகம் செய்வார்க்கு வாணிகம் பேணிப்
பிறவும் தம் போல் செயின்.

விளக்கம்:

வாணிகம் செய்யும் போது பிறர் பொருளையும் தம் பொருள் போலக் கருதி, அப்பொருளின் மதிப்பைக் கூட்டாமல், குறைக்காமல் அப்பொருளின் மதிப்பை நிர்ணயம் செய்ய வேண்டும். இந்த நேர்மையும் நடுவுநிலைமையும் கருத்தில் கொண்டு செய்வதே சிறந்த வாணிகமாகும்.

----------------

பால்: காமத்துப்பால்
இயல்: கற்பியல்
அதிகாரம்: 120. தனிப்படர் மிகுதி
குறள் எண்: 1196

ஒருதலையா னின்னாது காமங்காப் போல
விருதலை யானு மினிது.


ஒருதலையா னின்னாது, காமம்; காப் போல
இருதலையானும் இனிது.

விளக்கம்:

காவடியின் இருபக்கமும் சமமான சுமை இருப்பதே சுமப்பவர்க்கு இலகுவாகும், இனியதாகும். அது போல ஆண், பெண் இருவரிடத்தும் காதல் சமமாய் அமைந்திருப்பதே இனியதாகும். இருபக்கமும் காதல் சமமாக இல்லாது ஒருபக்கம் மட்டுமே காதல் இருக்குமென்றால் அது துன்பத்தில்தான் முடியும்.

--------------

பால்: பொருட்பால்
இயல்: அரசியல்
அதிகாரம்: 45. பெரியாரைத் துணைக்கோடல்
குறள் எண்: 450

பல்லார் பகைகொளலிற் பத்தடுத்து தீமைத்தே
நல்லார் தொடர்கை விடல்.


பல்லார் பகை கொளலின் பத்து அடுத்து தீமைத்தே
நல்லார் தொடர் கைவிடல்.

விளக்கம்:

துணையாக்கிக் கொள்ள வேண்டிய நல்லவர்களுடன் மனம் வேறுபட்டு, அவர் நட்பை விட்டு விடுதல், பலருடன் பகை கொள்வதைக் காட்டிலும் பத்து மடங்கு தீமையைத் தருவதாகும்.
--------

பால்: பொருட்பால்
இயல்: அரசியல்
அதிகாரம்: 50. இடன் அறிதல்
குறள் எண்: 498

சிறுபடையான் செல்லிடஞ் சேரி னுறுபடையா
னூக்க மழிந்து விடும்.


சிறு படையான் செல் இடம் சேரின், உறு படையான்
ஊக்கம் அழிந்து விடும்.

விளக்கம்:

சிறிய படையை உடையவன் தனக்குப் பாதுகாப்பு உடைய இடத்தில் நின்று போர் செய்தால், பெரிய படையுடைய அரசன் ஊக்கம் அழிந்து தோற்றுப் போவான். பெரிய படையானாலும், இடமறியாது சென்றால் தோற்க நேரிடும்.

---------------------

பால்: அறத்துப்பால்
இயல்: இல்லறவியல்
அதிகாரம்: 11. செய்ந்நன்றியறிதல்
குறள் எண்: 109

கொன்றன்ன வின்னா செயினு மவர்செய்த
வொன்றுநன் றுள்ளக் கெடும்.


கொன்றன்ன இன்னா செய்யினும் அவர் செய்த
ஒன்று நன்று உள்ள, கெடும்.

விளக்கம்:

முன்பு நமக்கு நல்ல உதவியைச் செய்த ஒருவர், பின்பு கொலை போன்ற ஒரு பாதகச் செயலைச் செய்து துன்பம் விளைவிக்க முற்பட்டாலும், அவர் முன்பு செய்த நன்மையை நினைத்தால் அத்துன்பம் தன்னால் நீங்கி விடும். கெட்டதை மறக்கப் பழகிக் கொள்ள வேண்டும்.

Thursday, November 11, 2010

நான் அறிந்த சிலம்பு - பகுதி 8

புகார்க்காண்டம் - கோவலன் கண்ணகி திருமணச் செய்தி அறிவித்தல்


குணத்தில் சிறந்த
கோவலன் கண்ணகி
இருவர்தம் பெற்றோர் பெருமக்கள்
நல்லதொரு திருநாளில்
நங்கைக்கும் நாயகனுக்கும்
நல்மணம் செய்திட விழைந்தனர்.

யானை ஒன்றை அலங்கரித்து
அதன் அம்பாரிமீது
அணிமணிகள் பூண்ட
அம்மணிகளை
அமரச் செய்து
தாம் உறுதிசெய்த
திருமணத் திருநாளை
மாநகர மக்களுக்கு அறிவித்து
அழைத்து மகிழ்ந்தனர்.

கோவலன், கண்ணகி திருமணம்

மணவீடதனில்
முரசுகள் முழங்கின;
மத்தளங்கள் ஆர்ப்பரித்தன;
முறையாக எழுந்தன
சங்கின் ஒலியலைகள்.

அரசனவன்
நகர்வலம் வருகையில்
எழுகின்ற எண்ணற்ற
வெண்கொற்றக்குடைகள் போலவே
இம்மணவுலாவிலும்
எழுந்திட்டன மிகுதியாக....

இவ்வழகு மொத்தமும்
அளவின்றிச் சிறந்தெழ
புகார்நகரம் முழுவதும்
புனைந்திட்டது விழாக்கோலம்.
அதுவோர் மணவிழாக்காலம்.

மணமலர் மாலைகளால்
அலங்கரிக்கப்பட்ட
அழகிய உச்சியதனையும்
வயிரமணித் தூண்களையும்
கொண்டிருந்த மணப்பந்தலது
நீலநிறப் பட்டினாலானது.

வான் தவழ் நிலவது
ரோகிணியைச் சேர்ந்த நன்னாளதனில்
முதிய அந்தணன்
வேதநூல் முறையின்படி
சடங்குகள் செய்திட....

அருந்ததி விண்மீன்போன்ற
கற்புடைய கண்ணகியைக்
கோவலனாம் மணமகன்
திருமணம் புரிந்திட்டுத்
தீவலம் வந்த
திருக்காட்சியைக்
கண்டவர் கண்கள்தாம்
செய்திட்ட தவம் என்னே!

மங்கல வாழ்த்து மற்றும் மங்கல அமளி ஏற்றுதல்

தளிர்மேனியுடைய
மங்கைப் பருவத்து மகளிர்
நறுமணப் பொருட்களையும்
நல்மண மலர்த்தட்டுகளையும்
கைகளில் ஏந்தி
உரைவாயிலாகவும்
பாடல் வாயிலாகவும்
பாராட்டி உடன் நின்றனர்.

ஒதுங்கிய கடைக்கண்பார்வையுடைய
மடந்தைப் பருவத்து மகளிர்
சாந்து, நறும்புகை
மலர்மாலை ஏந்திநின்றனர்.

ஈன்ற குழந்தைக்காய்ப்
பால்சுரந்து தளர்ந்த
இளமுலை கொண்ட
அரிவைப் பருவத்து மகளிர்
இடித்த சுண்ணப்பொடி,
விளக்கு, அணிகலன்கள்,
முளைத்த பாலிகைக் குடங்கள்
தாங்கி வந்தனர்.

பூத்துநிற்கும் புன்முறுவல்கொண்ட
தெரிவைப் பருவத்து மகளிரும்

விரிமலர் சூடிய கூந்தலுடன்
அழகிய பொற்கொடி வடிவுடைய
பேரிளம் பெண்டிரும்
சூழ்ந்து நின்றிருக்க,

செம்முதுபெண்டிரும்
சேர்ந்து நின்று
வாழ்த்தி மகிழ்ந்தனர்
இங்ஙனமே..

கண்ணகியிவள்தாம்
காதலனைத் தன்
கண்ணிலும் மனத்திலும்
பிரியாது வாழ்க!

கோவலன் இவன் தான்
காதலி அவளை
அணைத்து இறுக்கிய
கைகள் நெகிழாமல்
இணைந்து வாழ்க!

மணமக்கள் இவர்தாம்
தீதின்றி நெடுங்காலம்
வாழிய வாழியவே!

இவ்வாறெல்லாம்
பொன்மொழிகளுடன்
பூமலர்கள் தூவி
வாழ்த்திசைத்தனர்.

அதன்பின்
அருந்ததி போன்ற
கற்புடைய கண்ணகியை
மங்கல அமளியில்
ஏற்றி மகிழ்ந்தனர்.

'கோபம் பொருந்திய
வேலது கொண்ட
சோழன் கரிகாலன் தன்
வெற்றிக்கு அறிகுறியாய்
இமயத்துக்கு இப்பக்கம்
வென்று பொறித்த
வாளதன் வரிகள் போன்ற
வரிகளுடைய புலிச்சின்னக் கொடியானது
பொன் கோட்டுடைய
இமயத்துக்கு அப்பாலும் சென்று
போரில் வென்று
புகழ்பரப்பி நிற்பானாக!'..

'மாறுபாடற்ற நீதியுடன்
தன் ஆணைச் சக்கரத்தை
உலகின் எந்தப்பக்கமும்
மன்னவனவன் உருட்டுவானாக!'

இங்ஙனம்
மணமக்கள் தம்மோடு
மன்னனையும் வாழ்த்தி நின்றனர்
ஐவகைப் பெண்டிர்.

(ஏழு வகைப் பெண்டிருள், குழந்தைத்தனம் மிகுதியால் பேதைப் பருவத்தினரும், நாணத்தின் மிகுதியால் கன்னிப்பருவத்து பெதும்பைப் பெண்டிரும் இக்குழுவில் இடம்பெறவில்லை என்பது வழக்கு.)

சிலம்பின் வரிகள் இங்கே..40 - 50

சிலம்பின் வரிகள் இங்கே..51 - 68