பெட்டகம்

தாம்பத்யம் தகிடுதத்தம்

2011-12-14T15:57:00.002+03:00

பல சமுதாயப் ப்ரச்னைகள் நமக்குச் சவாலாக இருப்பது கால காலமாகத் தொடர்ந்து வருவதுதான். அரசியல், ஊழல், மதம், இனம், பற்றாக்குறை, கல்வி, வேலைவாய்ப்பின்மை இப்படி அடுக்கிக் கொண்டே போகலாம்.

தனி ஒரு மனிதனின் தனிப்பட்ட வாழ்க்கை முறைகள் அங்கே ஒன்று இங்கே ஒன்று என்று பிறழ்ந்து காணப்படும் நிலையும் நாம் நன்கறிவோம். ஆனால், சமீப காலமாக இது போன்ற பிறழ்வுகள் பல தம்பதிகள் வாழ்வில் கண்கூடாகப் பார்த்து வருகிறேம்.

நம் சொந்தம், நட்பு வட்டம், தெரிந்தவர்கள் வாயிலாகக் கேட்பது என்பது சமீப காலமாக தம்பதியருக்குள் கருத்து வேறுபாட்டால் பிரிந்து வாழ்கிறார்கள் என்பதாகும்.

பிள்ளை பெத்துக்க வீட்டுக்கு வந்தா...அப்புறம் புருஷன் வீட்டுக்குப் போகவே மாட்டேங்கிறா..
என்னை என் புருசன் கூட அனுப்பிச்ச உயிரோடவே பாக்க முடியாது.உங்களுக்கு நான் உயிரோட இருக்கணும்னா என்னை அங்கே போகச் சொல்லாதீங்க..
என் காலில் நிக்க என்னால் முடியும்...எனக்கு அந்த ஆள் தயவு தேவையில்லை.
என்னை அடிக்கக் கை ஓங்கிட்டு வர்ற அந்த ஆளுகூட நா குப்பை கொட்ட மாட்டேன்..உங்களுக்கு நான் இங்க இருப்பது கஷ்டமா இருந்தாச் சொல்லுங்க..நான் ஹாஸ்டலுக்குப் போறேன்..
அவளுக்கு என்ன அவ்ள திமிரு..புள்ளய வேணா வச்சுக்கட்டும்...வேணுங்கிறப்போ போய் நா பாத்துக்கிறேன்...
என்னை விட அதிகம சம்பாதிக்கிற திமிரு அவளுக்கு...அவள இங்க கூட்டிட்டு வந்தீங்கன்னா நா என் பிரண்ட் ரூமுக்கு போய்ருவேன்..

ப்ரச்னைகள் யாருக்குத்தான் இல்லை? அதை எதிர்கொள்கிற மனப்பான்மைதான் இன்றைய இளைய தலைமுறையினரிடம் குறைந்து கொண்டே வருவது போல் தோன்றுகிறது.

உண்மையான, தீவிரமான காரணங்களால் சகிப்புத்தன்மை இல்லாமல் பாதுகாப்பு கருதிப் பிரிதல் என்பது அவசியமான ஒன்றுதான்.

ஆனால் இன்று அன்றாட நிகழ்வுகளைக் கூடப் ப்ரச்னை என்று சொல்லி, என் பொம்மையை நீ உடைச்சிட்ட....உன் பொம்மையை நான் உடைக்காம விடமாட்டேன்..என்று குழந்தைத்தனமாக மனமுதிர்ச்சியில்லாமல் பிரிந்து வாழும் இவர்கள்....செய்வதறியாது திகைத்து நிற்கும் பெற்றோர் மற்றும் உறவினர்கள்....

எல்லா வகையிலும் எதார்த்தவாதிகள், So what? என்று பேசும் தன்மை, பெற்றோரின் அளவுக்கதிகமான செல்லம் அல்லது கண்டிப்பு, நீயா நானா என்கிற அகங்காரம், தனியாக வாழும் பலரை முன்மாதிரியாகக் கொள்ளுதல் என்று பல காரணங்களை அடுக்கிக் கொண்டே போகலாம்.

இதில் காதல் திருமணம் புரிந்தவர்கள்..பல நாள் பேசிப் புரிந்து கொண்டு பின் திருமணம் செய்து கொண்டவர்கள் என்ற பெயர் வேறு...மாமியார் மாமனார் இல்லாத் தனிக்குடித்தனம் செய்பவர்களுக்கும் ப்ரச்னைதான்...வரதட்சணைத் தொல்லை போன்ற காரணங்கள் கூட இல்லை..

திருமண வாழ்வுக்கு ஆதாரமான, அடித்தளமான சகிப்புத்தன்மை, புரிந்து கொள்ளுதல், நட்பு உணர்வு எல்லாவற்றிற்கும் மேலாக உண்மையான காதல் உணர்வு இல்லாமல் போனது....இப்படிக் காரணங்களைச் சொல்லிக் கொண்டே போகலாம்...

சமீபத்துத் தமிழகப் பயணத்தின் போது திருமணமான தம்பதிகளை வாழ்த்தலாம் என்று அவர்களைப் பற்றி விசாரித்த போது, விவாகரத்துக்கு விண்ணப்பித்திருக்கிறார்கள், தனியாகப் பிரிந்து வாழ்கிறார்கள் என்று கேள்விப்பட அதிர்ச்சியாக இருந்தது...நண்பர்கள், தெரிந்தவர்கள் யார் வழியில் பார்த்தாலும் இந்த ரீதியில் ஏதாவது ஒரு கதை...

பயமாய் இருக்கிறது!!

குறளின் குரல்- 39

2011-12-14T15:57:00.000+03:00

பால்: பொருட்பால்

இயல்: அமைச்சியல்
அதிகாரம்: 72. அவையறிதல்
குறள் எண்: 720

அங்கணத்து ளுக்க வமிழ்தற்றாற் றங்கணத்த
ரலார்முற் கோட்டி கொளல்.

அங்கணத்துள் உக்க அமிழ்து அற்றால் தம் கணத்தர்
அல்லார் முன் கோட்டி கொளல்.

விளக்கம்:

நல்ல சான்றோர்கள், அறிவுத்திறனில் தம் இனத்தவர் அல்லாத பிறர் கூடிய அவையின் முன், ஏதாவது ஒன்றைப் பற்றிப் பேசுதல் எத்தகையது என்றால், கழிவுநீர் தேங்கியுள்ள தூய்மையற்ற முற்றத்தில் அமிழ்தினைக் கொண்டு வந்து கொட்டியதற்குச் சமமாகும்.

அவையில் உள்ளவர்களின் அறிவுத்திறனை அறிந்துகொண்டு, அவர்க்கு ஏற்பல்லாதவற்றைப் பேசாதிருத்தல் நலம்.

அங்கணம் - முற்றம், சேறு, சாக்கடை, இரு தூண் நடுவிடம், மதகு

உக்க - உகுத்த, சிந்திய, சிதறிய

கணத்தார் - கூட்டத்தார், ஊர்க்காரிய நிர்வாகிகள்

கோட்டி - பேச்சு, குழு, கூட்டம், சபை, துன்பம், பகடி, பைத்தியம், நிந்தை, அழகு, கோபுர வாயில், மனை வாயில், விகடக் கூத்து, ஒருவரோடு கூடியிருத்தல்
-------------------------

பால்: அறத்துப்பால்

இயல்: துறவறவியல்
அதிகாரம்: 27. தவம்
குறள் எண்: 261

உற்றநோய் நோன்ற லுயிர்க்குறுகண் செய்யாமை
யற்றே தவத்திற் குரு.

உற்ற நோய் நோன்றல், உயிர்க்கு உறுகண் செய்யாமை
அற்றே தவத்திற்கு உரு.

விளக்கம்:

பொதுவாக, உடலுக்கு ஏற்படக்கூடிய இடர்களைத் தாங்கும் சக்தி, உண்ணா நோன்பு, காலநிலையின் மாறுபாட்டைத் தாங்கும் சக்தி, செயற்கரிய வித்தைகள் செய்யும், செய்விக்கும் சக்தி..முதலானவற்றைத் தவம் என்று போற்றுவது வழக்கம்.

ஆனால், திருவள்ளுவரின் தவம் குறித்த விளக்கம் முற்றிலும் மாறுபடுகிறது.

ஒருவன் தனக்கு வரக்கூடிய துன்பங்களை, தன் முயற்சியின் திறத்தால் தாங்கி எதிர்நோக்கக்கூடிய வல்லமை, பிற உயிர்களுக்குத் தீங்கு செய்யாத தன்மை, தனக்குத் துன்பம் செய்த உயிர்க்கும் துன்பம் செய்யாதிருத்தல் - இவைதான் தவத்திற்கு உரு / வடிவம் / இலக்கணம் ஆகும் என்று விளக்குகிறார்.

நோய் - துன்பம், வருத்தம், பிணி, குற்றம், அச்சம், நோவு

நோன்றல் - பொறுத்தல், தள்ளல், நிலை நிறுத்தல், துரத்தல், தவம் செய்தல்

உறுகண்- துன்பம், வறுமை, நோய்

உரு - வடிவம், உருவம், உடல், தெய்வத்திருமேனி, நிரம், அச்சம், பலமுறை சொல்லுகை, தோணி, எலுமிச்சை, இசைப்பாடல், உருவம் உள்ளது.

-----------------

பால்: பொருட்பால்

இயல்: படையியல்
அதிகாரம்: 78. படைச்செருக்கு
குறள் எண்: 774

கைவேல் களிற்றொடு போக்கி வருபவன்
மெய்வேல் பறியா நகும்.

கை வேல் களிற்றொடு போக்கி வருபவன்
மெய் வேல் பறியா நகும்.

விளக்கம்:

போர்க்களத்தில், தன் கையில் இருந்த வேலைத் தன்னைத் தாக்க வந்த யானையின் மீது எறிந்து தாக்கிய வீரன், மேலும் அடுத்த தாக்குதல் பொருட்டு எறிவதற்காய் வேல் ஒன்றைத் தேடி நிற்க, தன் மேல் வீசப்பட்டுத் தன் மார்பில் பதிந்து கிடக்கும் வேலைக் கண்டு, தக்க சமயத்தில் தக்க கருவி கிடைத்துவிட்டதென்று எண்ணி, அதைப் பறித்துக் கையில் எடுத்துக்கொண்டு மகிழ்ச்சியடைவான். மாபெரும் வீரனின் சிறப்பு இத்தகையது.

----------------
பால்: பொருட்பால்

இயல்: நட்பியல்
அதிகாரம்: 81. பழைமை
குறள் எண்: 801

பழைமை யெனப்படுவ தியாதெனின் யாதுங்
கிழமையைக் கீழ்ந்திடா நட்பு.

'பழைமை எனப்படுவது யாது?' எனின், யாதும்
கிழமையைக் கீழ்ந்திடா நட்பு.

விளக்கம்:

'பழைமை' என்று சொல்லப்படுவது எது என்று கேட்டால், நீண்ட காலமாகப் பழகி வரும் நண்பர், நட்பின் உரிமை காரணமாக, ஏதாவது பிழையாகச் செய்து விட்டாலும் கூட, அதனைப் புரிந்து பொறுத்துக்கொண்டு, அந்த நட்பைக் கீழ்ப்படுத்தாமல் கைவிடாமல், சிதைக்காமல் தக்கவைத்துக்கொள்வதாகும்.

கிழமை - உரிமை, உறவு, நட்பு, ஆறாம் வேற்றுமைப்பொருல், குணம், முதுமை, வார நாள்

-------------------

பால்: பொருட்பால்

இயல்: அரசியல்
அதிகாரம்: 62. ஆள்வினையுடைமை
குறள் எண்: 611

அருமை யுடைத்தென் றசாவாமை வேண்டும்
பெருமை முயற்சி தரும்.

அருமை உடைத்து என்று அசாவாமை வேண்டும்
பெருமை முயற்சி தரும்.

விளக்கம்:

எந்த ஒரு காரியத்தையும் 'இது செய்யக்கூடியதன்று; செய்ய இயலாது' என்று தம்மைத் தாமே தாழ்த்திக் கொண்டு மனம் தளராமல், சோர்ந்து விடாமல் நம்பிக்கையுடன் இருக்க வேண்டும். ஏன் என்றால் முயற்சியுடைமை அதற்கேற்ற பெருமையை தப்பாமல் தரும். எப்படிப்பட்ட செயலையும் செய்து முடிக்கும் ஆற்றலை முயற்சி உண்டாக்கும்.

அருமை - கடினம், இன்மை, எளிதில் கிடைக்காதது, பெருமை

அசாவாமை - தளராமை
------------------

பால்: பொருட்பால்

இயல்: அரசியல்
அதிகாரம்: 60. ஊக்கமுடைமை
குறள் எண்: 597

சிதைவிடத் தொல்கா ருரவோர் புதையம்பிற்
பட்டுப்பா டூன்றுங் களிறு.

சிதைவிடத்து ஒல்கார், உரவோர்; புதை அம்பின்
பட்டுப் பாடு ஊன்றும் களிறு.

விளக்கம்:

தன் உடல் முழுவதும் துளைத்துப் புதையுண்ட அம்புகளால் தைக்கப்பட்டு வலியால் துன்பப்படும்போதும், யானை தன் மன உறுதியில் தளராது எதிர்த்து நின்று தன் பெருமையை நிலைநிறுத்தும். அது போல் தாம் எடுத்துக்கொண்ட முயற்சிக்குக் கேடு வந்த போதும் ஊக்கமுடையவர் தளராது நின்று, தமது பெருமையை நிலைநாட்டி நிற்பர்.

ஒல்கார் - தளராதவர்

உரவோர் - ஊக்கமுடையவர், வலிமையுடையவர், மூத்தோர்

களிறு - யானை

குறளின் குரல்- 38

2011-12-14T15:56:00.000+03:00

பால்: அறத்துப்பால்

இயல்: ஊழ் இயல்
அதிகாரம்: 36. ஊழ்
குரள் எண்: 376

பரியினு மாகாவாம் பாலல்ல வுய்த்துச்
சொரியினும் போகா, தம.

பரியினும் ஆகாவாம், பால் அல்ல; உய்த்துச்
சொரியினும் போகா தம.

விளக்கம்:

ஒருவன் தனக்கு உரிமையில்லாதவற்றை எவ்வளவுதான் போற்றிப் பாதுகாத்தாலும், ஊழ் / விதி என்பதன் காரணமாக, அப்பொருள் அவனிடம் தங்காமல் போய்விடும். தனக்கு உரிமையானவற்றை வேண்டாம் என்று ஒதுக்கித் தள்ளினாலும், ஊழ் / விதி காரணமாய் அவை உரியவரை நீங்கிப் போகாது.
---------------------

பால்: பொருட்பால்

இயல்: அரசியல்
அதிகாரம்: 46. சிற்றினம் சேராமை
குறள் எண்: 454

மனத்து ளதுபோலக் காட்டி யொருவற்
கினத்துள தாகு மறிவு.

மனத்து உளது போலக் காட்டி ஒருவற்கு
இனத்து உளதாகும் அறிவு.

விளக்கம்:

ஒருவருடைய அறிவு, வெளிப்படையாகப் பார்க்கும் போது, அவரது மனதில் உள்ளது போலத் தோன்றும். ஆனால், உண்மையில் அவர் சேர்ந்த இனத்தைப் பொறுத்தே அவரது அறிவாற்றல் அமையும்.

அறிவாற்றல் அவரவர் மனதில் இருந்துதான் வெளிப்படுகிறது என்பது ஏற்றுக்கொள்ளக்கூடிய உண்மைதான். என்றாலும், அவர் சென்று சேரும் இனத்தின் குணநலத்தால், அவர் அறிவாற்றல் கூடவோ குறையவோ செய்கிறது என்பது எதார்த்தம். அவர் இனத்தைப் பொறுத்தே அவர் அறிவு அவர்க்கு நன்மையும், தீமையும் தரும்.

மனதில் உள்ள அறிவு, இப்படித்தான் இனம் சார்ந்த அறிவாகிறது.

இப்படித்தான், இயல்பாக நல்லறிவு இல்லாதவராய் இருந்தாலும், அவர் சேர்ந்த இனத்தின் நற்குணங்களால் அறிவாற்றல் பெற்று நன்மையடைவர்.

இன்னும் பலர் இயல்பாக நல்லறிவு பெற்றிருந்தாலும், அவர் சேர்ந்த இனத்தின் தீய தன்மையால் அறிவிழந்து மதிமயங்கி அவதிப்படுவர்.

நன்மைகள் அடைய நல்லவருடன் சேருங்கள்.

தீமைகள் அடையத் தீயவருடன் சேருங்கள்.

உங்கள் அறிவாற்றல் குறைந்திருந்தாலும், நல்லவர்களின் சேர்க்கையால் அது மிகுதியாகப் பெருகும்.

உங்கள் அறிவின் சிறப்புக்கூட, தீயவரின் சேர்க்கையால் ஒளி குன்றிப்போகும்.
---------------------------

பால்: பொருட்பால்

இயல்: நட்பியல்
அதிகாரம்: 94. சூது
குறள் எண்: 931

வேண்டற்க வென்றிடினுஞ் சூதினை வென்றதூஉந்
தூண்டிற்பொன் மீன்விழுங்கி யற்று.

வேண்டற்க வென்றிடினும் சூதினை வென்றதூஉம்
தூண்டில் பொன் மீன் விழுங்கியற்று.

விளக்கம்:

மீன் பிடிப்பதற்காகத் தூண்டிலில் வைக்கப்பட்ட இரை அளவில் மிகச் சிறியது, என்றாலும், அதனால் கவரப்பட்ட மீன்கள் தாமாகவே சென்று அந்த இரையை உண்ண எண்ண, தூண்டிலில் மாட்டிக்கொண்டு, தாமாகவே தம் முடிவைத் தேடிக் கொள்ளும்.

சூதாட்டத்தின் மூலம் சிறிய அளவில் பொருள் வந்தவுடனேயே, மேன்மேலும் அதைப் பெருக்க எண்ணி, அச்சூதாட்டத்திலேயே மீண்டும் மீண்டும் தன் உடைமைகளைப் பணயம் வைத்து ஆடுவார்கள். முடிவில் முற்றும் இழந்து அவதிப்படுவார்கள்.

சூதாட்ட வெற்றி, மீனுக்காகத் தூண்டிலின் இரும்பு முள்ளில் வைக்கப்பட்ட இரை போன்றது. ஆபத்து அறியாமல் இரைக்காகச் சென்று மாட்டிக்கொள்ளும் மீனைப் போல, பொருட்கள் அனைத்தையும் இழக்கப்போகும் ஆபத்து அறியாமல், மீண்டும் மீண்டும் வெற்றி பெறுவோம் என்று தவறாக எண்ணி உள்ள பொருள் அனைத்தையும் இழந்து நிற்பர்.

அதனால் வெற்றியே பெற்றாலும் கூடச் சூதாட்டத்தை விரும்பாமல் தவிர்க்க வேண்டும்.

பொன் - இரும்பு, தங்கம், மேருமலை, செல்வம், பொலிவு, பசலை, ஒளி, அழகு, ஏற்றம், திருமகள், வியாழன், சூரியன்
------------------------

பால்: பொருட்பால்

இயல்: நட்பியல்
அதிகாரம்: 79. நட்பு
குறள் எண்: 781

செயற்கரிய யாவுள நட்பி னதுபோல்
வினைக்கரிய யாவுள காப்பு.

செயற்கு அரிய யா உள, நட்பின்? அது போல்
வினைக்கு அரிய யா உள, காப்பு?

விளக்கம்:

நல்லதொரு நட்பினை உருவாக்கிக் கொள்தல் போன்ற செயற்கரிய சிறந்த செயல் உலகில் யாது உள்ளது? எந்த ஒரு செயலுமில்லை.

எந்த ஒரு காரியத்துக்கும் பாதுகாப்பாகவும், துணையாகவும் நிற்கக்கூடிய அத்தகைய நட்பைப் போன்ற சிறந்ததொரு, கிடைத்தற்கு அரியதொரு பாதுகாப்பு இவ்வுலகில் யாது உள்ளது? ஏதுமில்லை.

நல்லதொரு நட்பு வாய்ப்பதென்பது எளிதன்று. எல்லோர்க்கும் வாய்க்கக்கூடியதும் அன்று. அப்படி ஒரு நட்பு வாய்க்கையில், அது போல நம் காரியங்களுக்குப் பாதுகாப்பாக, துணையாக வரக்கூடியது, கைகொடுத்து உதவக்கூடியது வேறு ஏதுமில்லை.
-------------------------

பால்: பொருட்பால்

இயல்: நட்பியல்
அதிகாரம்: 93. கள்ளுண்ணாமை
குறள் எண்: 929

களித்தானைக் காரணங் காட்டுதல் கீழ்நீர்க்
குளித்தானைத் தீத்துரீஇ யற்று.

களித்தானைக் காரணம் காட்டுதல் கீழ் நீர்க்
குளித்தானைத் தீத் துரீஇயற்று.

விளக்கம்:

மது அருந்திக் களித்து மகிழ்ந்து பழகிப்போய்விட்ட ஒருவனை, 'அது தீயது' என்று பல்வேறு காரணங்களை எடுத்துக்காட்டித் தெளிவித்தல், குளத்தின் நீருக்கு உள்ளே போய் மூழ்கிக் குளிக்கின்றவனைத் தீப்பந்தம் ஏந்தித் தேடுவதற்கு ஒப்பானது.

குளத்தின் நீர்ப்பரப்பில் நின்று குளிப்பவனைத் தீப்பந்தம் பிடித்துத் தேடுதல் எளிது. ஆனால், குளத்திற்குள் மூழ்கிக் குளிப்பவனைத் தேடுகிறவனும் மூழ்கித் தேட வேண்டும். மூழ்கியவுடனேயே ஒளியிழந்து பயனற்றுப்போகும் தீப்பந்தம்.

நீருக்கு அடியில் தீப்பந்தத்தின் ஒளிமிகு சுடரும் செயலிழந்து போகும்;

போதைக்கு அடிமையானவன் முன் எடுத்துவைக்கப்படும் நியாயமான காரணங்களும் வலுவிழந்து போகும்.

மதுவின் பழக்கம் அளவுடன் இருக்கும் போது உரிய காரணங்கள் எடுத்துக்கூறித் திருத்துவது சற்றே எளிதான செயலாக இருக்கக் கூடும். ஆனால், அப்பழக்கத்தில் அளவுக்கு அதிகமாய் மூழ்கி, அந்த மகிழ்ச்சியில் / போதையில் திளைத்தவனுக்குக் கூறப்படும் அறிவுரையும், எடுத்துக்காட்டும் காரணங்களும் பயனற்றவை. மதுப்பழக்கம் அளவுக்கு அதிகமாகப் பழகிவிட்டால் திருத்துதல் மிகவும் கடினமாகும்.
---------------------

பால்: பொருட்பால்

இயல்: அரசியல்
அதிகாரம்: 63. இடுக்கண் அழியாமை
குறள் எண்: 622

வெள்ளத் தனைய யிடும்பை யறிவுடையா
னுள்ளத்தி னுள்ளக் கெடும்.

வெள்ளத்து அனைய இடும்பை, அறிவுடையான்
உள்ளத்தின் உள்ளக் கெடும்.

விளக்கம்:

வெள்ளம் போல் பெருகி வரும் துன்பம் அனைத்தும், அறிவுடைய ஒருவன் அத்துன்பங்களைக் கடத்தல் எளிது என்று மனதில் உறுதியுடன் நினைத்த உடனேயே அழிந்து போகும்.

அறிவுடையவன் மனதில் உறுதி உடையவன் ஆகிறான்; உறுதி கொண்டவுடன் நன்கு செயலாற்றும் தன்மை பெற்றுவிடுகிறான்; அத்தகையவனுக்குத் துன்பங்கள் ஒரு பொருட்டல்ல.

சொல் மயக்கம்

2011-12-11T15:00:00.003+03:00

வான வில்லின்
வண்ணங்கள்
வகைபிரியும்
ஏதோவோர் இழை

நீலக்கடலும்
நீலவானும்
நீளச் சந்திக்கும் கோட்டின்
ஏதோவொரு புள்ளி

முதல் அலையை
முன்னேறும் அலை
முத்தமிட்டுச் செல்லும்
ஏதோவொரு துளி

உனக்குள்ளும்
எனக்குள்ளும்
வெடித்துச் சிதறும்
காதல் பூகம்பத்தின்
ஏதோவொரு துகள்

அனுபவங்களால் மட்டுமே
நுகரப்படுவதாய்...
புலன்களுகெல்லாம்
புலப்படாத புதிராய்..

சொல்லத் தெரியவில்லை;
சொல்லித் தெரிவதில்லை.

முயன்று தோற்று
முடங்கி மடங்கி
மயங்கிப் போகின்றன
சொற்கள்.

குறளின் குரல் - 37

2011-12-11T15:00:00.001+03:00

பால்: பொருட்பால்

இயல்: அரசியல்
அதிகாரம்: 59. ஒற்றாடல்
குறள் எண்: 588

ஒற்றொற்றித் தந்த பொருளையு மற்றுமோ
ரொற்றினா லொற்றிக் கொளல்.

ஒற்று ஒற்றித் தந்த பொருளையும், மற்றும் ஓர்
ஒற்றினால் ஒற்றி, கொளல்.

விளக்கம்:

ஓர் ஒற்றன் உளவறிந்து வந்து செய்தி கூறினாலும், அந்தச் செய்தியை இன்னுமோர் ஒற்றன் மூலம் அறியச் செய்து இரண்டு உளவையும் ஒப்பிட்டுப் பார்த்து, உண்மை அறிந்து கொள்ள வேண்டும்.

ஓர் ஒற்றன் செயலை இன்னுமோர் ஒற்றன் மூலம் கண்காணிக்கும் திறமை இருந்தால், உண்மைச் செய்திகளை உறுதிப் படுத்திக்கொள்ள முடியும். அது மட்டுமில்லாமல், தவறுகள் மற்றும் நம்பிக்கைத் துரோகங்கள் செய்யாமல் இருக்கும் பண்பை ஒற்றர்களிடம் உருவாக்கவும் முடியும்.

-----------------
பால்: பொருட்பால்

இயல்: குடியியல்
அதிகாரம்: 101. நன்றியில் செல்வம்
குறள் எண்: 1004

எச்சமென் றென்னெண்ணுங் கொல்லோ வொருவரா
னச்சப் படாஅ தவன்.

எச்சம் என்று என் எண்ணும் கொல்லோ ஒருவரால்
நச்சப் படாதவன்.

விளக்கம்:

பிறர்க்கு உதவி செய்து வாழாதவனை எவரும் விரும்பமாட்டார்கள். இப்படி ஒருவராலும் விரும்பப்படாதவன், தான் இறந்த பின் எஞ்சி நிற்கும் என்று எதனை எண்ணுவானோ?

உதவி செய்து வாழும் போதுதான் அவன் பெற்ற செல்வம் பயனுள்ளதாகிறது. பிறர்க்கு உதவாமல் வாழும் போது அவனை எவரும் விரும்பும் வாய்ப்பில்லை; பிறர் விரும்பாத போது, ஒருவன் தான் இறந்த பின் எஞ்சி நிற்கும் என்று கருதக்கூடிய பொருளோ, புகழோ ஏதுமில்லை.

நன்றியில் செல்வம் - நன்றி இல் செல்வம் - ஈட்டியவருக்கும், பிறருக்கும் பயன்படாத செல்வம்

--------------------

பால்: பொருட்பால்

இயல்: அரசியல்
அதிகாரம்: 61. மடியின்மை
குறள் எண்: 604

குடிமடிந்து குற்றம் பெருகு மடிமடிந்து
மாண்ட வுஞற்றி லவர்க்கு.

குடி மடிந்து குற்றம் பெருகும் மடி மடிந்து
மாண்ட உஞற்று இல் அவர்க்கு.

விளக்கம்:

சோம்பலில் திளைத்து மூழ்குவதால், ஒருவர் வாழ்க்கையில் முயற்சி செய்யும் தன்மை குன்றிப் போகும். இதனால் சிறப்பு / மாட்சிமை தரக்கூடிய உழைப்பினையும் ஒருவர் கைவிட நேரிடும். இந்த நிலையில், அவர் குடியும் அழிந்து போகும்; குற்றங்களும் பெருகிப்போகும்.

மடி - சோம்பல்

மாண்ட - மாட்சிமை பொருந்திய, இறந்த

உஞற்று - முயற்சி, ஊக்கம், வழக்கு, தூண்டு, தவறு, முயற்சி செய்

-----------------

பால்: அறத்துப்பால்

இயல்: இல்லறவியல்
அதிகாரம்: 21. தீவினையச்சம்
குறள் எண்: 208

தீயவை செய்தார் கெடுத னிழறன்னை
வீயா தடியுறைந் தற்று.

தீயவை செய்தார் கெடுதல் நிழல் தன்னை
வீயாது அடி உறைந்து அற்று.

விளக்கம்:

தீய செயல்களைச் செய்தவர் அதன் விளைவுகளில் இருந்து தப்பிக்க இயலாது. ஒருவன் மேற்கொண்ட தீய செயல்களால், அவனுக்கு நேரவிருக்கும் துன்பங்களில் இருந்து அவன் தப்பிக்கவே இயலாது.

இது எத்தகையது என்றால், ஒருவன் தன் நிழல் அவன் பாதங்களின் கீழேயே எப்போதும் தங்கும் தன்மையுடையது. அப்படி அவன் பாதங்களின் கீழ் உறையும் நிழல், சமயம் வரும்போதெல்லாம் தவறாமல் வெளிப்பட்டே தீரும்.

நிழல் பாதத்தின் அடியே மறையாது தங்கியிருப்பது போல, தீய செயலால் வரும் துன்பங்களும் விலகாது கூடவே வரும். சமயம் வரும்போது வெளிப்படும் நிழல் போல, தக்க சமயத்தில் தவிர்க்க முடியாத துன்பங்கள் தவறாமல் வந்து சேரும்.

வீயாது - தவறாது, விலகாது, விடாது
--------------

பால்: அறத்துப்பால்

இயல்: இல்லறவியல்
அதிகாரம்: 10. இனியவை கூறல்
குறள் எண்: 92

அகனமர்ந் தீதலி னன்றே முகனமர்ந்
தின்சொல னாகப் பெறின்.

அகன் அமர்ந்து ஈதலின் நன்றே முகன் அமர்ந்து
இன்சொலன் ஆகப் பெறின்.

விளக்கம்:

மனம் மகிழ்ந்து ஒருவருக்குப் பொருளை ஈவது நல்லதா? முகம் மலர்ந்து ஒருவரிடம் இன்சொல் பேசுவது நல்லதா?

பிறர்க்கு ஈவது என்பது தம்மிடம் இருக்கும் பொருளின் அளவைப் பொறுத்தே அமையக் கூடிய ஒரு சிறப்பாகும். பொருளின் இருப்பைப் பொறுத்து

ஈயும் தன்மை மற்றும் அளவு, சூழலுக்கேற்றாற் போல மாறக் கூடும்.

ஆனால், இன்சொல் என்பது எப்போதும் ஒருவரிடம் இயல்பாய் இருக்க வேண்டிய தன்மையாகும். இது எந்த நிலையிலும் மாறாத இயல்புடன் விளங்கும். எப்போதும் குன்றி விடாமல், இன்சொல் பேசும் தன்மை நிறைந்து இருக்கும்படி பார்த்துக் கொள்வது சிறப்பு.

எனவே இன்சொல் பேசுவது, ஈவதைக் காட்டிலும் சிறந்ததாகும்.
---------------

பால்: இன்பத்துப்பால்

இயல்: கற்பியல்
அதிகாரம்: 126. நிறையழிதல்
குறள் எண்: 1256

செற்றவர் பின்சேறல் வேண்டி யளித்தரோ
வெற்றென்னை யுற்ற துயர்.

செற்றவர் பின் சேறல் வேண்டி அளித்து அரோ
எற்று என்னை உற்ற துயர்?

விளக்கம்:

என் மனதுக்கு நெருக்கமானவர் என்னை பிரிந்து சென்ற பின்னும், அவர் பின் செல்ல விரும்புகிறது என் நெஞ்சம். என்னை வாட்டுகிறது இந்தப் பிரிவுத் துயர். இந்தத் துயரம் எத்தன்மையது? அந்தோ! மிகக் கொடியது. இரங்கத்தக்கது.

நிறையழிதல் - மனதின் இரகசியம் மறைத்து அலை பாயும் மனதை ஒரு நிலைப்படுத்துவது நிறை; பிரிவாற்றாமையால் மனதை நிலைப்படுத்தமுடியாமல், வெளிப்படையாகப் பேசுவது நிறையழிதல்.

எற்று - எத்தன்மையது

அரோ - அசைச்சொல்

சேறல் - செல்லுதல்

செற்று - நெருக்கம்; செற்றவர் - நெருங்கியவர்

குறளின் குரல் - 36

2011-12-11T15:00:00.000+03:00

பால்: அறத்துப்பால்

இயல்: துறவறவியல்
அதிகாரம்: 28. கூடாவொழுக்கம்
குறள் எண்: 271

வஞ்ச மனத்தான் படிற்றொழுக்கம் பூதங்க
ளைந்து மகத்தே நகும்.

வஞ்ச மனத்தான் படிற்றுஒழுக்கம் பூதங்கள்
ஐந்தும் அகத்தே நகும்.

விளக்கம்:

வஞ்சம் நிறைந்த மனம் உடையவர் உண்மையான நல்லொழுக்கத்துடன் செயல்பட இயலாது. அவர் பொய்யொழுக்கம் புறத்தே காண்பித்து ஒழுக்கசீலரைப் போல வேடம் தரிப்பர். அத்தகைய பொய்யர்களைப் பார்த்து அவர் உடம்பில் தங்கியிருக்கும் காற்று, நீர், தீ, நிலம், ஆகாயம் ஆகிய ஐம்பூதங்களும் தம்முள் சிரித்து நிற்கும்.
-----------------------

பால்: இன்பத்துப்பால்

இயல்: களவியல்
அதிகாரம்: 111. புணர்ச்சி மகிழ்தல்
குறள் எண்: 1101

கண்டுகேட் டுண்டுயிர்த் துற்றறியு மைம்புலனு
மொண்தொடி கண்ணே யுள.

கண்டு கேட்டு உண்டு உயிர்த்து உற்று அறியும் ஐம்புலனும்
ஒண்தொடி கண்ணே உள.

விளக்கம்:

காண்பது, கேட்பது, சுவைப்பது, நுகர்வது, தீண்டுவது என்று வகைப்படுத்தப்பட்ட ஐம்புலன்களும் ஒளிபொருந்திய வளையல்கள் அணிந்துள்ள இப்பெண்ணிடம் ஒருங்கே நிறைந்துள்ளன. காதல் இன்பத்தின் முழுமை நிலை இங்கு விளக்கப்படுகிறது.

------------------

பால்: அறத்துப்பால்

இயல்: பாயிரவியல்
அதிகாரம்: 03. நீத்தார் பெருமை
குறள் எண்: 25

ஐந்தவித்தா னாற்ற லகல்விசும்பு ளார்கோமா
னிந்திரனே சாலுங் கரி.

ஐந்து அவித்தான் ஆற்றல், அகல் விசும்புளார் கோமான்
இந்திரனே சாலும் கரி.

விளக்கம்:

(1) ஐம்புலன்களையும் அடக்கி ஆள்பவனது பெருமை மிகவும் சிறந்தது. ஐம்புலன்களையும் அடக்கித் தன் தவ வலிமையால், அகன்ற வானின் கண் உறைபவர்க்குத் தலைவனாகிய இந்திரனே இதற்கு மிகச் சிறந்த சான்றாவான்.

ஒருவன் தன் தவத்தின் வலிமையால் இந்திர பதவி அடைவான் என்பது வழிவழியாக வரும் நம்பிக்கையாகும்.

அகல் விசும்புளார் கோமான் - அகன்ற வானத்தின் கண் உறைகின்றவர்க்கு அரசன் / தலைவன்

(2) ஐம்புலன்களையும் அடக்கி ஆள்பவனது பெருமை மிகவும் சிறந்தது. ஐம்புலன்களையும் அடக்கித் தன் தவ வலிமையால், அகன்ற வானம் போன்று, பரந்து விரிந்த பெருமை வாய்ந்த இந்திரனே இதற்கு மிகச் சிறந்த சான்றாவான்.

அகல் விசும்புளார் கோமான் - அகன்ற வானம் போன்று பரந்து விரிந்த புகழ் உள்ளவன்; பெருமையில் சிறந்து விளங்குபவன்

தந்நலம் நீத்தாரின் பெருமைக்கு மிகவும் முக்கியமானது, ஐம்புலன்களை அடக்கியாளும் அவர்களது ஆற்றலே என்ற கருத்து வலியுறுத்தப்படுகிறது.

விசும்பு - வானம், தேவலோகம், மேகம், செருக்கு, வீம்பு, திசை

கோமான் - பெருமையிற் சிறந்தவன், அரசன், மூத்தோன், குரு

கரி - சான்று, சாட்சியம், நஞ்சு, மிளகு, அடுப்புக் கரி, யானை, நிலக்கரி, கரிந்தது, பெண்கழுதை, மரவைரம், விருந்தினன், பயிர் தீய்தல்

------------------

பால்: அறத்துப்பால்

இயல்: இல்லறவியல்
அதிகாரம்: 08. அன்புடைமை
குறள் எண்: 79

புறத்துறுப் பெல்லா மெவன்செய்யும் யாக்கை
யகத்துறுப் பன்பி லவர்க்கு.

புறத்து உறுப்பு எல்லாம் எவன் செய்யும் யாக்கை
அகத்து உறுப்பு அன்பு இலவர்க்கு?

விளக்கம்:

உடம்பின் அகத்தே உறையும் உறுப்பான அன்பு என்பது சரிவர இயங்காத போது, புற உறுப்புகள் கை, கால் முதலியன சரிவர இயங்கிப் பயன் ஒன்றும் இல்லை. அகத்து உறுப்பான அன்பு புற உறுப்புகளை இயக்கினால்தான் பயன் பெற முடியும்.

யாக்கை - உடம்பு, கட்டுகை
----------------

பால்: பொருட்பால்

இயல்: அரசியல்
அதிகாரம்: 39. இறைமாட்சி
குறள் எண்: 389

செவிகைப்பச் சொற்பொறுக்கும் பண்புடை வேந்தன்
கவிகைக்கீழ்த் தங்கு முலகு.

செவி கைப்பச் சொல் பொறுக்கும் பண்புடை வேந்தன்
கவிகைக்கீழ்த் தங்கும் உலகு.

விளக்கம்:

அமைச்சர்கள், மக்கள் மற்றும் கடிந்து பேசும் பெரியோர் - இவர்களது சொற்கள் செவிகளையே புண்படுத்தக்கூடியவை என்றாலும், அத்தகைய சொற்கள் தனக்கு ஏற்றவை அல்ல என்றாலும், அவற்றைப் பொறுமையோடு கேட்கும் பண்புடைய வேந்தனின் வெண்கொற்றக்குடையின் / ஆட்சியின் கீழ் இந்த உலகமே நீண்ட நாள் தங்கி மகிழும் வாய்ப்பினைப் பெறும்.

கவிகை - குடை, வளைவு, நன்மை தீமை, தியாகம்

THE DIRTY PICTURE

2011-12-04T12:31:00.002+03:00

எண்பதுகளில் சில்க் புகழின் உச்சகட்டத்தில் இருந்து, பின் 1996 ல்

இறந்த போது ...ஊடக வளர்ச்சி தற்காலம் போல இல்லாத நிலையில், கொலையா தற்கொலையா..தாடிக்காரர் காரணமா என்ற கேள்விகள் எழ விடைகள் கிடைக்கவில்லை. நடிகை என்றாலே தற்கொலை முடிவு என்பதுதானே என்று போய்விட்டது இதுவும் அப்போது.

கவர்ச்சி நடிகை என்றாலும் பெண்களையும் அக்காலத்தில் கவர்ந்தவர் சில்க் என்பதால் என் தோழிகள் முதல் எங்களின் அம்மாக்கள் வரை அப்போது அவர் மரணம் ஒரு பாதிப்பை ஏற்படுத்தியது.

இன்று இந்தப் படம் அவர் வாழ்க்கை வரலாறு அல்ல என்றே கூறுகிறார்கள். எப்படி இருந்தாலும், இப்படத்தைப் பார்க்கும்போது இவை இவை காரணமாக இருந்திருக்கக் கூடும் என்று சில விடைகள் கிடைக்கின்றன.

தோல்வியைத் தாங்க இயலாமை, போட்டி நடிகையின் வரவு, யாருமற்ற தனிமை, கடன் தொல்லை ..பல காரணங்களைத் திரைப்படம் வாயிலாகப் பார்க்கும்போது அவர் மரணம் தற்கொலைதான், கொலையாக இருந்திருக்க முடியாது என்றே தோன்றுகிறது.

வித்யா பாலன் தோற்றத்தில் சில்க் பக்கம் கூட நெருங்க முடியவில்லை..என்ற போதும் நடிப்பில் தன் முழுத்திறமையும் பதித்துள்ளார். 'என்னுடன் பேசுவதற்கு யாருமில்லையா' என்று கதறுகிற போதும், பத்திரிகையாளர் வீட்டின் வெளியே ஆட்டம் போடும் போதும், நசுருதீன் ஷாவின் குதர்க்கமான பேச்சுக்குப் பதிலாகத் தன்வலியைத் தைரியமாக வெளிப்படுத்தும் மன உறுதியிலும், 'நான் சில்க்' என்று பெருமிதப்பட்டுக்கொள்ளும் போதும்......மிக நேர்த்தியான, அழுத்தமான முகபாவங்கள்..

மறைந்த சில்க் வாழ்க்கையின் பல தெளிவான கோணங்கள்....சன்னல் வழியாகக் குதித்துத் தப்பிக்கும் துணிச்சல் முதல்...தோல்வியால் துவண்டு கோழைத்தனமாக முடிவெடுக்கும் வரை... மிக நேர்த்தியாகச் சொல்லியிருக்கும் இயக்குநருக்கு சிறப்புப் பாராட்டுகள்...

இந்தப் படம் தந்த பாதிப்பையும் சில்க் என்ற பெண்ணின் பாத்திரத்தையும் மறப்பதற்குச் சில நாட்கள் ஆகும்.

குறளின் குரல் - 35

2011-12-04T12:30:00.000+03:00

பால்: பொருட்பால்

இயல்: அரசியல்
அதிகாரம்: 54. பொச்சாவாமை / கடமையை மறக்கும் தன்மை
குறள் எண்: 531

இறந்த வெகுளியிற் றீதே சிறந்த
வுவகை மகிழ்ச்சியிற் சோர்வு.

இறந்த வெகுளியின் தீதே - சிறந்த
உவகை மகிழ்ச்சியின் சோர்வு.

விளக்கம்:

அளவுக்கு மீறிய கோபம் மிகவும் தீதான ஒன்றாகும். அளவு கடந்த மகிழ்ச்சியில் திளைத்து, தன்னிலை மறந்து, தன் கடமைகள் மறந்து செயலற்று இருப்பது கொடுஞ்சினத்தைக் காட்டிலும் தீயதாகும்.

----------------

பால்: பொருட்பால்

இயல்: அமைச்சியல்
அதிகாரம்: 67. வினைத் திட்பம்
குறள் எண்: 669

துன்ப முறவரினுஞ் செய்க துணிவாற்றி
யின்பம் பயக்கும் வினை.

துன்பம் வரினும் செய்க துணிவு ஆற்றி
இன்பம் பயக்கும் வினை.

விளக்கம்:

ஒரு செயலை மேற்கொள்ளும் போது துன்பங்கள் அதிகமாக வந்தாலும், அதனால் மனம் தளர்ந்து விடக்கூடாது. துணிவுடன் செயல்பட்டுக் கடினமாக உழைத்து முயன்றால், முடிவில் இன்பம் என்பது தவறாமல் வந்து சேரும்.
----------------------
பால்: பொருட்பால்

இயல்: அரணியல்
அதிகாரம்: 75. அரண்
குறள் எண்: 744

சிறுகாப்பிற் பேரிடத்த தாகி யுறுபகை
யூக்க மழிப்ப தரண்.

சிறு காப்பின் பேர் இடத்தது ஆகி உறுபகை
ஊக்கம் அழிப்பது அரண்.

விளக்கம்:

காவல் செய்ய வேண்டிய வாயில் முதலான இடங்கள் சிறிய பரப்பளவில் அமைந்து, சிறிதளவு முயற்சியுடன் காக்கக்கூடியதாய் இருக்க வேண்டும். உட்பகுதியோ பரப்பளவில் அகன்று இருக்க வேண்டும். நெருங்கி வந்து பகைவர் முற்றுகையிட அஞ்சும் வண்ணம் பகைவரின் ஊக்கத்தை அழித்து, அவர்களின் மலைப்பைப் பெருக்கும் வண்ணம் பரந்ததாய் அமைய வேண்டும். அத்தகைய அரணே சிறந்ததாகும்.
----------------------------

பால்: அறத்துப்பால்

இயல்: இல்லறவியல்
அதிகாரம்: 06. வாழ்க்கைத் துணைநலம்
குறள் எண்: 53

இல்லதெ னில்லவள் மாண்பானா லுள்ளதெ
னில்லவள் மாணாக் கடை.

இல்லது என், இல்லவள் மாண்பு ஆனால்? உள்ளது என்,
இல்லவள் மாணாக் கடை?

விளக்கம்:

இல்லறத்தில் இல்லாளின் பண்புகள் மிகவும் முக்கியமானவை. அவள் மாண்பு மிக்கவளாய் இருந்தால் இல்லாதது என்று எதுவும் இல்லை; அவளிடம் மாட்சிமைப் பண்புகள் இல்லையெனில் உள்ளது என்று எதுவும் இல்லை.

------------------

பால்: அறத்துப்பால்

இயல்: இல்லறவியல்
அதிகாரம்: 08. அன்புடைமை
குறள் எண்: 74

அன்பீனு மார்வ முடைமை யதுவீனும்

நண்பென்னு நாடாச் சிறப்பு.

அன்பு ஈனும் ஆர்வம் உடைமை; அது ஈனும்
நண்பு என்னும் நாடாச் சிறப்பு.

விளக்கம்:

குடும்பம், உறவு மற்றும் பிறரிடம் கொள்ளும் அன்பு, அனைவரையும் விரும்பத்தக்க பண்பை உள்ளத்தில் உருவாக்கும்; அதுவே அனைவரையும் நட்பாக்கிக் கொள்ளும் பெருஞ்சிறப்பையும் உண்டாக்கும்.

----------------

பால்: அறத்துப்பால்

இயல்: இல்லறவியல்
அதிகாரம்: 14. ஒழுக்கமுடைமை
குறள் எண்: 132

பரிந்தோம்பிக் காக்க வொழுக்கம் தெரிந்தோம்பித்
தேரினு மஃதே துணை.

பரிந்து ஓம்பிக் காக்க ஒழுக்கம் தெரிந்து ஓம்பித்
தேரினும் அஃதே துணை.

விளக்கம்:

எத்தகைய துன்பம் வந்து அதனால் வருந்த நேரிட்டாலும், அத்தனை துன்பத்தையும் பொறுத்துக்கொண்டு எப்பாடு பட்டாவது ஒழுக்கத்தைப் போற்றிக் காக்க வேண்டும். எந்தெந்த வழிகளில் ஆராய்ந்து பார்த்தாலும், எப்போதும் மிகவும் சிறந்த துணையாக வருவது ஒழுக்கம் என்பதால் அதனை எப்பாடு பட்டாவது போற்றிக் காத்துக் கொள்ள வேண்டும்.

குறளின் குரல் - 34

2011-12-04T12:08:00.000+03:00

பால்: பொருட்பால்
இயல்: அரசியல்
அதிகாரம்: 60. ஊக்கமுடைமை
குறள் எண்: 598

உள்ள மிலாதவ ரெய்தா ருலகத்து
வள்ளிய மென்னுஞ் செருக்கு.

உள்ளம் இலாதவர் எய்தார் 'உலகத்து
வள்ளியம்' என்னும் செருக்கு.

விளக்கம்:

ஊக்கம் இல்லாதவர்கள், 'பிறர்க்கு உதவும் வள்ளல் தன்மை உடையவர் யாம்' என்னும் பெருமையான மன உணர்வைப் பெறுதல் இயலாது.

ஊக்கம் இல்லாத காரணத்தால், பொருள் ஈட்டும் தன்மை குன்றியே காணப்படுவார்கள். அத்தகையவர்கள் பொருள் ஈட்டி, தானும் அனுபவித்து, அடுத்தவர்க்கும் கொடுத்து உதவுவது என்பது மிகவும் கடினமான காரியமாகும்.

உள்ளம் - ஊக்கம், முயற்சி, மனம், உள்ளக்கருத்து, ஞானம், ஆன்மா

வள்ளியம் - ஈகைக்குணம், ஊதுகுழல், மரக்கலம், மெழுகு, மிளகு
------------------------

பால்: பொருட்பால்

இயல்: அரசியல்
அதிகாரம்: 45. பெரியாரைத் துணைக்கோடல்
குறள் எண்: 442

உற்றநோய் நீக்கி யுறாஅமை முற்காக்கும்
பெற்றியார்ப் பேணிக் கொளல்.

உற்ற நோய் நீக்கி, உறாஅமை முன் காக்கும்
பெற்றியார்ப் பேணிக் கொளல்.

விளக்கம்:

ஒருவர்க்கு நேர்ந்துள்ள துன்பத்தைப் போக்கி, இனிமேல் வரக்கூடிய துன்பங்களையும் முன்கூட்டியே அறிந்துகொண்டு, அத்துன்பங்கள் நேராமல் காக்க வல்ல தன்மையுடைய பெரியவர்களைப் போற்றி, அவர்களை நட்பாக்கிக் கொள்ள வேண்டும்.

உறாஅமை - இசைநிறையளபெடை
-----------------

பால்: அறத்துப்பால்

இயல்: துறவறவியல்
அதிகாரம்: 37. அவாவறுத்தல்
குறள் எண்: 368

அவாவிலார்க் கில்லாகுந் துன்பமஃ துண்டேற்
றவாஅது மேன்மேல் வரும்.

அவா இலார்க்கு இல்லாகும் துன்பம்; அஃது உண்டேல்,
தவாஅது மேன்மேல் வரும்.

விளக்கம்:

ஆசைகள் இல்லாதவர்களுக்குத் துன்பம் உண்டாவதில்லை; ஆசைகள் உள்ளவர்க்கு, இடைவிடாது, முடிவில்லாது துன்பம் தொடர்ந்து வந்துகொண்டே இருக்கும்.

---------------

பால்: அறத்துப்பால்

இயல்: இல்லறவியல்
அதிகாரம்: 07. மக்கட்பேறு
குறள் எண்: 68

தம்மிற்றம் மக்க ளறிவுடைமை மாநிலத்து
மன்னுயிர்க் கெல்லா மினிது.

தம்மின், தம் மக்கள் அறிவுடைமை மா நிலத்து
மன் உயிர்க்கு எல்லாம் இனிது.

விளக்கம்:

தம்மை விடத் தம் பிள்ளைகள் அறிவில் சிறந்து விளங்குவது, அப்பிள்ளைகளின் பெற்றோருக்கு மட்டுமேயன்றி, உலகில் உள்ள அனைவருக்கும் இனிமை தரக்கூடிய ஒன்றாகும்.

-------------------

பால்: இன்பத்துப்பால்

இயல்: கற்பியல்
அதிகாரம்: 125. நெஞ்சொடு கிளத்தல்
குறள் எண்: 1247

காமம் விடுவொன்றோ நாண்விடு நன்னெஞ்சே
யானோ பொறேனிவ் விரண்டு.

காமம் விடு, ஒன்றோ; நாண் விடு - நல் நெஞ்சே
யானோ பொறேன் இவ்விரண்டு.

விளக்கம்:

என் நல்ல நெஞ்சமே! காமம், நாணம் இவற்றுள் ஒன்றை விட்டுவிடு..ஒன்று காமத்தை விட்டுவிடு..அல்லது அதை வெளிப்படையாக என் காதலரிடம் கூற முடியாமல் தடுக்கும் நாணத்தை விட்டுவிடு..இரண்டும் ஒன்றுக்கொன்று மாறுபட்டவை..எனவே இரண்டையும் ஒரே சமயத்தில் பொறுத்துக்கொள்ளும் திறம் எனக்கில்லை.
------------------------

பால்: பொருட்பால்

இயல்: நட்பியல்
அதிகாரம்: 95. மருந்து
குறள் எண்: 941

மிகினுங் குறையினு நோய்செய்யு நூலோர்
வளிமுதலா லெண்ணிய மூன்று.

மிகினும் குறையினும் நோய் செய்யும் நூலோர்
வளி முதலா எண்ணிய மூன்று.

விளக்கம்:

மருத்துவக் குறிப்புகள் அடங்கிய நூல்கள் எழுதியவர்கள், வளியை முதலாகாக் கொண்டு எண்ணிய வாதம், பித்தம், சிலேட்டுமம் என்ற மூன்றும் தன் அளவில் குறைந்தாலும், மிகுந்தாலும் உடலில் நோய் ஏற்படும் என்று வலியுறுத்தியுள்ளார்கள்.

வளி - காற்று, வாதம்
பித்தம் - பித்த நீர், சூடு
சிலேட்டுமம் - கபம், குளிர்ச்சி

அரசியல் மங்காத்தா!!

2011-10-06T14:19:00.000+03:00

என்ன ஒரு பரிமாண வளர்ச்சி! டார்வின் கோட்பாடு கூறுவது உடற்கூறு தொடர்பான 'survival of the fittest'...ஆனால் நம் தற்கால..ஏன், வருங்கால அரசியலைக் கருத்தில் கொண்டால், டார்வின் கோட்பாடு உடற்கூற்றைத் தாண்டிய உளவியல் தொடர்பானதாக இருப்பது என்ன பெரிய கொடுமை.... யாரை மிதித்து யார் முன்னேறுவது..இதுவும் உளவியல் தொடர்பான survival of the fittest...

எந்த ஒரு கட்சி மீதும் நம்பிக்கையில்லை...எந்த ஒரு தலைவனுக்கும் / தலைவிக்கும் கொள்கைகளும் இல்லை..கொள்கை பெயரளவில் இருந்தாலும் அதைப் பின்பற்றுவதாக இல்லை...எதில் வேறுபட்டாலும் இதில் மட்டும் அரசியல்வாதிகளுக்குத்தான் என்ன ஒற்றுமை!

உள்ளாட்சித் தேர்தலில் தேர்ந்தெடுக்கப்பட்டவர்களாவது கொஞ்சம் மக்களுக்காக ஏதோ செய்து வந்தார்கள்..இந்த உள்ளாட்சித் தேர்தலில் நடைபெறும் அதிசயங்களைப் பார்த்தால், உள்ளூர்த் திட்டங்கள் 10 சதவிகிதமாவது நிறைவேற்றப்படுமா என்று சந்தேகிக்க வைக்கின்றன...

வாக்காளர்கள் எண்ணிக்கையோ என்று மலைக்குமளவு வேட்பாளர் எண்ணிக்கை...
தேர்தல் அதிகாரி யார் என்று தெரியாத கட்சித் தலைவர்..
கூட்டணியை அவ்வப்போது கழற்றி, மீண்டும் சேர்த்துக் கொள்ளும் சந்தர்ப்பவாதம்...
காசு வாங்கிக்கொண்டு வேட்புமனு திரும்பப் பெறும் வாங்கும் வேட்பாளர்..
தன்னையறியாமலேயே வேட்பாளராக அறிவிக்கப்பட்டதற்குக் கண்டனம் தெரிவித்து ஒரு வேட்பாளர்..
அதிக வேட்பாளர்கள் உள்ள நிலையில், வாக்கு எண்ணிக்கை சரியானதுதானா என்று நீதிமன்றத்தில் வரப்போகும் வழக்குகள்...
இன்னும் இன்னும் சொல்லிக் கொண்டே போகலாம்..

தொலைக்காட்சிச் செய்திகள் பார்ப்பாவர்கள் தொடர்கள் பார்ப்பவர்களைத் தூற்ற...

தொடர்கள் பார்ப்பவர்கள் செய்திகள் பார்ப்பவர்களைத் தூற்ற..

ஆட்சி அரசியலும் சரி..குடும்ப அரசியலும் சரி...

எதுதான் சரியாக இருக்கிறது?

சரிதான்...inky pinky ponky முறையில் யாரைத் தேர்ந்தெடுத்தாலும் என்னதான் ஆகப்போகிறது..

அரசியல் மங்காத்தா ஆட்டத்தில் மீண்டும் மீண்டும் இழப்பது மக்கள் மட்டுமே...

குறளின் குரல் - 33

2011-10-06T14:18:00.001+03:00

பால்: அறத்துப்பால்
இயல்: இல்லறவியல்
அதிகாரம்: 10. இனியவை கூறல்
குறள் எண்: 99

இன்சொ லினிதீன்றல் காண்பா னெவன்கொலோ
வன்சொல் வழங்கு வது.

இன் சொல் இனிது ஈன்றல் காண்பான், எவன்கொலோ
வன் சொல் வழங்குவது?

விளக்கம்:

பிறர் பேசும் இனிமையான சொற்கள் தமக்கு இன்பம் தருகிறது என்று அனுபவித்து அறிந்தவர், ஏன்தான் பிறரிடம் கடுமையான சொற்கள்
பேசுகின்றாரோ?
------------

பால்: அறத்துப்பால்
இயல்: இல்லறவியல்
அதிகாரம்: 16. பொறையுடைமை
குறள் எண்: 152

பொறுத்த லிறப்பினை யென்று மதனை
மறத்த லதனினு நன்று.

பொறுத்தல் இறப்பினை என்றும் அதனை
மறத்தல் அதனினும் நன்று.

விளக்கம்:

தீங்கு செய்தவரைப் பற்றி எண்ணிப் பார்க்கும்போது மூன்று நிலைகளாய் வகைப்படுத்தலாம். அவர் செய்த தீங்கை ஒறுத்தல்(தண்டித்தல்), பொறுத்தல், மறத்தல் என்ற மூன்று நிலைகள்தாம் அவை.

ஒருவர் தீங்கு செய்த போது அவரைத் தண்டிக்க முடியும்; என்றாலும் அவ்வாறு செய்யாமல் அத்தீங்கைப் பொறுத்துக்கொள்ளுதல் சிறந்தது. அத்தீங்கை அப்போதே மறந்துவிடுவது என்பது பொறுத்தலை விடச் சிறந்ததாகும்.தண்டித்தலினும் சிறந்தது பொறுத்தல்;பொறுத்தலினும் சிறந்தது மறத்தல்.
----------------

பால்: பொருட்பால்
இயல்: குடியியல்
அதிகாரம்: 108. கயமை
குறள் எண்: 1077

ஈர்ங்கை விதிரார் கயவர் கொடிறுடைக்குங்
கூன்கைய ரல்லா தவர்க்கு.

ஈர்ங் கை விதிரார், கயவர் கொடிறு உடைக்கும்
கூன் கையர் அல்லாதவர்க்கு.

விளக்கம்:

கயவர்கள், தம் கன்னத்தை உடைக்கும் அளவு வலிமையான முறுக்கி வளைந்த முரட்டுக் கரங்கள் வாய்க்காதவர்க்கு அல்லாது, வேறு எவர்க்கும் தன் எச்சிற்கையைக் கூட உதறமாட்டார்கள்.

தம் கன்னத்தை உடைத்துவிடுவார்களோ என்று அவர்கள் வலிமைக்குப் பயந்துதான் கீழ்மக்கள் ஈவர். உண்ட எச்சிற்கையில் மிஞ்சக்கூடியது சில
பருக்கைகள்தாம். அதைக்கூட ஈவதற்கு கீழ்மக்கள் விரும்பமாட்டார்கள்.

கயமை - நற்குணங்கள் ஏதுமில்லாத கீழ்மக்களின் தன்மை
கயவர் - கீழ்மக்கள்
கொடிறு - கதுப்பு, கன்னம், யானை மதச் சுவடு, குறடு, பூச நாள்
விதிர்த்தல் - உதறுதல், சிதறுதல், தெறித்தல், அஞ்சுதல், நடுங்குதல், சொரிதல், அசைத்தல்
விதிரார் - உதறமாட்டார், சிதறவிடமாட்டார்

------------

பால்: அறத்துப்பால்
இயல்: துறவறவியல்
அதிகாரம்: 25. அருளுடைமை
குறள் எண்: 241

அருட்செல்வஞ் செல்வத்துட் செல்வம் பொருட்செல்வம்
பூரியார் கண்ணும் உள.

அருட் செல்வம், செல்வத்துள் செல்வம்; பொருட் செல்வம்
பூரியார் கண்ணும் உள.

விளக்கம்:

அருளாகிய செல்வமே செல்வங்கள் அனைத்துள்ளும் சிறந்த செல்வமாகும். பொருட்செல்வம் என்பது பண்பற்ற இழிந்தவர்களிடத்தும் காணப்படும்.

ஆனால் அருளாகிய செல்வமோ மனிதப் பண்பில் உயர்ந்து சிறந்தவர்களிடம் மட்டுமே காணப்படும்.

பூரியார் - இழிந்தவர், கீழ்மக்கள், கொடியவர்
----------------

பால்: பொருட்பால்
இயல்: நட்பியல்
அதிகாரம்: 92. வரைவின் மகளிர் / வரைவு இல் மகளிர்
குறள் எண்: 919

வரைவிலா மாணிழையார் மென்றோள் புரையிலாப்
பூரியர்க ளாழு மளறு.

வரைவு இலா மாண் இழையார் மென் தோள் புரை இலாப்
பூரியர்கள் ஆழும் அளறு.

விளக்கம்:

எந்தவிதப் பாகுபாடும், வரையறையும் இல்லாது, மாட்சிமை கருதாது, பொருள் கொடுப்பவர்க்கெல்லாம் தம் அழகை விற்கும் அழகிய அணிமணிகளைப் பூண்ட இளம் மகளிரின் மெல்லிய தோள்கள், உயர்வில்லாத இழிந்த கீழ்மக்கள் ஆழ்ந்து மூழ்கும் சேறாகும் / நரகமாகும்.

வரைவு - திருமணம், எல்லை, பிரிவு, அளவு, எழுதுதல்

திருமணம் என்ற பந்தம் ஒருவருக்கே உரியோர் என வரம்பு / எல்லை வகுத்துக் கொள்வதால் வரைவு எனப்படும். அத்தகைய வரைவு
வகுத்துக்கொள்ளாமல், பொருள் தருபவர்களுக்கெல்லாம் பயன்படும் பாலியல் தொழிலில் ஈடுபடும் மகளிரை வரைவு இல்லாத மகளிர் என்பர்.

மாண்- மாட்சிமை, மடங்கு, மாணவன், பிரமசாரி

இழை - அணிகலன், கையில் கட்டும் காப்பு, நூல், நூலிழை

புரை - உயர்ச்சி, பெருமை,குற்றம், குரல் வளை, விளக்கு மாடம், உள்ளோடும் புண், பூமி, கண் நோய் வகை, பொய், களவு, மடிப்பு, கூறுபாடு, ஆசிரமம்,
வீடு, தேவாலயம், அறை, மாட்டுத்தொழுவம், பழைமை, ஒப்பு

பூரியர் - கீழ்மக்கள், இழிந்தவர், கொடியவர்

ஆழும் - அமிழும், மூழ்கும்

அளறு - குழை சேறு, நரகம், குழம்பு நீர்
----------------------------

பால்: பொருட்பால்
இயல்: கூழியல்
அதிகாரம்: 76. பொருள் செயல் வகை
குறள் எண்: 751

பொருளல் லவரைப் பொருளாகச் செய்யும்
பொருளல்ல தில்லை பொருள்.

பொருள் அல்லவரைப் பொருளாகச் செய்யும்
பொருள் அல்லது, இல்லை பொருள்.

விளக்கம்:

ஒரு பொருளாகக் கூடப் பிறரால் மதிக்கப்படாதவர் இருப்பர்; அவரின் தகுதியையும், பிறர் மதிக்கத்தக்கவராய் மாற்றிக் கொடுக்கக் கூடியது
பொருட்செல்வம் மட்டுமே. இப்படிப்பட்டவரையும் உயர்த்திக் காட்டும் பொருட்செல்வத்தைத் தவிர, ஒருவனுக்குச் சிறந்த பொருள் என்று சொல்லிக் கொள்ளக்கூடியது வேறேதுவும் இல்லை. இவ்வாறு பொருட்செல்வத்தின் முக்கியத்துவம் வலியுறுத்தப்படுகிறது.

தகுதியற்றவரையும் தகுதியுடையவராக்கிக் காட்டுவது அவரிடம் உள்ள பணமேயன்றி வேறெதுவும் இல்லை.

குறளின் குரல் - 32

2011-10-06T14:18:00.000+03:00

பால்: பொருட்பால்
இயல்: நட்பியல்
அதிகாரம்: 94. சூது
குறள் எண்: 936

அகடாரா ரல்ல லுழப்பர்சூ தென்னு
முகடியான் மூடப்பட் டார்.

அகடு ஆரார் அல்லல் உழப்பர் சூது என்னும்
முகடியான் மூடப்பட் டார்.

விளக்கம்:

சூது என்னும் தீயசக்தியால் ஆட்கொள்ளப்பட்டவர், வயிறு நிறைய உணவு உண்ணும் வாய்ப்பின்றி வறுமைப்பட்டு, எல்லாத் துன்பங்களுக்கும் ஆளாகி
வருந்துவர்.

இக்குறளுக்கு உரை சொல்ல வந்த பலரும் முகடி - மூதேவி என்றே கூறுகின்றனர். வள்ளுவம் இறைவனைப் பற்றிப் பேசுகிறது / பேசுவதில்லை என்ற வாதம் வருகையில் இக்குறளில் வரும் முகடி என்ற வார்த்தையும் சர்ச்சைக்குள்ளாகிறது.

இவ்விளக்கத்தில் முகடி என்னும் பதத்துக்குத் தீயசக்தி என்று பொருள் கொள்ளப்பட்டுள்ளது.

அகடு - வயிறு, உள், நடு, மேடு, நடுவு நிலை, பொல்லாங்கு
முகடி- முகட்டுத்தரத்தில் / மேல்கூரையில் உள்ள பேய், மூதேவி
---------
பால்: பொருட்பால்
இயல்: அமைச்சியல்
அதிகாரம்: 71. குறிப்பறிதல்
குறள் எண்: 707

முகத்தின் முதுக்குறைந்த துண்டோ வுவப்பினுங்
காயினுந் தான்முந் துறும்.

முகத்தின் முதுக்குறைந்தது உண்டோ உவப்பினும்
காயினும் தான் முந்துறும்?

விளக்கம்:

ஒருவர் மனதில் மகிழ்ச்சியுறும்/விருப்புறும் போதும், சினமுறும்/வெறுப்புறும் போதும், அவ்வுணர்ச்சிய அவருடைய முகம் முந்திக் கொண்டு காட்டி விடுகிறது. அப்படி முன்னறிந்து சொல்லவல்ல முகத்தை விடப் பேரறிவும், அனுபவ அறிவும் வாய்ந்தது வேறேதுவும் உண்டோ?

முதுக்குறை - பேரறிவு, அனுபவம் பெறுதல், பூப்படைதல், பேதைமை
----------------

பால்: அறத்துப்பால்
இயல்: இல்லறவியல்
அதிகாரம்: 17. அழுக்காறாமை
குறள் எண்: 165

அழுக்கா றுடையார்க் கதுசாலு மொன்னார்
வழுக்கியுங் கேடீன் பது.

அழுக்காறு உடையார்க்கு அது சாலும் - ஒன்னார்
வழுக்கியும் கேடு ஈன்பது.

விளக்கம்:

பொறாமை குணம் உடையவர்க்குத் துன்பம் விளைவிக்க அந்தக் குணம் ஒன்றே போதுமானது. அவர்க்குத் துன்பம் தர வேறு பகைவர்கள் யாரும்
தேவையில்லை. பகைவர் தீங்கு செய்யத் தவறினாலும் கூட, அப்பொறாமை, அதனை உடையவர்களுக்கே முதலில் தீங்கு விளைவிக்கும்.

அழுக்காறு - பொறாமை
சாலும் - போதும்
ஒன்னார் - பகைவர்
வழுக்கு - கேடு, தோல்வி, சறுக்குகை, மறதி, தவறு, வழுவழுப்பானது
---------------

பால்: அறத்துப்பால்
இயல்: இல்லறவியல்
அதிகாரம்: 05. இல்வாழ்க்கை
குறள் எண்: 46

அறத்தாற்றி னில்வாழ்க்கை யாற்றிற் புறத்தாற்றிற்
போஒய்ப் பெறுவ தெவன்.

அறத்து ஆற்றின் இல்வாழ்க்கை ஆற்றின், புறத்து ஆற்றில்
போஒய்ப் பெறுவது எவன்?

விளக்கம்:

ஒருவன் இல்லற வாழ்க்கையை அதற்குரிய இயல்புகளோடு முறைப்படி நடத்தி வாழ்ந்து வந்தால், இல்லறத்திற்கு மாறான வேறு வழிகளில் போய்
அடையும் பயன் தான் என்ன? ஒன்றுமில்லை.

அறநெறி கூடிய இல்வாழ்க்கையால் பெறும் பயனை, வேறு எந்த வாழ்க்கை நெறியாலும் அடைந்திட இயலாது.

போஒய் - போய் என்பதன் அளபெடை; ஏளனக் குறிப்பாக வந்துள்ளது.
----------------

பால்: இன்பத்துப்பால்
இயல்: கற்பியல்
அதிகாரம்: 133. ஊடல் உவகை
குறள் எண்: 1326

உணலினு முண்ட தறலினிது காமம்
புணர்தலி னூட லினிது.

உணலினும் உண்டது அறல் இனிது; காமம்
புணர்தலின் ஊடல் இனிது.

விளக்கம்:

உணவு, மேலும் மேலும் உண்பதை விட, உண்டது செரிப்பது இனியதாகும். அது போல், காமத்தில் கூடியிருப்பதைக் காட்டிலும், இடையிடையே
ஊடலில் பிரிந்து நிற்பது மேலும் மேலும் காதலை வளர்த்து இன்பம் தருவதாகும்.

செரித்தபின் உண்டாகும் பசி, உணவின் இன்சுவை அதிகரிக்கும். ஊடலின்பின் வரும் கூடல் காதலின் சுவை அதிகரிக்கும்.

அறல் - இல்லாமல் போதல், கருமணல், நீர், நெறி, அறுதல், திருமணம், விழா
-----------------

பால்: பொருட்பால்
இயல்: குடியியல்
அதிகாரம்: 106. இரவு (கேட்டுப்பெறுதல் / பிச்சை)
குறள் எண்: 1060

இரப்பான் வெகுளாமை வேண்டும் நிரப்பிடும்பை
தானேயுஞ் சாலுங் கரி.

இரப்பான் வெகுளாமை வேண்டும்; நிரப்பு இடும்பை
தானேயும் சாலும் கரி.

விளக்கம்:

பொருள் வேண்டிப் பிறரிடம் இரந்து நிற்பவன் பொருள் கிடைக்கவில்லையே என்று கோபப்படுதல் கூடாது. வேண்டிய போதெல்லாம் பொருள் கிடைக்காது; செல்வம் தேவையான சமயத்தில் உதவாது என்பதற்கு அவனது வறுமைத் துன்பம் ஒன்றே போதுமான சான்றாகும்.

கரி - சான்று, சாட்சியம், யானை, நஞ்சு, மிளகு, அடுப்புக்கரி, நிலக்கரி, கரிந்தது, பெண் கழுதை, மரவைரம், விருந்தினன், பயிர் தீய்தல்

தங்க நிமிடங்கள்

2011-08-24T17:15:00.001+03:00

காதல் கைகளின்

உயிர் தொடும் ஸ்பரிசம்

குழந்தைக்காய்த் தாய் மார்
பால் சுரக்கும் தருணம்

உலகத்து இயற்கையின்

மொத்த அழகும்
உச்சி முதல் பாதம்வரை
இட்டுச் செல்லும் பட்டு முத்தம்

வாழ்வின் சுகங்கள்

வழித்துத் தரும் வரம்

வாழ்வின் சோகங்கள்
துடைத்து எறியும் தவம்

சத்த யுத்தத்தின் இடையே
மௌன மோன மயான அமைதி....

சுகமோ சுகம்

இதமோ இதம்

குற்றாலச் சாரலில்

நனையும் தங்க நிமிடங்கள்..

கல்மலைச் சுவடுகள்

2011-08-01T21:51:00.002+03:00

இல்லறக் கனவுகள்

உன்னோடு மரிக்க
வீட்டு உறவுகள்
என்னோடு வசிக்க

பெண்பிள்ளையை உன் பெயரில் விளிக்க
கொண்டவளுடன் வாழ்க்கையது நடக்க

நம் காதல் பேசிய இடங்களுக்கு
என் குடும்பத்துடன் போகையில்

சோலைகள் கதை சொல்லிட
கோவில்தூண்கள் கோபம் கொண்டிட
பேருந்து இருக்கைகள் இழப்பை இகழ்ந்திட
திரையரங்குகள் தீண்டல்கள் பேசிட...

அலைமணல் சுவடுகளாய்
அழிந்தே போயின
என்றெண்ணிய நினைவுகள்

மீண்டு வந்தன
மீண்டும் வந்தன

காலத்தால் அழியாத

கல்மலைச் சுவடுகளாய்..

'நான் பேச நினைப்பதெல்லாம்
நீ பேச வேண்டும்'
என்றவளே!

இச்சுவடுகள்
மீட்டெடுத்த சுமைகள்
யாரிடம் பேசுவேன்?

உனக்கென்று ஒரு கணவன்
எனக்கென்று ஒரு மனைவி
என்றான பின்..

நீ அன்று
பேச நினைத்ததைப்
பேச முடியாதவன்..
நீ இன்று
பேசாதது கூடப்
பேசுகின்றேன்..

எங்கேயோ இருக்கும்
நீயும் கூட
நான் பேசுவதைத்தான்
நினைக்கின்றாயோ?

குறளின் குரல் - 31

2011-08-01T21:50:00.000+03:00

பால்: அறத்துப்பால்

இயல்: இல்லறவியல்
அதிகாரம்: 21. தீவினையச்சம்

குறள் எண்: 208

தீயவை செய்தார் கெடுத னிழறன்னை

வீயா தடியுறைந் தற்று.

தீயவை செய்தார் கெடுதல் நிழல் தன்னை

வீயாது அடி உறைந்து அற்று.

விளக்கம்:

தீய செயல்களைச் செய்தவர் அதன் விளைவுகளில் இருந்து தப்பிக்க இயலாது. ஒருவன் மேற்கொண்ட தீய செயல்களால், அவனுக்கு நேரவிருக்கும் துன்பங்களில் இருந்து அவன் தப்பிக்கவே இயலாது.

இது எத்தகையது என்றால், ஒருவன் தன் நிழல் அவன் பாதங்களின் கீழேயே எப்போதும் தங்கும் தன்மையுடையது. அப்படி அவன் பாதங்களின் கீழ் உறையும் நிழல், சமயம் வரும்போதெல்லாம் தவறாமல் வெளிப்பட்டே தீரும்.

நிழல் பாதத்தின் அடியே மறையாது தங்கியிருப்பது போல, தீய செயலால் வரும் துன்பங்களும் விலகாது கூடவே வரும். சமயம் வரும்போது வெளிப்படும் நிழல் போல, தக்க சமயத்தில் தவிர்க்க முடியாத துன்பங்கள் தவறாமல் வந்து சேரும்.

வீயாது - தவறாது, விலகாது, விடாது

---------------------

பால்: பொருட்பால்

இயல்: அரசியல்
அதிகாரம்: 61. மடியின்மை

குறள் எண்: 604

குடிமடிந்து குற்றம் பெருகு மடிமடிந்து
மாண்ட வுஞற்றி லவர்க்கு.

குடி மடிந்து குற்றம் பெருகும் மடி மடிந்து

மாண்ட உஞற்று இல் அவர்க்கு.

விளக்கம்:

சோம்பலில் திளைத்து மூழ்குவதால், ஒருவர் வாழ்க்கையில் முயற்சி செய்யும் தன்மை குன்றிப் போகும். இதனால் சிறப்பு / மாட்சிமை தரக்கூடிய உழைப்பினையும் ஒருவர் கைவிட நேரிடும். இந்த நிலையில், அவர் குடியும் அழிந்து போகும்; குற்றங்களும் பெருகிப்போகும்.

மடி - சோம்பல்

மாண்ட - மாட்சிமை பொருந்திய, இறந்த

உஞற்று - முயற்சி, ஊக்கம், வழக்கு, தூண்டு, தவறு, முயற்சி செய்

---------------------

பால்: அறத்துப்பால்

இயல்: இல்லறவியல்

அதிகாரம்: 10. இனியவை கூறல்

குறள் எண்: 92

அகனமர்ந் தீதலி னன்றே முகனமர்ந்
தின்சொல னாகப் பெறின்.

அகன் அமர்ந்து ஈதலின் நன்றே முகன் அமர்ந்து

இன்சொலன் ஆகப் பெறின்.

விளக்கம்:

மனம் மகிழ்ந்து ஒருவருக்குப் பொருளை ஈவது நல்லதா? முகம் மலர்ந்து ஒருவரிடம் இன்சொல் பேசுவது நல்லதா?

பிறர்க்கு ஈவது என்பது தம்மிடம் இருக்கும் பொருளின் அளவைப் பொறுத்தே அமையக் கூடிய ஒரு சிறப்பாகும். பொருளின் இருப்பைப் பொறுத்து ஈயும் தன்மை மற்றும் அளவு, சூழலுக்கேற்றாற் போல மாறக் கூடும்.

ஆனால், இன்சொல் என்பது எப்போதும் ஒருவரிடம் இயல்பாய் இருக்க வேண்டிய தன்மையாகும். இது எந்த நிலையிலும் மாறாத இயல்புடன் விளங்கும். எப்போதும் குன்றி விடாமல், இன்சொல் பேசும் தன்மை நிறைந்து இருக்கும்படி பார்த்துக் கொள்வது சிறப்பு.
எனவே இன்சொல் பேசுவது, ஈவதைக் காட்டிலும் சிறந்ததாகும்.

--------------------

பால்: இன்பத்துப்பால்

இயல்: கற்பியல்
அதிகாரம்: 126. நிறையழிதல்

குறள் எண்: 1256

செற்றவர் பின்சேறல் வேண்டி யளித்தரோ
வெற்றென்னை யுற்ற துயர்.

செற்றவர் பின் சேறல் வேண்டி அளித்து அரோ

எற்று என்னை உற்ற துயர்?

விளக்கம்:

என் மனதுக்கு நெருக்கமானவர் என்னை பிரிந்து சென்ற பின்னும், அவர் பின் செல்ல விரும்புகிறது என் நெஞ்சம். என்னை வாட்டுகிறது இந்தப் பிரிவுத் துயர். இந்தத் துயரம் எத்தன்மையது? அந்தோ! மிகக் கொடியது. இரங்கத்தக்கது.

நிறையழிதல் - மனதின் இரகசியம் மறைத்து அலை பாயும் மனதை ஒரு நிலைப்படுத்துவது நிறை; பிரிவாற்றாமையால் மனதை நிலைப்படுத்தமுடியாமல், வெளிப்படையாகப் பேசுவது நிறையழிதல்.

எற்று - எத்தன்மையது
அரோ - அசைச்சொல்
சேறல் - செல்லுதல்
செற்று - நெருக்கம்; செற்றவர் - நெருங்கியவர்
----------------------------

பால்: அறத்துப்பால்

இயல்: ஊழ் இயல்
அதிகாரம்: 36. ஊழ்

குறள் எண்: 376

பரியினு மாகாவாம் பாலல்ல வுய்த்துச்
சொரியினும் போகா, தம.

பரியினும் ஆகாவாம், பால் அல்ல; உய்த்துச்

சொரியினும் போகா தம.

விளக்கம்:

ஒருவன் தனக்கு உரிமையில்லாதவற்றை எவ்வளவுதான் போற்றிப் பாதுகாத்தாலும், ஊழ் / விதி என்பதன் காரணமாக, அப்பொருள் அவனிடம் தங்காமல் போய்விடும். தனக்கு உரிமையானவற்றை வேண்டாம் என்று ஒதுக்கித் தள்ளினாலும், ஊழ் / விதி காரணமாய் அவை உரியவரை நீங்கிப் போகாது.
--------------

பால்: பொருட்பால்

இயல்: அரசியல்
அதிகாரம்: 41. கல்லாமை

குறள் எண்: 407

நுண்மா னுழைபுல மில்லா னெழினல
மண்மாண் புனைபாவை யற்று.

நுண் மான் நுழை புலம் இல்லான் எழில் நலம்

மண் மான் புனை பாவை அற்று.

விளக்கம்:

நுண்மை மற்றும் மாட்சிமை பொருந்திய பல நூல்களை ஆராய்ந்து கற்காதவனின் புறத்தோற்றம் வேண்டுமானால் அழகாக இருக்கக் கூடும். ஆனால் அகத்துக்கு அழகு தரும் கல்வி ஒளி பெறாத அவன், அழகான வண்ணம் தீட்டப்பெற்ற மண் பொம்மைக்கு ஒப்பானவன்.

அழகிய வண்ணங்கள் அணி சேர்த்தாலும், மண் பொம்மைக்கு உயிரோட்டம் வாய்க்காது. அதே போல் கல்வி என்னும் உள்ளொளி இல்லாதவனின் எழிலான புறத்தோற்றமும் ஆளுமை தராது.

நுழை - புத்திநுட்பம், நுண்மை, பலகணி, குகை, துளை, சிறுவழி

புலம் - அறிவு, நூல், வயல், இடம், திக்கு, பொறி, துப்பு, வேதம்

பாவை - பொம்மை, பதுமை, அழகிய உருவம், கருவிழி, பெண், குரவ மலர், நோன்பு வகை, திருப்பாவை திருவெம்பாவை பாடல்கள், இஞ்சிக்கிழங்கு, மதில்

நான் அறிந்த சிலம்பு - 10

2011-07-31T20:25:00.002+03:00

புகார்க்காண்டம் - 2: மனையறம் படுத்த காதை

கண்ணகியும் கோவலனும் இணைந்து இன்புற்றிருத்தல்

வண்டுகள் சுவைக்கும்
வாசனைப் பூம்படுக்கையில்
சென்றமர்ந்தனர்
கண்ணகியும் கோவலனும்.

கோவலன் அவனும்
கண்ணகியவளின்
பெரிய தோள்களில்
வரிக்கோலமாய் எழுதினான்
கரும்பையும் வல்லிக்கொடியையும்...

எத்தகையது அக்காட்சி?
முதிர்ந்த கடல் கொண்ட
உலகம் முழுதையும்
தம் கதிர்களால் ஒளியேற்றும்
கதிரவனும் வெண்மதியும்
ஒருசேர இருந்த
காட்சியை ஒத்திருந்தது..

கண்ணகி சூடியிருந்த
மலர்மாலையில் இருந்த
நிலவையொத்த
வெண்மல்லிகைப்பூக்கள்
வண்டுகளின் பாடல்

செவிமடுத்து

மொட்டவிழ்ந்து திறந்தன...

கோவலன் சூடியிருந்த

மாலையில் இருந்தன

இதழ்முறியாத
செங்கழுநீர்ப்பூக்கள்...

மல்லிகைமாலையும்

செங்கழுநீர்த்தாரும்
கலந்து முயங்கின..

செயலற்ற நிலையில்
கலந்து மகிழ்ந்தனர் தம்பதியர்..

தீராத காதலுடன்
கண்ணகியின் திருமுகம் நோக்கிய
கோவலன் தானும்
முன் எப்போதும்
சொல்லப்பட்டிராத
பொருள்நிறை உரையுடன்

கண்ணகி நலம் பாராட்டத் தொடங்கினான்..

கோவலன் கண்ணகியின் நலம்பாராட்டுதல்

தேவர்கள் போற்றும்
சிவன் தான்
சூட்டிய பெருமைக்குரியது
அழகிய இளம்பிறை நிலவது..
உன்னுடன் பிறந்த பிறப்பு என்பதால்
பெருமான் தந்தானோ உனக்கு
அப்பிறையை நெற்றியாக?

போர்க்களத்தில் தம்மை
எதிர்க்கும் பகைவர்க்கும்
படைக்கலன்கள் வழங்கிப்
போர் புரியச் சொல்லும் பண்புண்டு.
அதைப்போலவே
மன்மதன் தானும்
தம் பெரிய கரும்புவில்லை

இரண்டாகப் பிளந்து தந்தானோ

உன் இருபுருவங்களாக?

தேவருண்ணும்
அமிழ்தின் முன்னே பிறந்த

இலக்குமியானவள் நீ என்பதால்

தேவர் கோமான்

இந்திரன் தானும்
வச்சிரப்படையைத் தந்தானோ

உன் அழகிய இடையாக?

ஆறுமுகம் கொண்ட
முருகன் தான்
உனக்குத் தரும்
உரிமையைப் பெற்றிலன்
என்ற போதும்

உன்னைக் கண்டு நான்

துன்புற வேண்டுமென்று

தன் சுடர்நெடு வேல்தனைத் தந்தானோ

கடை சிவந்து

குளிர்ச்சி பொருந்தி நிற்கும்

நின் இரு கண்களாக?

சிலம்பின் வரிகள் 28 - 35 இங்கே..

சிலம்பின் வரிகள் 36 - 52 இங்கே..

குறளின் குரல் - 30

2011-07-31T20:24:00.000+03:00

பால்: பொருட்பால்
இயல்: குடியியல்
அதிகாரம்: 96. குடிமை
குறள் எண்: 957

குடிபிறந்தார் கண்விளங்குங் குற்றம் விசும்பின்
மதிக்கண் மறுப்போ லுயர்ந்து.

குடிப்பிறந்தார்கண் விளங்கும் குற்றம், விசும்பின்
மதிக்கண் மறுப்போல் உயர்ந்து.

விளக்கம்:

நற்குடியில் பிறந்தவரிடம் சிறு குற்றம் கூட இருக்கக் கூடாது. ஆகாயத்தில் இருக்கும் நிலவில் இருப்பது சிறு களங்கம்தான் என்றாலும், அது பலரும் அறியும் வண்ணம் மிகவும் வெளிப்படையாகத் தெரியும். அதே போல், நற்குடியில் பிறந்தவரிடம் இருக்கும் சிறு குற்றமும் பலராலும் அறியப்பட்டுப் பெரிதாகத் தோன்றும்.

விசும்பு - வானம், தேவலோகம், மேகம், செருக்கு, வீம்பு, திசை
மறு - களங்கம், குற்றம், தீமை, அடையாளம், மச்சம்
--------------------

பால்: பொருட்பால்
இயல்: நட்பியல்
அதிகாரம்: 88. பகைத்திறம் தெரிதல்
குறள் எண்: 875

தன்றுணை யின்றாற் பகையிரண்டாற் றானொருவ
னின்றுணையாக் கொள்கவற்றி னொன்று.

தன் துணை இன்றால்; பகை இரண்டால்; தான் ஒருவன்
இன் துணையாக் கொள்க, அவற்றின் ஒன்று.

விளக்கம்:

துணைக்கு ஒருவரும் இன்றித் தனித்து நிற்கும் ஒருவனுக்குப் பகையோ இரண்டாக உள்ளது. அந்நிலையில் அப்பகைவருள் ஒருவரைத் தன் இனிமையான துணையாக மாற்றிக் கொள்ள வேண்டிய திறம் ஓர் ஆட்சியாளருக்கு இருக்க வேண்டும்.
-----------------------

பால்: அறத்துப்பால்
இயல்: இல்லறவியல்
அதிகாரம்: 12. நடுவுநிலைமை
குறள் எண்: 111

தகுதி யெனவொன்று நன்றே பகுதியாற்
பாற்பட் டொழுகப் பெறின்.

தகுதி என ஒன்று நன்றே - பகுதியான
பாற்பட்டு ஒழுகப்பெறின்.

விளக்கம்:

நட்பு, பகைமை என்று பேதம் பார்க்காமல், வேண்டியவர் வேண்டாதவர் என்று ஒரு பகுதியின் பால் சார்ந்து நிற்காமல், அவரவர்க்குரிய முறைமைப்படி நடந்து கொள்வதே நல்லறமான நடுவுநிலைமை என்னும் தகுதியாகும்.
---------------------------

பால்: இன்பத்துப்பால்
இயல்: களவியல்
அதிகாரம்: 109. தகையணங்குறுத்தல்
குறள் எண்: 1082

நோக்கினா ணோக்கெதிர் நோக்குத றாக்கணங்கு
தனைக்கொண் டன்ன துடைத்து.

நோக்கினான் நோக்கு எதிர் நோக்குதல் - தாக்கு அணங்கு
தானைக் கொண்டன்னது உடைத்து.

விளக்கம்:

அவளை நான் பார்க்கும்போது எதிர்ப்பார்வை பார்க்கிறாள் அவள். இயல்பாகப் பார்க்கும் போதே தன் பார்வையால் வருத்தக்கூடிய ஒரு பெண் எதிர்ப்பார்வை பார்ப்பது, தான் மட்டும் வராமல் தன்னுடன் ஒரு பெரும்படையைச் சேர்த்துக் கொண்டு வந்து தெய்வப்பெண்ணொருத்தி தாக்குவதைப் போல் உள்ளது.

அணங்கு - தெய்வப்பெண், பத்திரகாளி, தேவர்க்கு ஆடும் கூத்து, அழகு,
அச்சம், விருப்பம், மயக்க நோய், வருத்தம், கொலை, கொல்லிப்ப்பாவை, பெண்

தகை - அழகு

அணங்குறுத்தல் - காதல் துன்பத்தை உண்டாக்குதல்
------------------

பால்: அறத்துப்பால்
இயல்: இல்லறவியல்
அதிகாரம்: 24. புகழ்
குறள் எண்: 239

வசையிலா வண்பயன் குன்று மிசையிலா
யாக்கை பொறுத்த நிலம்.

வசை இலா வண் பயன் குன்றும் இசை இலா
யாக்கை பொறுத்த நிலம்.

விளக்கம்:

நல்ல விளைச்சல் தரும் நிலமே பயன் தருவதில் சிறந்ததாகும். அத்தகைய நிலம், புகழ் இல்லாமல் வாழ்பவரின் உடலைச் சுமக்கும் போது, வசைகள் குற்றங்கள் இல்லாதது என்ற தன் புகழில் இருந்து குறைந்து போகும். நல்ல புகழ்வாய்ந்தவர்கள் வாழும் நிலத்தில் மட்டுமே விளைச்சலின் பலன் அதிகமாக இருக்கும் என்ற செய்தியும் குறிப்பால் உணர்த்தப்படுகிறது.
------------------------------

பால்: பொருட்பால்
இயல்: அமைச்சியல்
அதிகாரம்: 73. அவையஞ்சாமை
குறள் எண்: 727

பகையகத்துப் பேடிகை யொள்வா ளவையகத்
தஞ்சு மவன்கற்ற நூல்.

பகையகத்துப் பேடி கை ஒள் வாள் அவையகத்து
அஞ்சுமவன் கற்ற நூல்.

விளக்கம்:

போர்க்களத்தில் பகைவரின் நடுவில் நின்றிருக்கும், மனதில் துணிவற்ற கோழையின் கையில் ஒளி பொருந்திய வாள் இருந்தாலும், அவன் வீரன் இல்லை என்பதால் அந்த வாளால் ஒரு பயனும் இல்லை.

அதே போல் ஒருவன் எவ்வளவுதான் சிறந்த நூல்களைக் கற்றிருந்தாலும், பலரும் கூடியிருக்கும் அவைக்கு நடுவில் தான் கற்றவற்றைச் சொல்லத் துணிவில்லாமல் அஞ்சினான் என்றால், அந்த நூல் தந்த கல்வியால் யாதொரு பயனும் இல்லை.

இரண்டுமே பிறரின் நகைப்புக்கு வழிவகுக்குமேயன்றி ஒரு பயனையும் தருவதற்கு வாய்ப்பில்லை.

மறைமலையடிகளாரை நினைவுகூர்ந்த போது..

2011-07-10T14:21:00.002+03:00

கடந்த வெள்ளியன்று ரியாத்தில் வளைகுடாச் செந்தமிழ்ச் சங்கத்தின் சார்பாக மறைமலையடிகளார் விழா நடந்தேறியது. அப்போது, மறைமலையடியகளார் குறித்த என்னுரை..

வாழ்க்கையில் ஏற்படும் தேவைகளைப் பல வகைகளாகப் பிரிக்கலாம். அவற்றுள் முக்கியமானவை இரண்டு - அவை சமுதாயத் தேவைகள், தனி நபரின் தேவைகள்...தேவைகளுக்கும் வரலாறு என்பதற்கும் தொடர்பு உண்டு..நேற்று, இன்று, நாளை என்ற சுழற்சியே காலத்தின் சுழற்சி..நேற்று என்பது வரலாறு..இன்று என்பது நடைமுறை..நாளை என்பது நேற்றும் இன்றும் கூடி நிர்ணயிப்பது...

நேற்று முடிந்துவிட்டதே..அந்த வரலாறு..அது ஏன் முக்கியத்துவம் பெறுகிறது? தனிநபர் தேவைக்கும் வரலாற்றுக்கும் தொடர்புண்டு...சான்றாக, தேர்வில் குறைந்த மதிப்பெண் வாங்கும் மாணவனைத் தந்தையார் திட்ட, 'இவர் வாங்கிய மதிப்பெண் மட்டும் அதிகமோ? இவர் என்ன மருத்துவராகவா இன்று இருக்கிறார்'? என்று பிள்ளை நினைக்க...இது தந்தை குறித்த வரலாறு...அது அந்தக் குடும்பம் மட்டுமே கருத வேண்டிய..அல்லது கருத வேண்டாத ஒரு நிகழ்வு..

ஆனால் சமுதாயத் தேவைகளைக் கருத்தில் கொண்டு நாம் காணவேண்டிய, புரட்டிப் பார்க்க வேண்டிய, பெருமைப்பட வேண்டிய வரலாறுகள் சில என்றென்றும் உயிரோட்டமானவை. மொழி அதன் வளர்ச்சி, மாற்றம், வளர்சிதை மாற்றம்..இப்படியாகப் பல பிரிவுகள்... மொழி என்பது தனி நபரின் சொத்தல்ல; அது பலரின் பொது உடைமை; உரிமை...மொழி என்பது சமுதாய நோக்கில் காணப்பட வேண்டிய, பாதுகாக்கப்பட வேண்டிய ஒரு வரலாறு..

மொழி என்பது ஒருவருடன் தொடர்பு கொள்ள ஏதுவாக இருக்கட்டும் என்ற காரணத்தினால் உருவான ஒன்று மட்டுமல்ல; ஒரு முகவரியாக, ஓர் அடையாளமாக விளங்குவது மொழி...சங்க காலத்தில் வழங்கப்பட்டது தூய தமிழ்மொழி...அத்தகைய தமிழ்மொழி பிறமொழிக் கலப்பால் சிதைந்த போது..அது எந்த வளர்ச்சிக்கும் வழி காட்டாமல் உள்ள மொழியை, அதன் சிறப்பைக் குழி தோண்டிப் புதைக்கும் வண்ணம் அந்த மொழிக் கலவை அமைந்த போது...அம்மொழியைக் காக்கும் உணர்வின் உறுதியால் தனித் தமிழ் இயக்கம் ஆரம்பித்துப் போராட வேண்டிய நிலைமைக்குத் தள்ளப்பட்டது நம் மொழி..

தமிழுடன் சமக்கிருத மொழியைக் கலந்து பேசிய மணிப்பிரவாள நடை கொடிகட்டிப் பறக்க..தமிழ் வார்த்தைகள் மெல்ல மெல்லச் சிதைந்து...வேற்று மொழிச் சொற்கள் தமிழ் வார்த்தைகளின் இடத்தை ஆக்கிரமித்துக் கொண்ட போது..நிலைமையைச் சரிப்படுத்த முனைந்த பலருள் மிகவும் முக்கியமானவர், மறைமலை அடிகளார்.

மறைமலை அடிகளின் இயற்பெயர் வேதாசலம். இவர் 1876 சூலை 15 ஆம் நாள் திருக்கழுக்குன்றத்திலே பிறந்தார். 1950 ஆம் செப்டம்பர் 15 ஆம் நாளில் மறைந்தார். இவர் தந்தையார் சொக்கநாதர், தாயார் சின்னம்மையார். இவரது இயர்பெயர் வேதாசலம். பின்னர்த் தனித்தமிழ்ப்பற்று காரணமாக 1916-ல் தம் பெயரை மறைமலை என்று மாற்றிக்கொண்டார்.

மறைமலைஅடிகள், நாகையில் நான்காம் படிவம் வரை படித்தார். அவருடைய தந்தையாரின் மறைவு காரணமாக அவரால் பள்ளிப்படிப்பைத் தொடர முடியவில்லை. ஆனால், தமிழ்ப்புலமை மிகுந்த நாராயணசாமி பிள்ளை என்பவரிடம் தமிழ் கற்றார்.சோமசுந்தர நாயக்கரிடம் சைவ சித்தாந்தம் கற்றார்.

சென்னைக்கு வந்த பின்னர்க் கிறித்தவக் கல்லூரியில் வீ.கோ.சூரியநாராயண சாத்திரியாருடன் தமிழாசிரியராகப் பணிபுரிந்தார். பல ஆண்டுகள் பேராசிரியராகப் பணியாற்றியபின், பல்லாவரத்தில் இராமலிங்கரின் கொள்கைப்படி 1905 இல் சைவ சித்தாந்த மகா சமாசம் என்ற அமைப்பைத் தோற்றுவித்தார். அதன் மாநாட்டுத் தலைமையையும் ஏற்றார். திருமுருகன் அச்சுக்கூடத்தை ஏற்படுத்திப் பல நூல்களை வெளியிட்டார். மணிமொழி நூல்நிலையம் என்னும் நூல்நிலையத்தை உருவாக்கினார்.

தமிழையும் வடமொழியையும் ஆங்கிலத்தையும் நன்கு கற்றவர். தமிழை, வடமொழிக்கலப்பின்றித் தூய நடையில் எழுதிப் பிறரையும் ஊக்குவித்தவர். சிறப்பாக தனித்தமிழ் இயக்கத்தைத் தொடங்கித் தமிழைச் செழுமையாக வளர்த்தவர். பரிதிமாற் கலைஞரும் மறைமலை அடிகளும் தனித்தமிழ் இயக்கத்தின் இரு பெரும் முன்னோடித் தலைவர்கள்.

செய்யுள், புதினம், நாடகம், கட்டுரை, மொழிபெயர்ப்பு, ஆராய்ச்சி போன்ற பல துறைகளிலும் அடிகளார் நூல்களைப் படைத்துள்ளார். தமிழ், தமிழர் வாழ்வு, உணவுமுறை, இலக்கிய ஆய்வு, வாழ்வியல், மறைப்பொருள் ஆய்வு, சைவ சித்தாந்த நெறிமுறைகள்..இவற்றைக் கருப்பொருளாகக் கொண்டு இவர் இயற்றிய நூல்கள் இன்றும் பெரும்புகழோடு விளங்குகின்றன.

தனித்தமிழ் இயக்கம் தோற்றுவிக்க வேண்டும் என்ற எண்ணம் இவர் மனதில் தோன்றியதற்கு முக்கிய காரணம் இவருடைய மகள் நீலாம்பிகை அம்மையார்.

ஒரு நாள் தோட்டத்தில் அவர் நீலாம்பிகையுடன் நடந்து கொண்டிருந்தார். தமிழ்ப் பாடல்களை இசைக்கவும் வல்லவர் அவர். அப்படித்தான் அன்று, மகளிடம் வள்ளலாரின் பாடலைப் பாடிக் கொண்டிருந்த போது அப்பாடலில் தேகம் என்ற வார்த்தை வந்தது. அடிகள் சொன்னார்: தேகம் என்ற வடமொழிச் சொல்லுக்குப் பதிலாக யாக்கை என்ற சொல்லைப் பயன்படுத்தியிருக்கலாமே என்று மகளிடம் கூறினார்.

நம் தமிழ் மொழியிலேயே எண்ணற்ற வார்த்தைகள் இருக்க, வடமொழிச் சொற்கள் தமிழின் இடத்தைப் பிடித்துக் கொள்ள எப்படி முடிந்தது? எதனால் இப்படி நடந்தது? தமிழில் வார்த்தைகளுக்குப் பஞ்சமா? இல்லையில்லை..நம் மொழியை அதன் அழகிய வடிவத்துடன் காக்க வேண்டும் என்ற எண்ணத்துக்குத்தான் பஞ்சம்...

தனித்தமிழ்ச்சொற்களையே பயன்படுத்தவேண்டும் என்று உறுதி பூணவேண்டியது நம் கடமை என்று தோன்றியது அடிகளாரின் மகளான நீலாம்பிகைக்கு..மகளின் எண்ணம் தந்தையாரையும் தொற்றிக்கொண்டது. தனித்தமிழ் இயக்கம் தோற்றுவிக்கும் எண்ணம் அவர் மனதில் அன்று தோன்றியது; அது முதல் அடிகளாரின் எல்லாத் தமிழ்ப்பணிகளுக்கும் துணைநின்று அவரை ஊக்குவித்தவர் அவர் தம் மகளே..மொழியை அவரவர் விருப்பபடியெல்லாம் மாற்றிக்கொள்ளும்படியான நிலை இருக்கக்கூடாது.....அதற்கென்று ஒரு கட்டுப்பாடு வேண்டும் என்று அடிகளார் வலியுறுத்தினார். அப்படி 1916 ஆம் ஆண்டு தோன்றியதுதான் தனித்தமிழ் இயக்கம்.

இன்று தேகம் என்ற சொல்லைத் தமிழ் என்று கருதுகிறோம் நாம்; யாக்கை என்ற தூய தமிழ்ச்சொல் ஏதோ வேற்று மொழியாகத் தோன்றுகிறது. இது போன்ற சொற்கள் ஆயிரமாயிரம்.. இச்சொற்கள் தமிழ் மொழிக்குள் புகுந்து இன்று தூய தமிழ்ச்சொற்களை தூரமாய்ப் போகும்படி துரத்திவிட்டுவிட்டன. நாம் எழுதுவது தூய தமிழ் என்று நினைக்கிறோம்..ஆனால் வேற்று மொழிச் சொற்களையும் தமிழ்ச்சொற்கள் என்று தவறாக நினைக்கிறோம். தவறுகளைத் திருத்திக் கொள்ளவும் மறுக்கிறோம்.

தன் வாழ்க்கையிலும், தன் பழக்கவழக்கங்களிலும் ஒழுக்கநெறியைக் கொண்டு வாழ்ந்தவர் அடிகளார். குழந்தைகளுக்குத் தமிழிலேயே பெயரிடவேண்டும் என்று வலியுறுத்தினார்.

அடிகளாருக்குத் தமிழின் மீது இருந்த பற்று அவர் குடும்பத்தினரையும் தாக்கம் செய்யத் தவறவில்லை. அடிகளாரது திருக்குமாரரான திருநாவுக்கரசு, மற்றும் பேரன் தாயுமானவன் எழுதிய நூல்களின் மூலம் அடியாரது வாழ்க்கைக் குறிப்புகள் அறியப்பெறுகிறோம்.

அவருடைய தனித்தமிழ் இயக்கம் ஆற்றிய பணிகள்தான் என்ன? வ.சுப.மாணிக்கனார் தனித்தமிழ் இயக்கத்தின் சிறப்பு பற்றி இவ்வாறு கூறுகின்றார்...,"அடிகளாரின் தனித்தமிழ் இயக்கம் தமிழ்த்தாயின் நெஞ்சு புரையோடாதும், தமிழர் அறைபோகாதும் காத்தது. தமிழின் வயிற்றிலிருந்து முன்பு பல திராவிட மொழிகள் கிளைத்து அதன் பரப்பைச் சுருக்கியது போல மீண்டும் தமிழகத்துள் ஒரு புதிய திராவிட மொழி பிறந்து தமிழைக் குன்றிக் குலையாதவாறு தடுத்தது" என்று உரைக்கிறார்.

தமிழைத் தமிழாக இருக்க விடுங்கள் என்று அடிகளார் வலியுறுத்தியது கேட்டு எள்ளி நகையாடியவர் பலர்..கலிகாலக்கொடுமை என்றும் இகழ்ந்தனர். அவர்களுக்கெல்லாம் சிரித்தவாறே அடிகளார் அளித்த பதில்...இதுதான்..

நம் தனித் தமிழ்த்தாயைப் பிறமொழிச் சொற்கள்
என்னும் கோடாரியினுள் நுழைந்து கொண்டு,
இத்தமிழ்ப் புதல்வர் வெட்டிச் சாய்க்க
முயல்வதுதான் கலிகாலக் கொடுமை!
இத்தீவினை புரியும் இவர்தம்மைத் தடுத்து,
எம் தமிழ்த்தாயைப் பாதுகாக்க முன்நிற்கும்
எம்போல்வாரது நல்வினைச் செயல்
ஒருகாலும் கலிகாலக்கொடுமை ஆகாது என்று
உணர்மின்கள், நடுநிலையுடையீர்"!

என் மொழியை என் விருப்பத்துக்குப் பேசுவது என் உரிமை. வேற்று மொழிச் சொற்கள் கலந்தும் பேசுவேன்; இருக்கின்ற சொற்களை மாசு படுத்தியும் பேசுவேன் என்று சொன்னவர்கள் / சொல்பவர்கள் உண்டு. அதற்கும் தகுந்த சரியான மறுமொழி மலர்ந்தது அடிகளாரிடமிருந்து...

மொழியின்றி மக்களும், மக்களின்றி மொழியும் உயிர்வாழ்தல் இயலாது. ஒவ்வொருவரும் தம் விருப்பத்துக்கு மொழியில் கலப்படம் செய்தும், திரித்தும் பேசினால் குறுகிய காலத்துக்குள்ளேயே பேரழிவு வந்து சேரும். சிறிய அளவில் ஒரு கூட்டம் கூடினால் கூட, ஒவ்வொருவரும் அவர் விருப்பத்துக்கு மொழியை மாற்றிப் பேசினால், அவர்களுக்குள்ளேயே தொடர்பு அறுந்து போகும். ஒவ்வொரு சிறு கூட்டத்திற்கும் ஒவ்வொரு மொழி தோன்றும். காலந்தோறும் ஒவ்வொரு புது மொழி உருவாகி அக்கூட்டங்களை ஒன்று சேரவிடாமல் பிரித்துவிடும்.

தமிழ் மொழி நெறியை மதிக்காதவர் நடத்திய கூட்டங்களுக்கும், மாநாடுகளுக்கும் மிகச் சிறப்பும் பெருமையும் வாய்ந்த பெரியோரிடமிருந்து அழைப்பு வந்த போதெல்லாம், 'உங்கள் பணிகளைப் பாராட்டும் அதே வேளையில், தூய தமிழை வளர்க்க விரும்பாத எந்த ஒரு கூட்டத்திலும் கலந்து கொள்வதில்லை என்று உறுதியாகவும், துணிச்சலாகவும் நேருக்கு நேர் உரையாடி அவ்வழைப்புகளை மறுத்தவர் அடிகளார்.

இத்தகைய மாமனிதர்கள் கட்டிக்காக்க முற்பட்டும் கூட இன்று எந்த நிலையில் இருக்கிறது நம் தமிழ்மொழி என்று சிந்தித்துப் பார்க்க நாம் கடமைப்பட்டிருக்கிறோம். துறைதோறும் தமிழ்ச்சொற்கள் அதிகமாக நம் கைவசமே இருக்க, தமிழில் சொற்களே இல்லை, அதனால்தான் வேற்றுமொழிச்சொற்கள் பயன்படுத்துகிறோம் என்பார் சிலர்.

பல மொழிகளைக் கற்பதற்குத் தடையாக நம் முன்னோர்கள் இருந்தார்கள் என்ற தவறான கருத்தும் நிலவுகிறது. வேற்றுமொழித் திணிப்பைதான் எதிர்த்தார்களேயன்றி, எந்த ஒரு மொழியையும் எதிர்க்கவில்லை.எந்த மொழி பயின்றாலும் அதற்குரிய தனி அழகோடு, சிறப்போடு வேற்று மொழிச்சாயல்கள் தவிர்த்துப் பயிலுவதுதான் சிறந்தது.

இணையத்தில் இன்று ஆங்கிலத்துக்கு அடுத்தபடியாக, அதிகம் எழுதப்படுவது தமிழ்மொழி; அறிவியல் துறைகள் சார்ந்த சொற்களுக்கு ஈடாக ஏற்கனவே இருக்கின்ற தமிழ்ச் சொற்களை எடுத்துக்காட்டியும், புதிதாகச் சொற்கள் பல படைத்தும் தமிழ்த்தொண்டாற்றி வருகின்றனர் அறிஞர் பலர்.சமீபத்தில்..ஆரிய மொழி ஆர்வலர்கள் தமிழுக்குச் செய்யத் துணிந்த துரோகங்கள் தமிழ் அறிஞர்களின் முயற்சியால் முறியடிக்கப்பட்டுள்ளது. இது ஓராண்டுக்கு முன் நடந்த நிகழ்வு..

இத்தகைய சிறப்புகள் நம் தமிழ் மொழியில் இன்றும் காண முடிகிறது. இந்தப் பெருமை அழிந்துவிடாமல் தக்கவைத்துக் கொள்வதே தமிழுக்கும், தமிழறிஞருக்கும், நாளைய சமுதாயத்திற்கும் நாம் செய்ய வேண்டிய கடமைகள் ஆகும்.

இன்று குழந்தைகள் மட்டுமின்றி, பெரியோரும்...என்னையும் சேர்த்துத்தான் சொல்கிறேன்...பிறமொழிக்கலப்பின்றி எத்தனை வாக்கியங்கள்..பேசமுடிகின்றது? இந்தத் தவறைத் தெரிந்தே செய்து வருகிறோம்..அதில் பெருமையும் கொள்கிறோம்...அன்று மணிப்பிரவாளம்..இன்று தமிங்கிலம்...

தமிழ் நெறியைக் காக்கப் பேசும் பேச்சுக்கள் எல்லாம் கேலி கிண்டலுக்குள்ளாகி, தமிழ் வெறி என்று முத்திரை குத்தப்பட்டுப் பழிக்கப்படுகின்றன.

உணவில் கலப்படம்...அது உடலுக்குக் கேடு..
பொருள்களில் கலப்படம்...அது வணிகத்துக்குக் கேடு..
கொள்கைகளில் கலப்படம்..அது அரசியலார்க்குக் கேடு..
பழக்க வழக்கங்களில் கலப்படம்...அது பண்பாட்டுக்குக் கேடு..
மொழியில் கலப்படம்....காலத்தின் இயல்பான சுழற்சிக்குக் கேடு..

சிந்திப்போம்...தவறுகளைத் திருத்த முற்படுவோம்.

குறளின் குரல் - 29

2011-07-10T14:10:00.000+03:00

பால்: பொருட்பால்

இயல்: குடியியல்
அதிகாரம்: 96. குடிமை
குறள் எண்: 957

குடிபிறந்தார் கண்விளங்குங் குற்றம் விசும்பின்
மதிக்கண் மறுப்போ லுயர்ந்து.

குடிப்பிறந்தார்கண் விளங்கும் குற்றம், விசும்பின்
மதிக்கண் மறுப்போல் உயர்ந்து.

விளக்கம்:

நற்குடியில் பிறந்தவரிடம் சிறு குற்றம் கூட இருக்கக் கூடாது. ஆகாயத்தில் இருக்கும் நிலவில் இருப்பது சிறு களங்கம்தான் என்றாலும், அது பலரும் அறியும் வண்ணம் மிகவும் வெளிப்படையாகத் தெரியும். அதே போல், நற்குடியில் பிறந்தவரிடம் இருக்கும் சிறு குற்றமும் பலராலும் அறியப்பட்டுப் பெரிதாகத் தோன்றும்.

விசும்பு - வானம், தேவலோகம், மேகம், செருக்கு, வீம்பு, திசை

மறு - களங்கம், குற்றம், தீமை, அடையாளம், மச்சம்

--------------------

பால்: பொருட்பால்
இயல்: நட்பியல்
அதிகாரம்: 88. பகைத்திறம் தெரிதல்
குறள் எண்: 875

தன்றுணை யின்றாற் பகையிரண்டாற் றானொருவ
னின்றுணையாக் கொள்கவற்றி னொன்று.

தன் துணை இன்றால்; பகை இரண்டால்; தான் ஒருவன்
இன் துணையாக் கொள்க, அவற்றின் ஒன்று.

விளக்கம்:

துணைக்கு ஒருவரும் இன்றித் தனித்து நிற்கும் ஒருவனுக்குப் பகையோ இரண்டாக உள்ளது. அந்நிலையில் அப்பகைவருள் ஒருவரைத் தன் இனிமையான துணையாக மாற்றிக் கொள்ள வேண்டிய திறம் ஓர் ஆட்சியாளருக்கு இருக்க வேண்டும்.

-----------------------
பால்: அறத்துப்பால்
இயல்: இல்லறவியல்
அதிகாரம்: 12. நடுவுநிலைமை
குறள் எண்: 111

தகுதி யெனவொன்று நன்றே பகுதியாற்
பாற்பட் டொழுகப் பெறின்.

தகுதி என ஒன்று நன்றே - பகுதியான
பாற்பட்டு ஒழுகப்பெறின்.

விளக்கம்:

நட்பு, பகைமை என்று பேதம் பார்க்காமல், வேண்டியவர் வேண்டாதவர் என்று ஒரு பகுதியின் பால் சார்ந்து நிற்காமல், அவரவர்க்குரிய முறைமைப்படி நடந்து கொள்வதே நல்லறமான நடுவுநிலைமை என்னும் தகுதியாகும்.

---------------------------
பால்: இன்பத்துப்பால்
இயல்: களவியல்
அதிகாரம்: 109. தகையணங்குறுத்தல்
குறள் எண்: 1082

நோக்கினா ணோக்கெதிர் நோக்குத றாக்கணங்கு
தனைக்கொண் டன்ன துடைத்து.

நோக்கினான் நோக்கு எதிர் நோக்குதல் - தாக்கு அணங்கு
தானைக் கொண்டன்னது உடைத்து.

விளக்கம்:

அவளை நான் பார்க்கும்போது எதிர்ப்பார்வை பார்க்கிறாள் அவள். இயல்பாகப் பார்க்கும் போதே தன் பார்வையால் வருத்தக்கூடிய ஒரு பெண் எதிர்ப்பார்வை பார்ப்பது, தான் மட்டும் வராமல் தன்னுடன் ஒரு பெரும்படையைச் சேர்த்துக் கொண்டு வந்து தெய்வப்பெண்ணொருத்தி தாக்குவதைப் போல் உள்ளது.

அணங்கு - தெய்வப்பெண், பத்திரகாளி, தேவர்க்கு ஆடும் கூத்து, அழகு, அச்சம், விருப்பம், மயக்க நோய், வருத்தம், கொலை, கொல்லிப்ப்பாவை, பெண்
தகை - அழகு
அணங்குறுத்தல் - காதல் துன்பத்தை உண்டாக்குதல்

------------------
பால்: அறத்துப்பால்
இயல்: இல்லறவியல்
அதிகாரம்: 24. புகழ்
குறள் எண்: 239

வசையிலா வண்பயன் குன்று மிசையிலா
யாக்கை பொறுத்த நிலம்.

வசை இலா வண் பயன் குன்றும் இசை இலா
யாக்கை பொறுத்த நிலம்.

விளக்கம்:

நல்ல விளைச்சல் தரும் நிலமே பயன் தருவதில் சிறந்ததாகும். அத்தகைய நிலம், புகழ் இல்லாமல் வாழ்பவரின் உடலைச் சுமக்கும் போது, வசைகள் குற்றங்கள் இல்லாதது என்ற தன் புகழில் இருந்து குறைந்து போகும். நல்ல புகழ்வாய்ந்தவர்கள் வாழும் நிலத்தில் மட்டுமே விளைச்சலின் பலன் அதிகமாக இருக்கும் என்ற செய்தியும் குறிப்பால் உணர்த்தப்படுகிறது.

------------------------------
பால்: பொருட்பால்
இயல்: அமைச்சியல்
அதிகாரம்: 73. அவையஞ்சாமை
குறள் எண்: 727

பகையகத்துப் பேடிகை யொள்வா ளவையகத்
தஞ்சு மவன்கற்ற நூல்.

பகையகத்துப் பேடி கை ஒள் வாள் அவையகத்து
அஞ்சுமவன் கற்ற நூல்.

விளக்கம்:

போர்க்களத்தில் பகைவரின் நடுவில் நின்றிருக்கும், மனதில் துணிவற்ற கோழையின் கையில் ஒளி பொருந்திய வாள் இருந்தாலும், அவன் வீரன் இல்லை என்பதால் அந்த வாளால் ஒரு பயனும் இல்லை.

அதே போல் ஒருவன் எவ்வளவுதான் சிறந்த நூல்களைக் கற்றிருந்தாலும், பலரும் கூடியிருக்கும் அவைக்கு நடுவில் தான் கற்றவற்றைச் சொல்லத் துணிவில்லாமல் அஞ்சினான் என்றால், அந்த நூல் தந்த கல்வியால் யாதொரு பயனும் இல்லை.

இரண்டுமே பிறரின் நகைப்புக்கு வழிவகுக்குமேயன்றி ஒரு பயனையும் தருவதற்கு வாய்ப்பில்லை.

ஊடலாடல்

2011-06-26T15:09:00.000+03:00

மலர மறுத்து
இதழ்களை
இறுக்கி
இழுத்துப் பிடிக்கும்
பூவுக்கும்
புயலின் வேகம்..

மலர மறுக்கும்
இதழ்க் கதவுகளைத்
தட்டித் திறக்க
முட்டி மோதும்
தென்றலுக்கும்
புயலின் வேகம்..

ஆணவங்களுக்குள்
அவசர மோதல்;
அகம்பாவங்களுக்குள்
அளவற்ற அளவளாவல்;

ஊடலாடும் பொழுதுகள்..

கத்தியின்றி
இரத்தமின்றி
சத்தமின்றி
முத்தமின்றி
நடந்தேறும் ஒரு
தற்காலிகத்
தனியுத்தம்;

வென்றவர் தோற்றிட
தோற்றவர் வென்றிட..
அதிசய யுத்தம்;

காதல் உணர்வுகள்
ஊசலாடும் உள்ளங்கள்
ஊடலாடும் பொழுதுகள்
உன்னதமானவை;

வாழ்க்கைப் பூவுக்கு
வாசம் தரும்
சுவாசம் தரும்
காதல் வேர்கள்..

காதல் வேருக்கும்
வாசம் தந்து
ஆழமாய் அழுத்திப்பிடிக்கும்
ஊடல் பூக்கள்..

குறளின் குரல் - 28

2011-06-26T14:54:00.000+03:00

பால்: பொருட்பால்
இயல்: துறவறவியல்
அதிகாரம்: 30. வாய்மை
குறள் எண்: 295

பொய்யாமை யன்ன புகழில்லை யெய்யாமை
யெல்லா வறமும் தரும்.

பொய்யாமை அன்ன புகழ் இல்லை; எய்யாமை,
எல்லா அறமும் தரும்.

விளக்கம்:

பொய்யாமையால் கிடைக்கப்பெறும் புகழுக்கு இணையான புகழ் வேறெதுவும் இல்லை; மிகவும் தன்னை வருத்திக் கொள்ளாமல், இயல்பாக மெய் பேசும் குணம், மற்ற எல்லா அறங்களையும் தேடித் தரும்.

-----------------------

பால்: பொருட்பால்
இயல்: அரசியல்
அதிகாரம்: 63. இடுக்கணழியாமை
குறள் எண்: 623

இடும்பைக் கிடும்பை படுப்ப ரிடும்பைக்
கிடும்பை படாஅ தவர்.

இடும்பைக்கு இடும்பை படுப்பர் இடும்பைக்கு
இடும்பை படாஅதவர்.

விளக்கம்:

மிகவும் கடுமையான துன்பம் வருகின்ற போதும், மிகவும் மனவுறுதியுடன் அத்துன்பத்தை எதிர்கொண்டு நிற்பவர், அத்துன்பத்திற்கே துன்பத்தை உண்டாக்குவார்கள்.

துன்பத்துக்கே துன்பம் தருவது மனவலிமை என்று வள்ளுவர் உணர்த்தி நிற்கும் உளவியல் கூறு இது.

இடும்பை - கடுந்துன்பம்

---------------

பால்: அறத்துப்பால்
இயல்: இல்லறவியல்
அதிகாரம்: 18. வெஃகாமை
குறள் எண்: 171

நடுவின்றி நன்பொருள் வெஃகிற் குடிபொன்றிக்
குற்றமு மாங்கே தரும்.

நடுவு இன்றி நன் பொருள் வெஃகின் குடி பொன்றி,
குற்றமும் ஆங்கே தரும்.

விளக்கம்:

பிறரது பொருளைக் கவர்ந்து கொள்ள நினைப்பது நடுவு நிலையன்று; இதைக் கவனத்தில் கொள்ளாமல் பிறரது பொருளை ஆசையுடன் கவர்ந்து கொள்ள நினைப்பவனின் குடும்பமும் அழிந்து, பழியும் குற்றமும் வந்து சேரும்.

வெஃகாமை - (பிறர் பொருளுக்கு) ஆசைப்பாடாமல் இருத்தல்
பொன்றி - அழிந்து

--------------------
பால்: இன்பத்துப்பால்
இயல்: கற்பியல்
அதிகாரம்: 125. நெஞ்சொடு கிளத்தல்
குறள் எண்: 1244

கண்ணுங் கொளச்சேறி நெஞ்சே யிவையென்னைத்
தின்னு மவர்க்காண லுற்று.

கண்ணும் கொளச் சேறி - நெஞ்சே! - இவை என்னைத்
தின்னும், அவர் காணல் உற்று!

விளக்கம்:

நெஞ்சே! நீ என்னவரைத் தேடிச் செல்லும்போது என் கண்களையும் கூட்டிக் கொண்டு சென்றுவிடுவாயாக! இல்லையென்றால், அவரைக் காணவேண்டும் என்று கூறி இக்கண்கள் என்னை வதைத்துத் தின்றுவிடும்.

நெஞ்சொடு கிளத்தல் - தலைவனைப் பிரிந்து வருந்தும் தலைவி, தன் ஆற்றாமையைப் பிறரிடம் சொல்ல வெட்கப்பட்டு, தன் நெஞ்சை முன்னிறுத்தி, அதனுடன் பேசி ஆறுதலடைதல்.

_____________

பால்: பொருட்பால்
இயல்: அரசியல்
அதிகாரம்: 43. அறிவுடைமை
குறள் எண்: 425

உலகந் தழீஇய தொட்ப மலர்தலுங்
கூம்பலு மில்ல தறிவு.

உலகம் தழீஇயது ஒட்பம்; மலர்தலும்
கூம்பலும் இல்லது - அறிவு.

விளக்கம்:

உலகத்தையே நட்பாக்கிக் கொள்ளுவது நுண்ணறிவுடன் கூடிய சிறந்த செயலாகும். உலகத்துடன் இயைந்து நட்புடன் வாழ்வதே எந்நிலையிலும் சிறப்பு. அந்த நட்பைச் சீராக ஒரே நிலையில் வைத்துக்கொள்வது முக்கியமான ஒன்றாகும். சில பொழுது மிகவும் மனம் மகிழ்ந்து, சில பொழுது மிகவும் தளர்ந்து சோர்ந்து காணப்படும் ஏற்றத்தாழ்வுடன் கூடிய நிலையில்லாமல், நட்பை ஒரே சீரான நிலையில் வைத்துப்போற்றுவது அறிவு.

எந்நிலையிலும் உலகோடு இயைந்து நட்புடன் வாழ்வதும், அந்நட்பினால் ஏற்படும் இன்ப துன்பத்தைச் சமமாகப் பாராட்டுவதும் அறிவு.

ஒட்பம் - மேன்மைநிலை, நுண்ணறிவு

---------------
பால்: பொருட்பால்
இயல்: அரசியல்
அதிகாரம்: 50. இடனறிதல்
குறள் எண்: 500

காலாழ் களரி நரியடுங் கண்ணஞ்சா
வேலாண் முகத்த களிறு.

கால் ஆழ் களரில் நரி அடும், கண் அஞ்சா
வேல் ஆள் முகத்த களிறு.

விளக்கம்:

வேல் ஏந்திய வீரனை நேருக்கு நேர் சந்தித்துச் சற்றும் அஞ்சாமல் தன் தந்தங்களால் குத்திக் கொன்று விடும் யானை; அத்தகைய வீரம் பொருந்திய யானை தன் கால்கள் அமிழும்படியான ஆழமான சேற்று நிலத்தில் அகப்பட்டுக் கொண்டால் சிறு நரி கூட அஞ்சாமல் யானையைக் கொன்றுவிடும்.

எவ்வளவுதான் வலிமையும் வீரமும் பெற்றிருந்தாலும், தமக்குப் பொருந்தாத இடத்திற்குச் செல்லும்போது, தம்மை விட வலிமையில் குறைந்த எளியரிடத்திலும் தோற்க வேண்டிவரும்.

களர் - சேற்று நிலம், உவர் நிலம், களர் நிலம், கூட்டம், கழுத்து, கறுப்பு

அடும் - வெல்லும், கொல்லும், சமைக்கும், வருந்தும், போராடும்

அவரும் இவரும்

2011-05-23T10:43:00.002+03:00

நம் எதிர்பார்ப்பு:
2+2 = 4

அவர் சொன்னார்:
3+2 = 5

இவர் சொல்கிறார்:
2+3 = 5

அவர் குடும்பம்
அசல் ஆலமரம்
விழுதுகளாய் வியாபித்து
விண்ணளவு வளர்ந்து
நீள அகலம்
உயரம் ஆழம்
முடியுமட்டும் அளந்து
ஆர்ப்பரித்தது...

இவர் தோழி நட்பு
போன்சாய் ஆலமரம்
வரவேற்பறையில்
படு சமர்த்தாய்த்
தொட்டிக்குள் அமர்ந்து
எண்பது அடி பலத்தை
எட்டங்குலத்துள் அடக்கி
ஆர்ப்பரிக்கும்...

இருவரிடத்தும்
சமமாய்ச் சீரழியும்
சமச்சீர் கல்வி..

புதிய கோட்டையா
பழைய கோட்டையா
கோட்டைக்கான சர்ச்சையில்
கோட்டைவிடப்படும்
ஆக்கப்பூர்வ திட்டங்கள்..

அவர் எதுகை
இவர் மோனை

அவர் ஏணி என்பார்
இவர் கோணி என்பார்

கட்சி
கொள்கை
மக்கள்

அவருக்கும்
இவருக்கும்
விளையாட்டு பொம்மை...

நாம் மட்டும்
என்றும் மாறாத
சகிப்புத்தன்மையுடன்..

அவரையும் சகிப்போம்
இவரையும் சகிப்போம்...

ஐந்து வருடம்
கழித்து..
இன்னமும்
சகிப்போம்!

குறளின் குரல் - 27

2011-05-23T10:38:00.000+03:00

பால்: அறத்துப்பால்
இயல்: துறவறவியல்
அதிகாரம்: 31. வெகுளாமை
குறள் எண்: 303

மறத்தல் வெகுளியை யார்மாட்டுந் தீய
பிறத்த லதனான் வரும்.

மறத்தல் வெகுளியை யார் மாட்டும் - தீய
பிறத்தல் அதனால் வரும்.

விளக்கம்:

தம்மைக்காட்டிலும் வலியரோ, மெலியரோ..எவரிடத்தும் கோபம் கொள்வதை மறந்துவிட வேண்டும். ஒருவர்க்கு வருகின்ற தீமையெல்லாம் சினம் கொள்வதால்தான் வருகிறது. சினத்தைத் தவிர்க்க, தீமைகள் விலகும்.
----------------------
பால்: அறத்துப்பால்
இயல்: துறவறவியல்
அதிகாரம்: 28. கூடா ஒழுக்கம்
குறள் எண்: 279

கணைகொடிதி யாழ்கோடு செவ்விதாங் கன்ன
வினைபடு பாலாற் கொளல்.

கணை கொடிது; யாழ் கோடு செவ்விது; ஆங்கு அன்ன
வினைபடு பாலால் கொளல்.

விளக்கம்:

அம்பு வடிவத்தால் நேரானது; என்றாலும் பிறரைக் காயப்படுத்தும், கொல்லும் செயலால் கொடுமையானது. யாழ் என்னும் இசைக்கருவியின் கோடுகள் வளைந்து காணப்படுவது; என்றாலும் இசை பொழிந்து பிறரை மகிழ்விக்கும் செயலால் இனிமையானது.

அம்பையும், யாழையும் அவை தரும் பயன்களைக் கொண்டுதான் கொடிது, செவ்விது என்று எடை போடுகின்றோம்.

அதே போல் ஒருவர் செய்யும் செயல்கள் மூலம்தான் அவர் நல்லவரா, கெட்டவரா என்று எடை போட வேண்டும்; புறத்தோற்றத்தைக் கண்டு மயங்கித் தவறாக எடை போடக் கூடாது.

செவ்விது - நேரானது, நன்று
----------------------------

பால்: பொருட்பால்
இயல்: அமைச்சியல்
அதிகாரம்: 68. வினை செயல்வகை
குறள் எண்: 674

வினைபகை யென்றிரண்டி னெச்ச நினையுங்காற்
தீயெச்சம் போலத் தெறும்.

வினை, பகை, என்று இரண்டின் எச்சம் நினையுங்கால்,
தீ எச்சம் போலத் தெறும்.

விளக்கம்:

தீயை முழுவதுமாக அணைக்காமல், அதனால் என்ன ஆகப் போகிறது என்று கவனமின்றி விட்டுவிட்டால், பின் அதுவே பெருநெருப்பாக மாறிப் பேரழிவை விளைவிக்கக் கூடும். அதே போல, ஒரு செயலைச் செய்யத்தொடங்கி அதை முடிக்காமல் பாதியில் விட்டுவிடுதல், பகையை முழுவதுமாக ஒழிக்காமல் எஞ்சியிருக்கும்படி விட்டுவிடுதல் - இவை இரண்டும் பிற்காலத்தில் பெரும் கேடுகளை வரவழைக்க வல்லவை.

முற்றிலும் அணைக்காமல் விட்ட தீ பின் ஆபத்தை வரவழைப்பது போல், முற்றாகச் செய்யாத வினையும், முற்றாக முடிக்காத பகையும் பின்னொரு காலத்தில் பேரழிவைத் தரும்.

எனவே எடுத்த செயலை முற்றிலுமாக முடிக்க வேண்டும்; வளர்ந்த பகையை முற்றிலுமாக அழிக்க வேண்டும்.

தெறுதல் - அழித்தல், கோபித்தல், வருந்துதல், தண்டனையளித்தல், பகைத்தல், கொல்லுதல்

தெறும் - அழிக்கும்
------------------------

பால்: அறத்துப்பால்
இயல்: துறவறவியல்
அதிகாரம்: 31. வெகுளாமை
குறள் எண்: 309

உள்ளிய வெல்லா முடனெய்து முள்ளத்தா
லுள்ளான் வெகுளி யெனின்.

உள்ளிய எல்லாம் உடன் எய்தும் உள்ளத்தால்
உள்ளான் வெகுளி எனின்.

விளக்கம்:

ஒருவன் தன் மனத்தாலும் சினத்தை நினைக்காதவன் என்றால், அவன் அடைய விரும்பும் நன்மைகள் எல்லாவற்றையும் உடனுக்குடன் அடைந்து பயன் பெறுவான். சினம் இருக்கும் உள்ளத்துக்கு நினைத்ததை அடையும் ஆற்றல் இல்லை. சினம் இல்லாத இடத்தில் நன்மைகள் தேடி வந்து சேர்ந்து தக்க பயனைத் தரும்.
---------------

பால்: அறத்துப்பால்
இயல்: இல்லறவியல்
அதிகாரம்: 19. புறங்கூறாமை
குறள் எண்: 182

அறனழீஇ யல்லவை செய்தலிற் றீதே
புறனழீஇப் பொய்த்து நகை.

அறன் அழீஇ அல்லவை செய்தலின் தீதே -
புறன் அழீஇப் பொய்த்து நகை.

விளக்கம்:

அறம் என்ற ஒன்றே இல்லையென்று அறைகூவிப் பாவச்செயல்களையே செய்தல் தீது; அதை விடத் தீது எதுவென்றால், ஒருவர் இல்லாத இடத்தில் அவரைப் பழித்துப் பேசிவிட்டு, அவர் இருக்கும் இடத்தில் அவரைப் பொய்யாய்ப் புகழ்ந்து, பொய்யாய்ப் புன்னகைப்பது.
-------------------

பால்: பொருட்பால்
இயல்: அரசியல்
அதிகாரம்: 57. வெருவந்த செய்யாமை
குறள் எண்: 564

இறைகடிய னென்றுரைக்கு மின்னாச்சொல் வேந்த
னுறைகடுகி யொல்லைக் கெடும்.

'இறை கடியன்' என்று உரைக்கும் இன்னாச்சொல் வேந்தன்
உறை கடுகி ஒல்லைக் கெடும்.

விளக்கம்:

'இந்த அரசன் / தலைவன் கொடியவன்' என்று ஒரு நாட்டின் மக்கள் பழித்துக்கூறும் கொடுங்குணம் உள்ள அரசன் / தலைவன், தன் நாடு, பெருமை, ஆயுட்காலம், பதவி - இச்சிறப்புகளில் படிப்படியாய்க் குறைந்து போவதுடன், மிக விரைவில் தானும் அழிந்து கெடுவான்.

உறை - பெருமை, இருப்பிடம், வாழ்நாள், பொருள், நீளம், உயரம், மருந்து, கிணற்றில் பொருத்தும் வளையம், உணவு, வெண்கலம், ஆயுதவுறை, நீர்த்துளி, காரம், பொன், பாம்பின் நச்சுப்பை, மழை

கடுகி - குறைந்து, சிறுத்து

ஒல்லை - விரைவு, வேகம், பழைமை, தொந்தரவு

வெரு - அச்சம்

சொர்க்கம் நரகம்

2011-05-04T09:00:00.001+03:00

வறுமைக்கோட்டுக்குப்
பல படிகள் மேலே
பண உரிமைக் கோட்டின்
எல்லையும் தாண்டி
உயர்ந்து உயர்ந்து
மேலே மேலே..

வாழும் நாளெல்லாம்
சொர்க்க சுகானுபவங்களில்
ஈடுபட்டுத் திளைக்கும்
அவனுக்கு
அங்கே நரகமாம்....

வறுமைக்கோட்டுக்குப்
பல படிகள் கீழே
பாதாளம் தாண்டியும்
பசியது பாய்ந்திருக்க
தாழ்ந்து தாழ்ந்து
கீழே கீழே...

வாழும் நாளெல்லாம்
நரக வேதனைகளில்
உழன்று சுழலும்
இவனுக்கு
அங்கே சொர்க்கமாம்...

இன்றைய பொழுது
இன்னும் கழியவில்லை..
நாளைய பொழுது
இன்னும் வரவேயில்லை..

கனாக்கள் காண்கிறோம்
காணாப் பொழுது குறித்து..

சொர்க்கமும் நரகமும்
ஒருங்கே கலந்த மேதினியில்..
வாழ்கின்ற நாட்களில்
வழிதொகை ஏதுமின்றி
மனம்போன போக்கில்
உழலும் நமக்கு
மரணித்த பின்
எங்கே இருப்பிடம் என்ற
அற்பப் பயம் எதற்கு?!

மறுமை பயங்களைக்
கொஞ்சம் தள்ளிவை!
இன்றைக்கு என்ன செய்கிறாய்
அதை மட்டும் நினைவில்வை!

இன்று இங்கே
நரகத்தில் உழலும்
நரன் ஒருவனுக்கேனும்
சொர்க்கம் காட்டி
அவன் வாழ்வின்
சுவை கூட்டிவை!

உன் நேரமும் கவனமும்
தேவை என்னும் இதயம்
உன் அருகிலேயே
இருக்கக்கூடும்..

பாசம் வேண்டும் குழந்தையாகவோ
பரிவு வேண்டும் பெற்றோராகவோ
அன்பு வேண்டும் சகோதரமாகவோ
உதவி வேண்டும் நட்பாகவோ
காதல் வேண்டும் துணையாகவோ..

இன்று இங்கே
நரகத்தில் உழலும்
நரன் ஒருவனுக்கேனும்
சொர்க்கம் காட்டி
அவன் வாழ்வின்
சுவை கூட்டிவை!

குறளின் குரல் - 26

2011-05-04T08:50:00.000+03:00

பால்: அறத்துப்பால்
இயல்: இல்லறவியல்
அதிகாரம்: 16. பொறையுடைமை
குறள் எண்: 158

மிகுதியான் மிக்கவை செய்தாரைத் தாந்தந்
தகுதியான் வென்று விடல்.

மிகுதியான் மிக்கவை செய்தாரைத் தாம் தம்
தகுதியான் வென்றுவிடல்.

விளக்கம்:

ஆணவத்தால், செருக்கால் பிறர் தமக்குத் தீங்கு செய்ய நேரிடும். அந்த நேரத்தில், நாம் அவரினும் அதிகமான தகுதியான பொறுமையை மேற்கொண்டு அவரை வென்றிட வேண்டும்.

செருக்கைச் செருக்கால் வெல்வது இயலாத ஒன்று; அது மேலும் மேலும் பகையை வளர்த்து நிற்கும். பொறுமையால் வெல்வதுதான் நன்மை தரும்.

--------------------------

பால்: பொருட்பால்
இயல்: அரசியல்
அதிகாரம்: 53. சுற்றந்தழால்
குறள் எண்: 525

கொடுத்தலு மின்சொலு மாற்றி னடுக்கிய
சுற்றத்தாற் சுற்றப் படும்.

கொடுத்தலும் இன்சொலும் ஆற்றின் அடுக்கிய
சுற்றத்தால் சுற்றப்படும்.

விளக்கம்:

ஒருவன் தன் சுற்றத்தார்க்குத் தம்மிடம் உள்ள பொருளைக் கொடுத்தும், அவரிடத்து இனிமையான சொல் பேசியும் வாழ்ந்து வருவானாயின், அவன் பல்வகைப்பட்ட சுற்றங்கள் எல்லாவற்றாலும் சூழப்படுவான்.

அடுக்கிய சுற்றம் - தன் சுற்றம், பின் சுற்றத்துக்குச் சுற்றம்...என்று அடுக்கி வருவது...

தழால் - சேர்த்துக்கொள்ளுதல், தழுவுதல்

----------------------

பால்: பொருட்பால்
இயல்: நட்பியல்
அதிகாரம்: 94. சூது
குறள் எண்: 939

உடைசெல்வ மூணொளி கல்வியென் றைந்து
மடையாவா மாயங் கொளின்.

உடை, செல்வம், ஊண், ஒளி, கல்வி என்று ஐந்தும்
அடையாவாம் ஆயம் கொளின்.

விளக்கம்:

சூதாட்டத்தில் ஈடுபடுபவர் உடை, செல்வம், உணவு, புகழ், கல்வி என்ற ஐந்து செல்வங்களையும் அடையமாட்டார். இச்செல்வங்கள் அனைத்தும் ஏற்கனவே அடையப் பெற்றிருந்தாலும் சூதாட்டம் என்ற செயலால் அச்செல்வங்கள் அவரிடம் தங்காமல் விலகிப் போகும்.

ஆயம் - சூதாட்டம், வருத்தம், மேகம், தோழியர் கூட்டம், 34 அங்குல அகலமுள்ள குழி, வருவாய், கடமை, மக்கள் தொகுதி, பசுத்திரள், நீளம், பொன்

--------------------

பால்: பொருட்பால்
இயல்: அரசியல்
அதிகாரம்: 63. ஆள்வினையுடைமை
குறள் எண்: 614

தாளாண்மை யில்லாதான் வேளாண்மை பேடிகை
வாளாண்மை போலக் கெடும்.

தாளாண்மை இல்லாதான் வேளாண்மை பேடி கை
வாள் ஆண்மை போலக் கெடும்.

விளக்கம்:

மனவலிமையும், முயற்சியும் இல்லாதாவன் பிறருக்கு உதவுவது என்பது, வீரம் இல்லாத கோழை தன் கையில் வாள் ஏந்திப் போரில் போரிடுவது போல எதற்கும் உதவாமல் போகும்.

பேடி கையில் உள்ள வாளினால் ஆகும் பயன் ஒன்றுமில்லை. ஊக்கமில்லாதவர் உதவியால் ஆகும் நன்மை ஏதுமில்லை.

தாளாண்மை - ஊக்கமுடைமை, முயற்சியுடைமை

வேளாண்மை - உதவி, தொண்டு, பணி

ஆண்மை - வலிமை, வெற்றி, ஆண்தன்மை, ஆளும் தன்மை, அகங்காரம்

-----------------------

பால்: இன்பத்துப்பால்
இயல்: கற்பியல்
அதிகாரம்: 117. படர்மெலிந்திரங்கல்
குறள் எண்: 1161

மறைப்பேன்மேனி யானிஃதோ நோயை யிறைப்பவர்க்
கூற்றுநீர் போல மிகும்.

மறைப்பேன்மன் யான், இஃதோ, நோயை இறைப்பவர்க்கு
ஊற்றுநீர் போல மிகும்.

விளக்கம்:

தலைவனைப் பிரிந்து இருப்பதால், துன்பத்தால் வருந்துகிறேன். அத்துன்பத்தைப் பிறர் அறியாமல் மறைக்கத்தான் நினைக்கிறேன். ஆனால், இறைக்க இறைக்கப் பெருக்கெடுத்து வரும் ஊற்றுநீர் போல, என் பிரிவுத்துயரை மறைக்க மறைக்க என் காதல் நோயும் பெருகிக் கொண்டே போகிறது.

படர் - நினைவு, நோய், வருத்தம், வழி, ஒழுக்கம், மேடு, துகிற்கொடி, படைவீரர், ஏவல் செய்வோர், தேமல், தொடர்

------------------

பால்: பொருட்பால்
இயல்: அரசியல்
அதிகாரம்: 61. மடியின்மை
குறள் எண்: 606

படியுடையார் பற்றமைந்தக் கண்ணு மடியுடையார்
மாண்பய னெய்த லரிது.

படி உடையார் பற்று அமைந்தக்கண்ணும், மடி உடையார்
மாண் பயன் எய்தல் அரிது.

விளக்கம்:

உலகையே அரசாளும் அரசர் / தகுதிவாய்ந்த மேன்மக்கள் - இவர்கள் துணையும், உதவியும் கிடைக்கப்பெற்றாலும், அதன் மூலம் சோம்பல் உடையவர்கள் எந்தவொரு பயனையும், சிறப்பையும் அடைந்து விட முடியாது. சோம்பல் உடையவர்க்கு அவர் சோம்பலே பகை; தடை. அதனால் அவர்கள் எத்தகைய வலிமையான துணையைப் பெற்றிருந்தாலும் பயன் ஒன்றும் இல்லை.

நான் அறிந்த சிலம்பு - பகுதி 9

2011-04-26T14:44:00.001+03:00

புகார்க்காண்டம் - 2. மனையறம் படுத்த காதை
புகழ்வாய்ந்த சிறப்பும்
அரசரும் விரும்பும் செல்வமும்
பரதவர் மிகுதியாய் வாழ்வதுமானது
புகார் நகர்தானது.

நீர்வளம் நிறைந்ததொரு சிறப்பு;
அலையெனத் திரண்டு
மக்கள் வெள்ளம் வரினும்
சலிப்பின்றி அள்ளிவழங்கும்
வளம் கொழிக்கும் செழிப்பு;

அலைகடல் வழியே
பெருங்கலம் செலுத்தி,
பெருநில வழியே
வண்டி கொண்டு வாணிபம் செய்து
அரும்பொருட்கள் ஆயிரமாயிரம்
கொண்டு வந்து குவித்ததொரு சிறப்பு.

குலவொழுக்கம் குன்றாத
நற்குடியில் பிறந்த
நல்ல செல்வந்தர்
தான தருமங்கள்
பலவும் செய்து பெறக்கூடிய
'உத்தரகுரு' என்னும் செல்வபூமியை
இப்புகார் நகர் ஒத்திருப்பது
இன்னுமொரு சிறப்பு.

அத்திருநகரில்
எழுநிலை மாடமொன்றின்
இடைநிலையாம்
நான்காம் மாடத்தில்
மன்மதனே செய்தது போன்ற
அழகிய கால்களுடைய
கட்டிலின் மேல் அமர்ந்திருந்தனர்
குவளைமலர்க்கண்ணி
கண்ணகியவளும்
காதல் கணவன் கோவலனும்...

தென்றலைக் கண்டு மகிழ்ந்து, இருவரும் காதல் கைம்மிக நிலா முற்றம் போதல்

அந்தக் காதல் நேரத்தில்
அழகிய தென்றல்தான் என்ன செய்தது?

செங்கழுநீர்மலர், ஆம்பல்மலர்
முழுமையான இதழ்களின் அழகு
குலைந்திடாத முழுக்குவளைமலர்,
வண்டுகள் தேனுண்ண
வாய்ப்பு நல்கும் வண்ணம்
அரும்பவிழ்ந்த தாமரைமலர் --
இவ்வயல்வெளி நீர்நிலைமலர்களின்
வாசம் சுமந்து நின்றது
ஆங்கு வீசிய தென்றல்;

இவற்றினின்று வேறுபட்ட,
மேன்மைபொருந்திய
வெள்ளித்தோடாய் விரிந்த
தாழைமலர் வாசம்,
செண்பகச்சோலையில்
அழகு மாலை போன்று
இதழ்விரித்து மலர்ந்திருக்கும்
மாதவி(குருக்கத்தி) மலர் வாசம்,
இவ்விரண்டும்
தன்வசம் விரவிக்கொண்டது
அவ்விளந்தென்றல்;

தாதுடன் சேர்ந்த தேனதனை உண்டு,
ஒளிபொருந்திய முகம் கொண்ட மகளிர்
திருத்திச் சுருட்டி முடிந்த கூந்தலின்
நறுமணம் நுகர்ந்திட விழைந்து,
அவர்தம் பள்ளியறைப் புகமுயன்று
புகமுடியாததால் ஏக்கமுற்று,
'எப்போது பள்ளியறை திறப்பார்'
என்று எதிர்பார்த்துச்
சுழன்று திரியும் வண்டுகளுடன்
தானும் சேர்ந்துகொண்டு
பள்ளியறை புகுந்திட
வழிதேடியது தென்றல்;

முத்து மணிகளால்
அணிசெய்த நேர்த்தியான
சாளரமொன்றை
அவ்வழகுப் பெண்கள் திறந்தபோது
விரைந்து நுழைந்த வண்டுகளுடன்
தானும் தவழ்ந்து சென்று
உட்புகுந்து உலா வந்தது
நிலாத்தென்றல்;

அழகிய தென்றலைத்
துய்த்து மகிழ்ந்த தம்பதியர்தாமும்
காதலின் மிகுதியால்
கூடிட விரும்பினர்;
மலரம்புகள் ஐந்தினைச்
சுமந்த காமனவன் வீற்றிருக்கும்
அழகிய நிலா மாடம் அடைந்தனர்.

சிலம்பின் வரிகள் 1 - 27 இங்கே

அவன் அவள் நாங்கள்

2011-04-17T15:16:00.002+03:00

ரொம்ப நாள் கழித்துத் தியேட்டருக்கு இன்று வந்தோம்..எப்போதும் ஏதாவது ஒரு அலுவல்..தட்டிக் கழித்துவந்த என் கணவர் மனம் வந்து இன்று ஒருவழியாகப் படத்துக்குக் கூட்டிக்கொண்டு வந்துவிட்டார்...சீக்கிரமே வந்துவிட்டதால் தியேட்டருக்கு வருபவர்களை நோட்டம் பார்த்துக் கொண்டிருந்த போதுதான் அவர்கள் வந்தார்கள்...

வித்தியாசமான அவள் முக பாவத்தைப் பார்த்ததுமே தெரிந்தது..அந்தப் பெண் மனநிலை பாதிக்கப்பட்டவள் என்பது..கூட வந்த ஆண் சுற்று முற்றும் பார்த்துவிட்டு இரண்டு வரிசை முன்னால் அமர்ந்தான்...கடைசி வரிசையில் நாங்கள் இருந்தோம்...உட்கார்ந்த மாத்திரத்திலேயே அவன் மேல் சாய்ந்து உட்கார்ந்தாள் அவள்...அவன் தோள் மீது கைகள் போட, அவளிடம் குனிந்து ஏதோ பேசி மெல்லிதாக அவள் கைகளை விலக்கினான் அவன்...சற்றே விலகிச் சுற்று முற்றும் பார்த்தவள் அவன் கைகளை எடுத்துத் தன் கைகளுடன் பின்னிக் கொண்டாள்..சட்டென்று அவன் கைகளில் ஒரு முத்தமும் கொடுத்தாள்...மீண்டும் அவன் குனிந்து ஏதோ சொல்ல விலகினாள்...

அய்யோ படமே இன்னும் ஆரம்பிக்கலை..இவ்வளவு வெளிச்சத்திலேயே இப்படின்னா....இன்னும் விளக்கு அணைந்தால்...நல்ல வேளை கோடை விடுமுறைக்குக் குழந்தைகள் பாட்டி வீடு சென்றுள்ளதால், அவர்கள் வரவில்லை...வேறு யாராவது வந்து சேர மாட்டார்களா என்றிருந்தது அந்தப்பெண் அடித்த கூத்து....அவள் ஏதாவது செய்வதும், அவன் குனிந்து பேசுவதும், அவள் விலகுவதும்...தொடர்ந்தது..பாக்ஸ் என்பதால் குறைந்த இருக்கைகளே இருந்தன...

இது என்னடா வித்தியாசமாருக்கு...சில்மிஷங்கள் எல்லாம் ஆண்தான் செய்வான் என்றால்..இங்கே இப்படி...அந்தப் பெண் மேல் இரக்கம்தான் வந்தது..அந்தப் பாவி எந்த அளவுக்கு இப்பெண்ணிடம் பழகியிருந்தால் இவள் இந்த அளவுக்குத் துணிவாள்..அது சரி பாவம் அவளுக்கென்ன செய்கிறோம் என்று புரியவா போகிறது?!

ஏன் அங்கேயே பாக்குற...சும்மா இரேன்..

ஏங்க..தள்ளிட்டு வந்துருப்பானோ...

அதுல என்ன சந்தேகம்? நிச்சயமா அதுதான்..

எங்கேயிருந்து வந்திருக்கும் இந்தப்பெண்?

எப்படிங்க இப்படில்லாம்...எப்படித்தான் மனசு வருதோ..பாத்தா நமக்கே பாவமாருக்கு..

சும்மா இருக்க மாட்டே...

இப்படித் தள்ளிட்டு வர்றவங்களுக்கெல்லாம் தண்டனை குடுக்க சட்டம் இல்லியோ...இதுவும் ஈவ் டீஸிங்ல வருமா?
சின்னப் பசங்கதான் இப்படிக் கூத்தடிக்குதுன்னா..இதுங்களுமா இப்படி...

நமக்கேன் வீண் பேச்சு..படம் ஆரம்பிச்சாச்சு...படத்தை ஒழுங்காப் பாரு..

மெல்லிய இருளைத் துளைத்த திரை வெளிச்சம் பரவ...கண்கள் படத்தைப் பார்த்தாலும் அவ்வப்போது அவர்களைப் பார்க்கத் தவறவில்லை என் கண்கள்....படம் போட்டதும் கைதட்டிப் படத்தைப் பார்க்க ஆரம்பித்தாள் அவள்...ஆனால் திடீரென்று அவன் மேல் மீண்டும் சாய்ந்து கொள்ள...

பேசாம படத்தைப் பாரு..என் கைகிள்ளினார் இவர்...

திடீரென்று நாலு இளைஞர்கள் வந்தார்கள்...எங்களுக்கும் அந்த ஜோடிக்கும் இடையே இருந்த இருக்கையில் அமர்ந்தார்கள்...

அய்யோ...இவர்கள் இதைப் பார்த்து..என்னவெல்லாம் நடக்கப்போகிறதோ....நல்ல நாள் பாத்து வந்து தொலைச்சோம் படத்துக்கு...ச்சே!

அந்தப் பெண் என்ன செய்தாளோ என்னவோ.. திடீரென்று அவர்கள் எழுந்து வந்து எங்கள் வரிசையின் அடுத்த ஓரத்தில் அமர்ந்தார்கள்...

திரும்பிப்பாத்தே கொன்னுடுவேன் உன்னை...இவர் மிரட்டுகிறார்...

ஆனாலும் ஓரக்கண்ணில் இந்தக் காட்சிகளைக் காணத் தவறவில்லை நான்...இவருக்கு மட்டும் எப்படித்தான் வேறெந்த சிந்தனையும் இல்லாமல், தொந்தரவு இல்லாமல் படத்தைப் பார்க்க முடிகிறதோ தெரியவில்லை...

கண்களை மீட்டெடுத்துத் திரைப்பக்கம் திருப்பினாலும்...அவ்வப்போது அங்கேயேதான் போகிறது..

ஒரு வழியாய் இடைவேளை வந்தது...வெளியே அவன் போகும் போது அவன் கையைப் பிடித்துக்கொண்டே அந்தப் பெண்ணும் பின்னால் சென்றது..

கோன் ஐஸ் வாங்கிக் கொண்டு வந்தார்கள்...ஆமாமா இந்த மூஞ்சிக்கு இது வேறு...கையில் வழிய வழிய அந்தப் பெண் சாப்பிடச் சாப்பிட அவன் கைக்குட்டையால் அதைத் துடைத்துக் கொண்டேயிருந்தான்....ரொம்ப அவசியம்தான்...சாப்பிடும் வரையில் சும்மா இருந்த அவள் மீண்டும் தன் வேலையை ஆரம்பிக்க....ஏதோ குனிந்து அவளிடம் சிரித்துப்
பேசினான்..நல்ல வேளையாக அந்த இளைஞர்கள் இன்னும் வரவில்லை...இவ்ள நேரம் இவன் சும்மா இருந்த மாதிரி இருந்துச்சு....இப்ப இவனும் ஆரம்பிச்சுட்டானா...

நினைத்துக் கொண்டிருந்த போது அவனும் அவளும் புறப்பட ஆயத்தமானது தெரிந்தது..போலாம்மா...என்று அவன் கெஞ்ச...ம்ஹும் படம் பாக்கணும் என்று அவள் குழறுமொழியில் கொஞ்ச...எனக்குப் பற்றிக் கொண்டு வந்தது...ஒழிந்து போங்கள்....வீடு வாசல் இல்லேன்னா லாட்ஜுக்குப் போய்த் தொலைய வேண்டியதுதானே...

காபி வாங்கப் போனவர் என்ன இன்னும் காணோம்..அந்த இளைஞர்களையும் காணவில்லை..இவரையும் என்ன இன்னும் காணவில்லை...அங்கே தனியாக அதுகளுடன் இருக்க பயமாகக்கூட இருந்தது..

அதோ..கூட யார் பாலு அண்ணாவும் வருகிறார்...

என்ன அண்ணா படம் பாக்க வந்தீங்களா நீங்களும்..

ஆமாம்மா....நண்பர்களுடன் வந்தேன்...கீழே உட்கார்ந்திருக்கோம் நாங்க..என்றவர்...

ஹலோ முரளி..எப்படியிருக்கீங்க...விமலா எப்படிம்மா இருக்கே என்று அவனையும் அவளையும் பார்த்துக் கேட்க...

நல்லாருக்கோம்...என்ன பாலு இந்த வாரம் வீட்டுக்கே வரலை..ஃப்ரீயா இருக்கப்ப வாங்க.....இதுக்கு மேல தாங்காது...ஏதோ ஆசப்பட்டாளேன்னு வந்தேன்....நாங்க கிளம்புறோம்னு சொல்லிவிட்டுப் புறப்பட்டார்கள் இருவரும்.

இவன் என் ஃப்ரெண்ட்..எவ்ள நல்ல மனுஷன்..நல்லாருக்க பொண்ணுங்களைக் கல்யாணம் பண்ணவே அவன் அவன் யோசிக்கும் போது, இவனுக்கு ரொம்ப நல்ல மனசு..போன மாசம்தான் கல்யாணம் ஆச்சு..புத்தி சுவாதீனம் இல்லாத அல்லது ஊனமுற்ற ஒரு பெண்ணைத்தான் கல்யாணம் பண்ணிக்குவேன்னு சொன்னான்...வீட்ல இவங்க அம்மா எதிர்த்தும் கூட இப்படி ஒரு பொண்ணத் தேடிப் புடிச்சுக் கல்யாணம் பண்ணிக்கிட்டான்...பாவம்னு அவன் அம்மாவும் சமாதானமாய்ட்டாங்க...முகம் கோணாம எப்படிப் பாத்துக்குறான் தெரியுமா...

பாலு அண்ணா சொல்லிகொண்டே நான் கூனிக் குறுகிப் போனேன்...ஏன் இவர்கள் உறவு பற்றி நல்லதாய், ஆரோக்கியமாய் ஒரு சிந்தனை எங்களுக்கு வராமல் போனது...என் கணவரை நான் பார்க்க அவரும் தர்மசங்கடத்தில் நெளிவது புரிந்தது...பாலு அண்ணா சென்றதும் திரைப்படம் தொடர....ஏதோ ஒரு புரிதலுடன் அவர் கையை என் கைக்குள் வைத்துக்கொண்டேன்...

குறளின் குரல் - 25

2011-04-17T15:16:00.000+03:00

பால்: பொருட்பால்
இயல்: அரசியல்
அதிகாரம்: 41. கல்லாமை
குறள் எண்: 405

கல்லா வொருவன் றகைமை தலைப்பெய்து
சொல்லாடச் சோர்வு படும்.

கல்லா ஒருவன் தகைமை, தலைப்பெய்து
சொல்லாட, சோர்வு படும்.

விளக்கம்:

கல்லாத ஒருவன் தானும் எல்லாம் அறிந்தவன் போல வேடம் தரித்துக் கொள்வது உண்டு; அதன் மூலம் மதிப்பும், பெருமையும் தமக்குக் கிடைக்கும் என்று நினைப்பதுண்டு. அத்தகையவன், கற்றறிந்த அறிஞரை அணுகி, அவர் முன் பேசத் தொடங்கும் போது, அவனது பொய்யான பெருமையும், மதிப்பும் சோர்ந்து, கெட்டு, அழிந்து போகும்.

கல்வியறிவே மெய்யான மதிப்பும், பெருமையும் தேடித்தரும். கல்லாதவனின் போலித்தன்மை கற்றறிந்தவர் முன் தோற்றுப் போகும்.

தகைமை - பெருமை, மதிப்பு, அழகு, தன்மை, தகுதி, ஒழுங்கு, நிகழ்ச்சி
தலைப்பெய்தல் - அணுகுதல், ஒன்று கூடுதல், கிட்டுதல்
--------------------------

பால்: பொருட்பால்
இயல்: அரசியல்
அதிகாரம்: 63. இடுக்கண் அழியாமை
குறள் எண்: 622

வெள்ளத் தனைய யிடும்பை யறிவுடையா
னுள்ளத்தி னுள்ளக் கெடும்.

வெள்ளத்து அனைய இடும்பை அறிவு உடையான்
உள்ளத்தின் உள்ளக் கெடும்.

விளக்கம்:

துன்பங்கள் வெள்ளம் போல் பெருகி வரும். அந்த வெள்ளத்தைக் கடப்பது மிகவும் எளிது என்று அறிவுடையவர்கள் மன உறுதியுடன் எண்ணிய உடனேயே அத்துன்பங்கள் மறைந்து விடும்.
----------------
பால்: பொருட்பால்
இயல்: குடியியல்
அதிகாரம்: 102. நாணுடைமை
குறள் எண்: 1013

ஊனைக் குறித்த வுயிரெல்லா நாணென்னு
நன்மை குறித்தது சால்பு.

ஊனைக் குறித்த உயிர் எல்லாம் நாண் என்னும்
நன்மை குறித்தது சால்பு.

விளக்கம்:

எல்லா உயிர்களும் உடம்பை இருப்பிடமாகக் கொண்டு அதை விட்டுப் பிரியாமல் நிற்பவை. அதே போல், சான்றாண்மை என்பது நாணம் என்னும் நல்ல பண்புள்ள இடத்தையே இருப்பிடமாகக் கொண்டு விளங்கும்; அதனை விட்டுப் பிரியாது. நாணம் உள்ள இடத்திலேயே சான்றாண்மையும் நிற்கும்.

சால்பு - சான்றாண்மை, தன்மை, தகுதி
நாண் - வெட்கம், மானம், கூச்சம், வில்நாண், கயிறு, மாங்கல்யச் சரடு

-----------------
பால்: அறத்துப்பால்
இயல்: இல்லறவியல்
அதிகாரம்: 08. அன்புடைமை
குறள் எண்: 77

என்பி லதனை வெயில்போலக் காயுமே
யன்பி லதனை யறம்.

என்பு இலதனை வெயில் போலக் காயுமே
அன்பு இலதனை அறம்.

விளக்கம்:

எலும்பு இல்லாத புழுக்களின் உடம்பை வெயில் காய்ந்து வருத்தும். அதுபோல அன்பு இல்லாத உயிர்களை அறமானது வருத்தி வதைக்கும்.

அன்பு இல்லாதவர்கள் அறம் எதுவென்று அறிந்து கொண்டு செயலாற்ற முடிவதில்லை. அன்பும் அறமும் வேறு வேறாகப் பிரித்துப் பார்க்க முடியாதவை.

அன்பு உயிர்களின் ஆற்றலை வளர்க்கும். அன்பு, அறத்தின் வழி உயிரை நடத்தித் துன்பங்கள் தாங்கிக் கொள்ளும் ஆற்றலைத் தரும். அன்பு இல்லாதபோது அறம் இன்றிப் போகும். அந்த நிலை உயிர்களை வாட்டி வதைக்கும்.
-----------------------
பால்: பொருட்பால்
இயல்: அரண் இயல்
அதிகாரம்: 74. நாடு
குறள் எண்: 732

பெரும்பொருளாற் பெட்டக்க தாகி யருங்கேட்டா
லாற்ற விளைவது நாடு.

பெரும் பொருளான் பெட்டக்கது ஆகி, அருங் கேட்டால்
ஆற்ற விளைவது நாடு.

விளக்கம்:

பொருள்வளம் நிறைந்து காணப்படும்; அதனால் அனைவராலும் விரும்பப்படும்; கேடுகள் எதுவும் நேராது; விளைச்சல் நன்றாய் நிகழ்ந்து, எல்லா வளமும் பொருந்தியிருக்கும்; நாடு என்பது இத்தகைய சிறப்புகள் பெற்றிருக்க வேண்டும்.

பெட்டல் - விருப்பம்
பெட்டக்கது - விரும்பத்தக்கது
----------------------
பால்: பொருட்பால்
இயல்: குடியியல்
அதிகாரம்: 98. பெருமை
குறள் எண்: 980

அற்ற மறைக்கும் பெருமை சிறுமைதான்
குற்றமே கூறி விடும்.

அற்றம் மறைக்கும் பெருமை; சிறுமைதான்
குற்றமே கூறி விடும்.

விளக்கம்:

பெருமையுடையார் பிறர் குறை குற்றங்களை மறைத்து, நிறைகளை மட்டுமே நினைக்கும் நற்பண்புடையவர்; பெருமையற்ற சிறியரோ பிறரிடம் குற்றங்கள் மட்டுமே கூறி நிற்பர்.

அற்றம் - குறை, இன்மை
-------------------
பால்: பொருட்பால்
இயல்: அமைச்சியல்
அதிகாரம்: 70. மன்னரைச் சேர்ந்தொழுகல் / ஆட்சியாளரோடு பழகுதல்
குறள் எண்: 691

அகலா தணுகாது தீக்காய்வார் போல்க
விகல்வேந்தர்ச் சேர்ந்தொழுகு வார்.

அகலாது, அணுகாது, தீக் காய்வார் போல்க
இகல் வேந்தர்ச் சேர்ந்து ஒழுகுவார்.

விளக்கம்:

தீயின் வெப்பத்தில் குளிர்காய நினைப்பவர், மிகவும் நெருக்கமாக இருந்தாலும் ஆபத்து; மிகவும் விலகிப் போய்விட்டாலும் பயனில்லை. அதே போல், மன்னரைச் சார்ந்து பழகுபவர் மிகவும் நெருங்காமலும், மிகவும் விலகாமலும் சரியான நிலையில் இருந்து பழகவேண்டும்.

பலவிதமான காரணங்களால் மாறுபடும் மனநிலை உடையவர் ஆட்சியாளர்; எனவே அவர்களிடம் பட்டும் படாமலும் பழகிநிற்பதே நன்மை தரும்.

இகல் - வலிமை, பகை, போர், அளவு
---------------
பால்: இன்பத்துப்பால்
இயல்: கற்பியல்
அதிகாரம்: 122. கனவு நிலை உரைத்தல்
குறள் எண்: 1215

நனவினாற் கண்டதூஉ மாங்கே கனவுந்தான்
கண்ட பொழுதே யினிது.

நனவினால் கண்டதூஉம் ஆங்கே, கனவும்தான்
கண்ட பொழுதே இனிது.

விளக்கம்:

முன்பு என் காதலரை நனவில் கண்டு நான் கண்ட இன்பம், அந்தப்பொழுதில் இனிமையாக இருந்தது, இப்போது, அவரைக் கனவில் கண்டு எனக்கு உண்டாகும் இன்பமும், கண்ட அப்பொழுதில் இனிமையாக உள்ளது. நனவோ, கனவோ, அவரைக் காணும் அந்தப் பொழுது மிகவும் இனிமையானது. அவரைக் காணும் இனிமையை உடனிருக்கும் நிலையிலும், பிரிந்த நிலையிலும் தருவதால், கனவும் நனவும் ஒரே தன்மையுடையவை
----------------------------
பால்: அறத்துப்பால்
இயல்: இல்லறவியல்
அதிகாரம்: 06. வாழ்க்கைத் துணைநலம்
குறள் எண்: 53

இல்லதெ னில்லவண் மாண்பானா லுள்ளதெ
னில்லவண் மாணாக் கடை.

இல்லது என், இல்லவள் மாண்பு ஆனால்? உள்ளது என்
இல்லவள் மாணாக்கடை?

விளக்கம்:

இல்லத்தரசியான மனைவி மாண்புடையவள் என்றால், ஒருவனுக்கு இல்லாதது என்பது எதுவும் இல்லை. ஏனெனில், மனைவியின் மாண்பு எல்லாச் சிறப்புகளையும் தேடித் தரும்

அத்தகைய மாண்பு இல்லத்தரசியிடம் இல்லையெனில், ஒருவனுக்கு உள்ளது என்பது எதுவும் இல்லை. மனைவியின் மாண்பெனும் முக்கியச் சிறப்பு இல்லையெனில் வேறெந்தச் சிறப்பாலும் பயனொன்றுமில்லை.

மாண்பு - மாட்சிமை, பெருமை, அழகு, நன்மை

சில நேரங்களில் சில உணர்வுகள்

2011-03-15T13:32:00.001+03:00

சுனாமியாஞ்சலி

அலை அழகு
அமைதி அழகு
மாறும் நிறம் அழகு
உதிக்கும் சூரியன் அழகு
மறையும் சூரியன் அழகு
வேக நடை அழகு
மெது ஓட்டம் அழகு
மணல் கோபுரம் அழகு
தளும்பும் மீன்படகு அழகு.

ஆனால்
சுனாமி...சுனாமி..
அழகை மறக்கவைத்த ஆபத்து.

சீறும் சுனாமியே
சீக்கிரம் அமைதியாகுக!

அணு உலைகள் வெடிப்பு
உலகுக்கு அபாய எச்சரிப்பு..

இயற்கையுடன் பகைக்கின்
வேரோடு கெடும்..

பொன்னியின் செல்வன்

அவ்வப்போது அறிவிப்புகள் மாறி மாறி வந்தாலும், பொன்னியின் செல்வன் படப்பிடிப்பு அக்டோபர் மாதம் தொடங்கும் என்பது மிகவும் மகிழ்ச்சியானதொரு தகவல். விஜய், அனுஷ்கா, ஆரியா மட்டும் உறுதி செய்யப்பட்டிருக்கிறார்கள்.

அனுஷ்கா குந்தவை, விஜய் ஜோடி என்கிறார்கள். அப்படியானால் விஜய்தான் வந்தியத்தேவன்...மிளிர்வார் என்றுதான் நினைக்கிறேன்..அனுஷ்கா வேடத்துக்குப் பொருத்தம்தான்..பாத்திரத்தில் எவ்வளவு தூரம் ஜொலிப்பார்?! குந்தவையின் குறும்பு வருமா? மிடுக்கு வருமா? கம்பீரம் வருமா? பொறுத்திருந்து பார்ப்போம்..

விஷால், விக்ரம் பேச்சையே காணோம் இப்போது..

மகேஷ் பாபு, ஆதித்த கரிகாலன்...சூர்யா ராஜராஜ சோழன் என்றால்..ஆரியா யார்?

நந்தினி வேடம் யாருக்கு?

எப்போது படம் வரும் எப்போது பார்ப்போம் என்றிருக்கிறது..

வரும்...ஆனா வராது....

மத்திய கிழக்கு நாடுகளில் அண்மைக்காலங்களில் நிலவி வரும் சூழல், சவூதி அரேபியாவிலும் சூடு பிடிக்கக்கூடும் என்ற நிலையில்..மார்ச் 11 கிளர்ச்சி மற்றும் ஊர்வலங்கள் எதிர்பார்க்கப்பட்டன....கண்டிப்பாக இங்கேயும் ப்ரசனை வரும் என்றும், அமைதியை விரும்பும் நாடு என்பதால் அப்படி ஏதும் வராது என்றும் எதிர்பார்க்கப்பட்டது..மார்ச் 11 அமைதியாகவே போனது..

சவூதி இளவரசர் அல் வாலித் சொன்னது போல் இது 'tempest in a tea cup' ... 'Saudi is Saudi ..it is no Egypt, no Tunisia, no Libya'...அமைதி இப்போதைக்கு நிச்சயம்...

எது எப்படியோ காலம்தான் பதில் சொல்ல வேண்டும்

சின்னதாய் ஓர் இந்தியப் பயணம்

மார்ச் 16-30 இந்தியப்பயணம்...மிகவும் குறுகிய காலம்..பரபரவென்று பறந்து கொண்டேயிருந்தாலும் ஒவ்வொரு நொடியும் ரசித்து அனுபவிக்கப் போகிறேன்..

குறளின் குரல் - 24

2011-03-15T13:32:00.000+03:00

பால்: அறத்துப்பால்
இயல்: பாயிரவியல்
அதிகாரம்: 04. அறன் வலியுறுத்தல்
குறள் எண்: 37

அறத்தாற் றிதுவென வேண்டா சிவிகை
பொறுத்தானோ டூர்ந்தா னிடை.

'அறத்து ஆறு இது' என வேண்டா; சிவிகை
பொறுத்தானோடு ஊர்ந்தானிடை.

விளக்கம்:

பல்லக்கைச் சுமப்பவனுக்கும், அதில் அமர்ந்துள்ளவனுக்கும் இடையே உள்ள ஏற்றாத் தாழ்வு / நிலை வேறுபாடு அறத்தின் வழிப்பட்டது எனக் கருதக் கூடாது.

பல்லக்கைத் தூக்குகின்றவன் பாவம் செய்தவன்; பல்லக்கில் அமர்ந்திருப்பவன் புண்ணியம் செய்தவன் என்று கூறுவர். அவரவர் முன் செய்த வினைப்பயன் என்றும் கூறுவர். இதுதான் அறத்தின் வழி என்ற தவறான முடிவுக்கும் வருவர். இதுதான் அறத்தின் வழி என்று கூறுவது தேவையற்றது. ஏனெனில் அவ்வாறு கூறுவது தவறானது.

பல்லக்கைச் சுமப்பவனுக்கும், அமர்ந்திருப்பவனுக்கும் உள்ள வேறுபாடு அவரவர் தொழில் வேறுபாட்டால் அல்லது செல்வநிலை வேறுபாட்டால் உருவாகின்ற ஒன்றாகும். அதனை அறத்தின் காரணமாக உருவான வேறுபாடு என்பது தவறான கூற்றாகும்.

சிவிகை - பல்லக்கு

---------------

பால்: பொருட்பால்
இயல்: அரசியல்
அதிகாரம்: 54. பொச்சாவாமை (மறதி இல்லாமை)
குறள் எண்: 539

இகழ்ச்சியிற் கெட்டாரை யுள்ளுக தாந்தம்
மகிழ்ச்சியின் மைந்துறும் போழ்து.

இகழ்ச்சியில் கெட்டாரை உள்ளுக - தாம் தம்
மகிழ்ச்சியின் மைந்துறும் போழ்து.

விளக்கம்:

தமக்குக் கிடைக்கும் வெற்றியின் களிப்பினால் மகிழ்ச்சியில் மூழ்கி அதில் மயங்கும் போது தம்மை, தம் நிலையை மறந்து செருக்கு கொள்ளும் வாய்ப்புண்டு. அவ்வாறு வெற்றி தந்த மயக்கத்தினால் செயல் மறந்து நிற்கும் வேளை, இதுபோல் முன் வெற்றிக் களிப்பில் மிதந்து கெட்டழிந்தவர்களை நினைத்துப் பார்க்க வேண்டும். அவர்கள் கெட்டழிந்ததற்கு இச்செருக்கும் முக்கிய காரணம் என்றுணர்ந்து வெற்றிக் களிப்பில் நிலை மறக்காது கவனத்துடன் செயல்பட வேண்டும்.

உள்ளுக - நினைக்க
மைந்துறும் - மறந்து செயல்படும்

-----------------

பால்: பொருட்பால்
இயல்: அரசியல்
அதிகாரம்: 58. கண்ணோட்டம் (கனிவான உள்ளம்)
குறள் எண்: 580

பெயக்கண்டு நஞ்சுண் டமைவர் நயத்தக்க
நாகரிகம் வேண்டு பவர்.

பெயக் கண்டும் நஞ்சு உண்டு அமைவர் நயத்தக்க
நாகரிகம் வேண்டுபவர்.

விளக்கம்:

எல்லோரும் மதித்துப் போற்றத்தக்க நாகரிகத்தை வேண்டுபவர்கள், தம்மோடு பழகியவர் தமக்கு நஞ்சு இடுவதை நேரில் பார்த்துக் கொண்டிருந்த போதும், அதை மறுக்காமல் உண்டு அமைதியாக இருப்பார்கள். அவர்களிடம் இருக்கும் கண்ணோட்டம் என்ற தன்மையால் இத்தகைய அமைதி கைகூடி வருகிறது.

தமக்குக் கெடுதல் செய்தவரிடத்தும் கனிவான உள்ளத்துடன் நடந்து கொள்வதே நாகரிகம் என்ற கருத்து வலியுறுத்தப்படுகிறது.

-----------------------

பால்: அறத்துப்பால்
இயல்: இல்லறவியல்
அதிகாரம்: 09. விருந்தோம்பல்
குறள் எண்: 85

வித்து மிடல்வேண்டுங் கொல்லோ விருந்தோம்பி
மிச்சின் மிசைவான் புலம்.

வித்தும் இடல்வேண்டும் கொல்லோ - விருந்து ஓம்பி
மிச்சின் மிசைவான் புலம்?

விளக்கம்:

விருந்தினருக்கு முதலில் உணவளித்துவிட்டு, பின் மிச்சமிருப்பதைத் தான் உண்ணுபவனின் நிலத்தில் விதை விதைக்கவும் வேண்டுமோ? தேவையில்லை. தன்னாலேயே நிலம் செழித்து வளரும்.

'அவன் செய்த நல்ல செயல்களுக்கு அவன் நிலம் தானாகவே விளையும்' என்ற உலக வழக்கை ஒட்டி வருகின்றது இக்கருத்து.

வித்து - விதை
மிச்சில் - எஞ்சிய பொருள், எச்சில், கரி
மிசைதல் - உண்ணுதல், நுகர்தல்
மிசைவான் - உண்ணுபவன்
--------------------

பால்: இன்பத்துப்பால்
இயல்: கற்பியல்
அதிகாரம்: 126. நிறை அழிதல்
குறள் எண்: 1258

பன்மாயக் கள்வன் பணிமொழி யன்றோநம்
பெண்மை யுடைக்கும் படை.

பல மாயக் கள்வன் பணிமொழி அன்றோ - நம்
பெண்மை உடைக்கும் படை!

விளக்கம்:

பல மாயங்களைச் செய்துவரும் கள்வர்தாம் காதலர். அவர் பணிந்து, தாழ்ந்து, மென்மையாய்ப் பேசும் மொழி, நம் மன அடக்கம் என்னும் பெண்மையின் உறுதியான கோட்டையை உடைத்துச் சிதைக்கவல்ல படையன்றோ?

நிறை - மன அடக்கம்
-----------------------------

பால்: பொருட்பால்
இயல்: அமைச்சியல்
அதிகாரம்: 68. வினை செயல்வகை
குறள் எண்: 679

நட்டார்க்கு நல்ல செயலின் விரைந்ததே
யொட்டாரை யொட்டிக் கொளல்.

நட்டார்க்கு நல்ல செயலின் விரைந்ததே
ஒட்டாரை ஒட்டிக் கொளல்.

விளக்கம்:

நம் நண்பர்களுக்கு நல்ல உதவிகள் செய்வது நன்று. என்றாலும், அதைக்காட்டிலும் விரைந்து செய்ய வேண்டிய செயல் ஒன்று உண்டு; - தமக்குப் பகையாய் நிற்பவராகவே இருந்தாலும் அவருடன் பழகி நட்புக் கொள்வது, காலம் தாழ்த்தாது மிக விரைவாகச் செய்து முடிக்க வேண்டிய செயலாகும். அரசியல் / வாழ்க்கைத் தந்திரங்களுள் இதுவும் ஒன்று.

எப்போதும் அரசியலுக்கும் பொருந்தும் இத்தந்திரம், பல சமயங்களில் வாழ்க்கைக்கும் பொருந்தும்.

ஒட்டார் - பகைவர்

கண்ணாடிப்பெட்டியும் கலிஃபோர்னியாவும் காத்திருத்தலும்

2011-03-10T08:21:00.002+03:00

ஆச்சு...ராமநாதன் போய்ச் சேர்ந்து சரியா இருபத்து நாலு மணி நேரம் முடியப் போகிறது...இறுதிக்காரியங்கள் முடிந்திருக்க வேண்டிய நிலையில் கலிஃபோர்னியாவிலிருந்து வரவேண்டிய மூத்த மகன் கண்ணனுக்காய்க் காத்திருக்கிறார்கள்...

மதுரை மையப்பகுதிலிருந்து சற்றே ஒதுக்குப்புறமான ஐயர் பங்களா பகுதியில் இருந்தது ராமநாதன் வீடு..ஒரு மகன் கலிஃபோர்னியாவில், இரண்டாவது மகன் பெங்களூரில், மூன்றாவது பெண் சென்னையில்...
இவ்வீட்டில் ராமநாதனும், அவர் மனைவி பரிமளாவும் மட்டுமே வாசம்...

பெரிய தோட்டம்...அதை மொத்தமாக அடைத்துப் போடப்பட்டிருந்த ஷாமியானாப் பந்தல்..வீட்டுக்கு வெளியே அகலமான தெரு என்பதால் நல்ல வேளையாக உட்காரும் இடத்துக்குப்பஞ்சமில்லை...

முருகனும், அவன் மனைவியும் எல்லாவேலைகளையும் முன் இழுத்துப் போட்டுக்கொண்டு செய்தனர்..முருகன் பரிமளாவுக்குத் தம்பிமுறை ...கிராமத்தில் விவசாயம் பார்த்துக்கொண்டிருந்த அவர்களைத் தங்களுக்குத் துணைக்காக மதுரைக்கு வரவழைத்துக்கொண்டார்கள். அவர்கள் பிள்ளைகள் விடுதியில் தங்கிப் படிக்கின்றனர்.

சட்டென்று ஒரு நாள் இரவு வந்த நெஞ்சுவலியில் தூக்கத்திலேயே போய்விட்டார் ராமநாதன்..முதல் சில மணி நேரங்கள் குளிப்பாட்டுதல், சங்கு சவுண்டிக்கு ஆள் சொல்லுதல், கண்ணாடிப்பெட்டி ஏற்பாடு, ஆர்ப்பட்டமான அழுகை என்று ஆரம்பித்தது..தொடர்ந்தது...

*********

ராஜா..அப்பா போய்ட்டாருடா...பெங்களூரிலிருந்து வந்துவிட்டது இரண்டாவது மகன் ராஜேஷ் குடும்பம்...அவனும் வாய்பொத்தி அழுது, அம்மாவை அணைத்து ஆறுதல் சொல்லி அடுத்தடுத்த ஏற்பாடுகளைக் கவனிக்கலானான்.

இந்தா இருக்கு பெங்களூரு..இவன் வரவே இவ்வளவு நேரமாகிவிட்டதே...கண்ணன் எப்போ வரப்போறானோ...

ஃபிளைட் ஏறிட்டானாம்...மாறி மாறி வரணுமில்லியா...லாங் ஜர்னி....நாளைக்குச் சாயந்திரம் வருவானாம்...

போன மாசம் என் நண்பன் செத்தப்போ அவன் மகன் துபாய்லருந்துதான்ன்னு நெனக்கிறேன் ..அவன் உடனே வந்துட்டானே...

துபாய் பக்கம்யா...இது ரொம்பத் தூரம்...பெருசாச் சொல்றியே..அதுவும் சரியான கிழமைல இங்க செத்திருக்கணும்..அவனுக்கு லீவு நாளாப்பாத்துச் சாகணும்..இல்லேன்னா வர்றது கஷ்டம்.. என் பெரியம்மா இறந்தப்போ, சவூதிலருந்து அவங்க பையனால வர முடியல...பாஸ்போர்ட் புதுப்பிச்சு வந்திருக்கு...இவங்க புதன்கிழமை செத்துட்டாங்க...வியாழன் வெள்ளி லீவு...அவன் வரவும் ரெண்டு நாளாச்சு..

வெளிநாட்டச் சொல்றீங்களே...இந்தாருக்கு டில்லி நம்ம நாட்லயே....பிரகாஷ் அவங்க அப்பா சாவுக்கு வந்தப்ப ஃபிளைட் ஸ்ட்ரைக் அது இதுன்னு மும்பைல வந்து மாட்டிட்டு இங்க வரவே ரெண்டாவது நாளாயிடுச்சே...

இந்த விஷயத்துல ஒண்ணும் சொல்ல முடியாது...அவங்க அவங்க நேரம் காலம்..

***********

பூமா, ராமநாதன் மகளும் குடும்பத்தோடு வந்து சேர்ந்தாள்...அழுகை, ஆர்ப்பாட்டம் ஓய்ந்த பின் அவள் கணவன் அவளை ஜாடை செய்து வெளியே அழைத்தான்..

பூமா...அப்பா, அம்மாவை இங்க தங்க வைக்க முடியாது...பக்கத்துல நல்ல ஹோட்டல் விசாரி..அவங்களைப்போய்த் தங்க வச்சுட்டு வந்துர்றேன்..கடைசி நேரம் அவங்க வந்தாப்போதும்...

சரி..முருகன் மாமாவைக் கேட்டு ஏற்பாடு பண்ணிக்கோங்க..

அவனுக்கு மதுரை ஒன்றும் தெரியாத ஊரில்லை..இருந்தாலும் மனைவியிடம் சொன்னால், அவள் வீட்டுச் செலவாகிவிடும் அல்லவா!

***************

ஏ...காப்பி குடுப்பா...சர்க்கரை போடாதே...காபியை வாங்கிக் குடித்துக் கொண்டே வந்தார் உறவினர் ஒருவர்..கன்னியப்பன் கேட்டரிங் சர்வீசாரை வரவழைத்து வந்திருந்தவர்களுக்குத் தாகசாந்தி செய்வித்தார்கள்..

எப்போதும் காப்பி, உணவு வேளைகளில் சித்ரான்னம், சப்பாத்தி, கறி, இட்லி, சட்னி, சாம்பார் என்று ஒரு பக்கம் வந்தவர் பசி ஆறிக்கொண்டிருந்தது..

என்னங்க...இந்தக் கேட்டரிங் சர்வீஸ் நம்பர் வாங்கி வச்சுக்கோங்க...நாளைப்பின்ன நமக்கு உபயோகப்படும்...ஒரு மருமகளின் பொறுப்பான கவலை..அவள் கவலை அவளுக்குத்தானே தெரியும்...வயதான மாமனார், மாமியார் அவர்கள் பொறுப்பில் இருக்க, மூத்தார் குடும்பம் சிங்கப்பூரில்...

**************

யப்பப்பா...இழவு வீட்டில் இத்தனை வேலைகள் இருக்கிறதா...பார்த்துப் பார்த்து மாய்ந்து போனது கார்த்திக் மனம்...ராமநாதனுக்குத் தூரத்து சொந்தம்..கார்த்திக் ஓர் இந்தக்கால இளசு ...வேலையில்லாப் பட்டதாரி..

பார்த்துப் பார்த்துச் செய்வதற்கு எல்லார் வீட்லயுமா ஒரு முருகன் இருக்க முடியும்..

கண்ணாடிப்பெட்டி, சங்கு, சவுண்டி, கேட்டரிங், பந்தல், விளக்கு, மின்சாரம் போனால் கண்ணாடிப்பெட்டி இயங்க ஜெனரேட்டர், வருவோர் போவோர் முறை செய்ய ஜவுளி வாங்கப் போய் வர ஆட்டோ ஏற்பாடு, பட்டாசு, போஸ்டர், மேளம், ஒயிலாட்டம், ஒப்பாரி ஏற்பாடு, இறுதி ஊர்வல ஏற்பாடு, மயான ஏற்பாடு...இன்னும் இன்னும்...

போனில் நண்பனிடம் பேசினான் கார்த்திக்...டே மச்சி...கல்யாண வீடு மாதிரியே சாவு வீட்டில் கூட எவ்ள வேலைடா...பேசாம நாம இதுக்காக ஒரு காண்டிராக்டிங் சர்வீஸ் ஆரம்பிச்சுரலாம்...சேவை செஞ்ச புண்ணியமும் சேரும்...வேலை கிடச்ச மாதிரியும் இருக்கும்..
மச்சி..சிரிக்காதடா..சீரியஸாச் சொல்றேன்..

**********

உலகக் கோப்பை கிரிக்கெட் பிரியர்கள் வேறு..அவ்வப்போது போனில் ஸ்கோர் கேட்டார்கள் ஆரம்பத்தில்..பின் மெதுவாக ராஜேஷிடம் சொல்லி டிவியைத் தோட்டத்துப் பக்கம் கொண்டுவரச்செய்து விளையாட்டைப் பார்க்க ஆரம்பித்தார்கள்...நடுநடுவில் கூட்டணிக் களேபரத்துக் குளறுபடிச் செய்திகள் வேறு...அடுத்து யார் ஆட்சியைப் பிடிப்பார்கள் என்ற அலசல்கள், உரசல்கள் வேறு..

அய்யோ...கோபி, மகாவுக்கு ராமேஸ்வரத்தில் கல்யாணம் ஆச்சோ இல்லியோ தெரியலியே...ஒரே கலாட்டாவா இருந்துச்சு...ஒரு மனைவி அங்கலாய்க்க..

கணவன் அப்பாவியாய்ச் சொன்னான்........போன் போட்டுக் கேட்க வேண்டியதுதானே..

அய்யோ..அய்யோ...இது நாதஸ்வரம் சீரியல் கோபி, மகா...உங்களுக்கு ஒரு மண்ணும் தெரியாது..

ரொம்ப அவசியம்...

ஆமா எவனோ எவனோடயோ ஆடறான்...இந்தியா கூட இல்ல...உங்களுக்கு மட்டும் சாவு வீட்லயும் கிரிக்கெட்டும், அரசியலும் கேக்குதோ...ஒரு நிமிஷம் சானல் மாத்தி வச்சா என்ன குறஞ்சா போய்டுவீங்க...

************

வீட்டுக்குள்ள இருக்க முடியல...என்னதான் ஐஸ் பொட்டின்னாலும் சரியா வராது போலிருக்கு...ஏதோ வாசனை வர மாதிரி இருக்கு..இந்தக் கண்ணன் எப்போதான் வரப்போறானோ..

பிள்ளைகள் தனியா விட்டுட்டு வந்திருக்கேன்....

ஆபிசில் ஆடிட் நடக்குது...லீவு போட முடியாது..
பெரியப்பா பிள்ளை கல்யாணத்துக்குப் போகணும்..

காரியத்தவாது பத்து பதினைஞ்சு நாள்னு நீட்டிட்டுப் போகாம உடனே சட்டுப் புட்டுன்னு முடிச்சா நல்லாருக்கும்..அதுக்கு வேற லீவு போட்டுட்டு இவ்ள தூரம் வர முடியாது...

சான்ஸே இல்ல..காரியத்துக்குத்தும் சேத்துதான் இங்க உக்காந்தாச்சே...காரியத்துக்கு வேற எங்க வர்றது..

இப்படி அவரவர் வேலை அவரவர்க்கு...

************
இரண்டாம் நாள் இரவு வந்து சேர்ந்தான் கலிஃபோர்னியாக் கண்ணன்...

ஆமா...அவன் மட்டும் வந்திருக்கான்..பொண்டாட்டி பிள்ளைகளைக் காணோம்...

பிள்ளைகளுக்குப் பரீட்சை...அவளுக்கு லீவு கிடைக்கலியாம்..போன மாசம்தான் தங்கச்சி கல்யாணத்துக்கு வந்துட்டுப் போயிருக்கா...

*************

ஒரு வழியாக ராமநாதன் இறந்து ஐம்பத்தைந்து மணிநேரங்கள் கடந்த நிலையில் இறுதிக்காரியங்கள் நடந்தேறின. நெஞ்சு வலியால் ஒரு முறை செத்த அவர், சூழ்நிலைகளால் மீண்டும் மீண்டும் சாகடிக்கப்பட்டார்.

கண்ணன் கிளம்பும்போது அம்மா சொன்னாள்: நான்லாம் செத்தா உடனே எல்லாத்தையும் முடிச்சுடுங்கடா....அவங்க அவங்க சவுகரியத்துக்குப் பதினோராம் நாள் காரியத்துக்கு வந்தால் போதும்....யாருக்கும் கஷ்டம் வேணாம்..

குறளின் குரல் - 24

2011-03-10T08:03:00.000+03:00

பால்: பொருட்பால் இயல்: அமைச்சியல்
அதிகாரம்: 72. அவை அறிதல்
குறள் எண்: 718

உணர்வ துடையார்முற் சொல்லல் வளர்வதன்
பாத்தியு னீர்சொரிந் தற்று.

உணர்வது உடையார் முன் சொல்லல் வளர்வதன்
பாத்தியுள் நீர் சொரிந்தற்று.

விளக்கம்:

பிறர் உணர்த்தத் தேவையின்றித் தாமே தம் திறத்தால் உணர்ந்து கொள்ளும் ஆற்றலுடையவர் முன் ஒன்றைப் பேசுதல், தானாகவே வளரும் பயிர்கள் நின்ற பாத்தியில் தண்ணீர் பாய்ச்சுவதற்கு ஒப்பாகும்.

-------------

பால்: பொருட்பால்
இயல்: குடியியல்
அதிகாரம்: 101. நன்றி இல் செல்வம்
(நன்மை இல்லாத செல்வம்)
குறள் எண்: 1006

ஏதம் பெருஞ்செல்வந் தான்றுவ்வான் றக்கார்க்கொன்
றீத லியல்பிலா தான்.

ஏதம் பெருஞ்செல்வம் - தான் துவ்வான், தக்கார்க்கு ஒன்று
ஈதல் இயல்பு இலாதான்.

விளக்கம்:

தானும் அனுபவிக்காமல், தேவைப்படும் பிறர்க்கும் அவர் வேண்டுவது ஒன்றைக் கொடுத்து உதவும் இயல்பு இல்லாதவன், தான் பெற்ற பெருஞ்செல்வத்திற்குத் தானே கேடாவான். அச்செல்வமும் அவனுக்கும், பிறர்க்கும் பயன் இன்றியே கெட்டழியும். பயன்படுத்தப்பாடாத கனி வீணாகக் கெட்டுத்தான் அழியும். அதுபோல் உதவும் குணம் இல்லாதவன் பெற்ற செல்வமும் அவனுக்கும், பிறருக்கும் நன்மை தராமல் வீணாக அழியும்.

ஏதம் - துன்பம்,குற்றம்,கேடு

-----------------

பால்: பொருட்பால்
இயல்: நட்பியல்
அதிகாரம்: 80. நட்பாராய்தல்
குறள் எண்: 796

கேட்டினு முண்டோ ருறுதி கிளைஞரை
நீட்டி யளப்பதோர் கோல்.

கேட்டினும் உண்டு ஓர் உறுதி, கிளைஞரை
நீட்டி அளப்பதோர் கோல்.

விளக்கம்:

ஒருவனுக்குத் துன்பம் வந்த போதும், அத்துன்பத்தால் ஒரு நல்ல பயனுள்ளது. அது தன்னைச் சூழ்ந்துள்ள நட்பின் தன்மையைப் புரிந்து கொள்ள நல்லதொரு வாய்ப்பாகும். நண்பர்கள் தன்னிடம் எந்த அளவு அன்புடையவர்களாய் இருக்கிறார்கள் என்று நன்றாக அளந்து அறிய ஓர் அளவுகோல் ஆகும் அத்துன்பம்.

துன்பம் வரும்போது, சுற்றியுள்ளவர் ஒவ்வொருவராக நீங்குவர். உண்மையான அன்புடையவரே இறுதி வரை உடன் நிற்பர். இங்ஙனம் ஒருவனுக்கு வரும் துன்பம் உண்மையான அன்பை அறிந்து கொள்ளப் பயன்படுகிறது.

------------------------------

பால்: அறத்துப்பால்
இயல்: இல்லறவியல்
அதிகாரம்: 13. அடக்கமுடைமை
குறள் எண்: 130

கதங்காத்துக் கற்றடங்க லாற்றுவான் செவ்வி
யறம்பார்க்கு மாற்றி னுழைந்து.

கதம் காத்து, கற்று, அடங்கல் ஆற்றுவான் செவ்வி
அறம் பார்க்கும் ஆற்றின் நுழைந்து.

விளக்கம்:

கடுங்கோபத்தைக் காத்து, கற்கவேண்டியவற்றைக் கற்று அறிந்து, அதனால் வரக்கூடிய ஒருவகையான தற்பெருமையையும் அடக்கி ஆள வல்லவராய் இருந்து தன் கடமைகளைச் சரிவரச் செய்யும் தன்மை உடையவராயின், அறம் அவர் வழியைத் தேடிச் சென்று, அவரை அடைய ஏற்ற சமயம் பார்த்து நிற்கும். இவ்வாறு நல்ல தன்மைகள் பெற்று அதன் வழி நடந்தாலே போதும். அறத்தை நாம் தேட வேண்டியதில்லை. அதுவே தக்க சமயத்தில் நம்மைத் தேடி வந்து வேண்டியவற்றை எல்லாம் தந்து சிறப்பிக்கும்.

செவ்வி - ஏற்ற சமயம்

--------------------

பால்: பொருட்பால்
இயல்: அமைச்சியல்
அதிகாரம்: 71. குறிப்பறிதல்
குறள் எண்: 708

முகநோக்கி நிற்க வமையு மகநோக்கி
யுற்ற துணர்வார்ப் பெறின்.

முகம் நோக்கி நிற்க அமையும் - அகம் நோக்கி
உற்றது உணர்வார்ப் பெறின்.

விளக்கம்:

பிறர் உள்ளத்தைக் குறிப்பால் உணர்ந்து கொள்ளும் வல்லமை உடையவரைப் பெற்றால், ஒருவர் முகத்தை ஒருவர் பார்த்து நின்றாலே போதும். அறிய வேண்டிய செய்தியைத் தாமாகாவே அறிந்து கொள்ள முடியும். ஒருவருக்கு ஒருவர் வார்த்தைப் பரிமாற்றம் எதுவும் வேண்டியதில்லை. முகத்தைப் பார்த்து, குறிப்புகள் உணர்ந்து, செய்தியைப் புரிந்து கொள்ள முடியும்.

-----------

பால்: இன்பத்துப்பால்
இயல்: களவியல்
அதிகாரம்: 115. அலர் அறிவுறுத்தல்
குறள் எண்: 1144

கவ்வையாற் கவ்விது காம மதுவின்றேற்
றவ்வென்னுந் தன்மை யிழந்து.

கவ்வையான் கவ்விது, காமம்; அது இன்றேல்,
தவ்வென்னும், தன்மை இழந்து.

விளக்கம்:

ஊரார் எம் காதலைப் பழித்துப் பேசுவதால் என்னுடைய காதல் உணர்வானது மேலும் மேலும் வளர்ந்து இன்பம் தருகிறது. அந்தப் பழிச்சொல் மட்டும் இல்லையென்றால் இன்பம் தரும் தன் தனித்தன்மையை இழந்து, அக்காதல் உணர்வு குறைந்து சுவையற்றதாகிவிடும்.

பழிச்சொல்லும் காதல் உணர்வை வளர்த்து இன்பம் தரும் விந்தை காதலில் மட்டுமே சாத்தியம்.

அலர் - மகிழ்ச்சி, மலர்ந்த பூ, நீர், மஞ்சள், மிளகுக்கொடி, (இங்கே) பழிச்சொல்

உடன்போக்காகத் தலைவி தலைவனுடன் சென்ற பிறகு அவளது களவு வாழ்க்கையைப் பற்றி அயலவர் பலரும் அறிந்து கொள்வர். அதன் தொடர்ச்சியாய் அது பற்றியே பேசுவர். அதற்கு அலர் என்று பெயர்.

கவ்வை - ஒலி, துன்பம், பொறாமை, கவலை, கள், செயல், எள் இளங்காய், ஆயிலியம், துன்பம், பழிச்சொல்

தவ்வுதல் - குறைதல்

குறளின் குரல் - 23

2011-03-07T18:48:00.000+03:00

பால்: அறத்துப்பால் இயல்: இல்லறவியல்
அதிகாரம்: 15. பிறன் இல் விழையாமை
குறள் எண்: 144

எனைத்துணைய ராயினு மென்னாந் தினைத்துணையுந்
தேரான் பிறனில் புகல்.

எனைத் துணையர் ஆயினும் என்னாம் - தினைத் துணையும்
தேரான், பிறன் இல் புகல்?

விளக்கம்:

வரக்கூடிய இழிவைத் திணையளவும் சிந்திக்காமல் பிறன் மனைவியை விரும்புபவன், எத்தனை பெருமை வாய்ந்தவனாய் இருந்து என்ன பயன்? தீய எண்ணமுடையவன் ஆதலால் அவன் பெருமை அனைத்தும் இழந்து, இழிவையே அடைவான்.

------------------------

பால்: பொருட்பால்
இயல்: குடியியல்
அதிகாரம்: 98. பெருமை
குறள் எண்: 972

பிறப்பொக்கு மெல்லா வுயிர்க்குஞ் சிறப்பொவ்வா
செய்தொழில் வேற்றுமை யான்.

பிறப்பொக்கும் எல்லா உயிர்க்கும்; சிறப்பு ஒவ்வா,
செய்தொழில் வேற்றுமையான்.

விளக்கம்:

பிறப்பினால் அனைவரும் ஒத்த தன்மையுடையவர்களே. அவரவர் செய்யும் தொழில் காரணமாய் வேறுபட்ட தன்மையுடையவர்களாக இருக்கின்றார்கள். அவரவர் செய்கின்ற தொழில் வேறுபாடுகள் காரணமாய் அவரவருடைய சிறப்புநிலை வேறுபட்டு அமைகின்றது.

எல்லாத் தொழில்களுக்கும், அது அதற்கென்று ஒரு தனிச்சிறப்பு உண்டு. தொழிலில் உயர்வு தாழ்வு இல்லை. அது தரக்கூடிய வசதி வாய்ப்புகளின் காரணமாக மக்களின் சிறப்புநிலை வேறுபட்டு அமைகின்றது.

------------------

பால்: அறத்துப்பால்
இயல்: துறவறவியல்
அதிகாரம்: 36. மெய்யுணர்தல்
குறள் எண்: 354

ஐயுணர் வெய்தியக் கண்ணும் பயமின்றே
மெய்யுணர் வில்லா தவர்க்கு.

ஐஉணர்வு எய்தியக் கண்ணும் பயம் இன்றே-
மெய் உணர்வு இல்லாதவர்க்கு.

விளக்கம்:

மெய், வாய், கண், மூக்கு, செவி - ஆகிய ஐம்பொறிகளின் மூலம் அறியப்படும் ஐம்புலன்களைத் தன்வயப்படுத்திக் கட்டுக்குள் வைத்திருந்தாலும், உண்மைப் பொருளை உணரும் ஆற்றல் இல்லாதவர்களுக்கு, ஐம்புலன்களின் உணர்வாற்றலால் ஒரு பயனும் இல்லை. ஐம்புலன்களின் உணர்வாற்றலை விட, மெய்யுணர்வின் அறிவாற்றலே வலிமை வாய்ந்தது.

-------------------

பால்: பொருட்பால்
இயல்: நட்பியல்
அதிகாரம்: 93. கள்ளுண்ணாமை
குறள் எண்: 926

துஞ்சினார் செத்தாரின் வேறல்ல ரெஞ்ஞான்று
நஞ்சுண்பார் கள்ளுண் பவர்.

துஞ்சினார் செத்தாரின் வேறு அல்லர்; எஞ்ஞான்றும்
நஞ்சு உண்பார் கள் உண்பவர்.

விளக்கம்:

நன்கு ஆழ்ந்த உறக்கத்தில் இருப்பவர்கள், உயிருள்ளவர்களே என்றாலும், அந்த நிலையில் அவர்கள் தோற்றத்தால் இறந்தவரேயன்றி வேறல்லர். அது போல எப்போதும் கள் குடிப்பவர்கள், நஞ்சினை உண்டவரேயன்றி வேறல்லர்.
---------------------

பால்: இன்பத்துப்பால்
இயல்: கற்பியல்
அதிகாரம்: 118. கண் விதுப்பு அழிதல்
(காணும் துடிப்பால் கண் வருந்துதல்)
குறள் எண்: 1176

ஓஓ வினிதெ யெமக்கிந்நோய் செய்தகண்
டாஅ மிதற்பட் யது.

ஓ, இனிதே! எமக்கு இந்நோய் செய்த கண்
தாஅம் இதற்பட்டது.

விளக்கம்:

எமக்கு இக்காமநோய் வரச் செய்தவை எம் கண்கள்தான்..இன்று அக்கண்கள் தலைவனைக் காணாமல், அவர்தம் பிரிவின் துயரால் வருந்தி அழுகின்றன...ஓ, மிகவும் இனிது இனிது! எமக்குத் துன்பம் தந்த கண்கள் தாமும் துன்புறட்டும். துன்பம் செய்தவர்க்குத் துன்பம் நேர்ந்தால் மகிழ்ச்சிதானே!

------------------

பால்: அறத்துப்பால்
இயல்: இல்லறவியல்
அதிகாரம்: 05. இல்வாழ்க்கை
குறள் எண்: 48

ஆற்றி னொழுக்கி யறனிழுக்கா வில்வாழ்க்கை
நோற்பாரி னோன்மை யுடைத்து.

ஆற்றின் ஒழுக்கி, அறன் இழுக்கா இல்வாழ்க்கை
நோற்பாரின் நோன்மை உடைத்து.

விளக்கம்:

மற்றவர்கள் அனைவரும் அவரவர் நெறிப்படி முறையாக வாழத் துணைநின்று, தானும் அறநெறியில் சிறிதும் தவறாது வாழ்பவனின் இல்வாழ்க்கை, துன்பங்களைத் தாங்கித் தவம் செய்தவரின் தவத்தைவிட மிக்க வலிமையுடையதாகும்.

தேர்தல் தேர்வு

2011-02-28T17:37:00.002+03:00

கொள்கை மறந்த
கொள்ளை
கூட்டுச்சதி மறந்த
கூட்டணிச்சதி...

மக்கள்நலம் மறந்த
பணநலம்
நியாய அநியாயம் மறந்த
லஞ்சலாவண்யம்...

இனப்படுகொலை மறந்த
மனப்படுகொலை
மொழிமாண்பு மறந்த
மாண்புமிகுக்கள்.....

நாளைய, நேற்றைய தவறுகள் மறந்த
இன்றைய நேசமணிகள்
கழகக் கலகங்களை மறந்த
கண்மணிகள்...

உடன்பட மறந்த
உடன்பிறப்புகள்
இரக்கம் மறந்த
இரத்தத்தின் இரத்தங்கள்...

தேர்தல் களங்களில்
தேர்வுகள் ஆரம்பம்!

வெற்றி பெற்றதும்
ஆட்சியமைப்பு!
கூட்டணி தேராவிட்டால்
ஆட்சிக்கலைப்பு!
குதிரைபேரத்தில் குளிர்காய்ந்து
மீண்டும் கைகோர்ப்பு!

தேர்தல் களங்களில்
தேர்வுகள் ஆரம்பம்!

இக்கழகமோ...
அக்கழகமோ...
அமோகமாய் வெற்றிதான்!

இதற்கு அது பரவாயில்லை!
அதற்கு இது பரவாயில்லை!
பாழாய்ப்போன நம்பிக்கையில்
மறுபடியும் மறுபடியும்
மறுதேர்வு எழுதினாலும்
பொதுமக்களுக்கு மட்டும்
பாரம்பரியத் தோல்விதான்!

குறளின் குரல் - 22

2011-02-28T17:28:00.000+03:00

பால்: பொருட்பால்
இயல்: குடியியல்
அதிகாரம்: 104. உழவு
குறள் எண்: 1034

பலகுடை நீழலுந் தங்குடைக்கீழ்க் காண்ப
ரலகுடை நீழ லவர்.

பல குடை நீழலும் தம் குடைக் கீழ்க் காண்பர்
அலகு உடை நீழலவர்.

விளக்கம்:

உழவுத் தொழிலாம் சிறந்த தொழில் செய்து, நெற்பயிரை விளைவித்து உயர்ந்து நிற்கும் கதிர்க்குடையின் கீழ் வாழும் ஈர நெஞ்சுள்ள உழவர் பெருமக்கள், நாடாளும் அரசர் பலரின் வெண்கொற்றக் குடையின் கீழ் தங்கிய உலகத்தின் நிழலையும் கூடத் தம் கதிர்க்குடையின் கீழ்க் காண வல்லவர். உழவனின் ஆட்சிதான் அரசாட்சி செய்யவே வழிவகுத்து, துணைபுரிந்து நிற்கும்.

அரசர்களின் வெண்கொற்றக் குடைகளும் உழவர்களின் கதிர்க்குடைகளிடத்துதான் தஞ்சம் பெற வேண்டும்.

------------

பால்: பொருட்பால்
இயல்: குடியியல்
அதிகாரம்: 105. நல்குரவு
குறள் எண்: 1048

இன்றும் வருவது கொல்லோ நெருநலுங்
கொன்றது போலு நிரப்பு.

இன்றும் வருவது கொல்லோ-நெருநலும்
கொன்றது போலும் நிரப்பு.

விளக்கம்:

'நேற்று வந்து என்னைக் கொன்றது போன்றதொரு துன்பத்தைத் தந்த நல்குரவு / வறுமை, இன்றும் என்னை வந்து கொல்லுமோ? அப்படி வந்தால் நான் என்ன செய்வேன்?' என்று எண்ணி ஏழை ஒவ்வொரு நாளும் கலங்கி நிற்பான். வறுமையுற்ற ஏழையை, நாள் ஒவ்வொன்றும் யுகம் ஒன்றாய் மாறித் துன்புறுத்தும்.
----------------------

பால்: பொருட்பால்
இயல்: குடியியல்
அதிகாரம்: 107. இரவு அச்சம்
குறள் எண்: 1065

தெண்ணீ ரடுபுற்கை யாயினுந் தாடந்த
துண்ணலி னூங்கினிய தில்.

தெள் நீர் அடு புற்கை ஆயினும், தாள் தந்தது
உண்ணலின் ஊங்கு இனியது இல்.

விளக்கம்:

தெளிந்த நீரைப் போலத் தோன்றும் அரிசிக் கஞ்சியே ஆனாலும், தன் உழைப்பு மற்றும் அறநெறியோடு கூடிய முயற்சியால் தான் பெற்றதை உண்பதே இனிமமயானதாகும். அதைவிட இனிமை வாய்ந்தது வேறு எதுவும் இல்லை. பிறரிடம் இரப்பதற்கு அஞ்சி, தம் உழைப்பால் தம் பொருள் ஈட்டுவதே இன்பம்.
---------------------

பால்: இன்பத்துப்பால்
இயல்: கற்பியல்
அதிகாரம்: 124. உறுப்பு நலனழிதல்
குறள் எண்: 1236
தொடியொடு தோணெகிழ நோவ லவரைக
கொடிய ரெனக்கூற னொந்து.

தொடியொடு தோள் நெகிழ நோவல் - அவரை,
கொடியர்' எனக் கூறல் நொந்து.

விளக்கம்:

தலைவனைப் பிரிந்து நான் வருந்துவதால், என் தோள்கள் மெலிய, வளையல்கள் கழன்று விழுகின்றன. இவ்வாறு நான் வருந்தக்கண்ட தோழியர் அவரைக் 'கொடியவர்' என்று குற்றம் கூறுகின்றனர். அதைக் கேட்டு நான் மனம் நொந்து போகின்றேன். அவரைப் பிரிந்ததால் ஏற்படும் துன்பத்தைவிடத் தோழியர் அவரைப் பழிப்பதுதான் மிகவும் துன்புறுத்துகிறது.
-----------------

பால்: பொருட்பால்
இயல்: அரசியல்
அதிகாரம்: 45. பெரியாரைத் துணைக்கோடல்
குறள் எண்: 449

முதலிலார்க் கூதிய மில்லை மதலையாஞ்
சார்பிலார்க் கில்லை நிலை.

முதல் இலார்க்கு ஊதியம் இல்லை; மதலை ஆம்
சார்பு இலார்க்கு இல்லை, நிலை.

விளக்கம்:

முதல் போட வழியில்லாத வியாபாரிகளுக்கு, நிலையான ஊதியம் ஈட்டுவதற்கான வழியில்லை. அதுபோலத் தன்னைத் தாங்கிப் பிடித்து, காத்து, துணையாய் இருந்து உதவி செய்யவல்ல பெரியவர்களின் சார்பு / துணை இல்லாதவர்களுக்கு நிலையான வாழ்வும் இல்லை.

வாழ்வில் நிலைபெறுவதும், முன்னேறுவதும் பெரியோர் துணையிருந்தால் எளிதாக நடந்தேறும்.

கட்டடத்தைத் தாங்கும் மதலை / உத்தரம் போன்றதாகும் பெரியோரின் துணை.

--------------------

பால்: பொருட்பால்
இயல்: குடியியல்
அதிகாரம்: 97. மானம்
குறள் எண்: 963

பெருக்கத்து வேண்டும் பணிதல் சிறிய
சுருக்கத்து வேண்டு முயர்வு.

பெருக்கத்து வேண்டும் பணிதல்; சிறிய
சுருக்கத்து வேண்டும் உயர்வு.

விளக்கம்:

செல்வம் பெருகி நிறைந்திருக்கும் காலத்தில், அச்செல்வம் உயர்வைத் தரும். அந்த நேரத்தில், பணிவுடைமைப் பண்போடு நடந்து கொள்ள வேண்டும்.

செல்வம் குறைந்து சுருங்கியிருக்கும் காலத்தில், அந்நிலை தாழ்வை உண்டாக்கும். அந்த நேரத்தில், மானம் இழக்காத உயர்ந்த பெருமித உணர்வோடு நடந்து கொள்ள வேண்டும்.

குறளின் குரல் - 21

2011-01-30T20:29:00.000+03:00

பால்: அறத்துப்பால் இயல்: ஊழியல்
அதிகாரம்: 38. ஊழ்
குறள் எண்: 375

நல்லவை யெல்லாஅந் தீயவாந் தீயவு
நல்லவாஞ் செல்வஞ் செயற்கு.

நல்லவை எல்லாம் அம் தீய ஆம்; தீயவும்
நல்ல ஆம்; செல்வம் செயற்கு.

விளக்கம்:

செல்வம் ஈட்டும் முயற்சியின் போது, நல்லவை என்று கருதுபவையெல்லாம் தீயனவாய் மாறும்; தீயன என்று கருதுபவை எல்லாம் நல்லனவாய் மாறும்.

ஊழின் காரணமாய்க் காலம், கருவி, இடம், முயற்சி எல்லாம் உதவியாய் மாறவும் கூடும்; எதிராக மாறி அழிக்கவும் கூடும்.

ஊழ் - வினைப்பயன் / விதி

---------

பால்: அறத்துப்பால்
இயல்: இல்லறவியல்
அதிகாரம்: 11. செய்ந்நன்றியறிதல்
குறள் எண்: 106

மறவற்க மாசற்றார் கேண்மை துறவற்க
துன்பத்துட் டுப்பாயார் நட்பு.

மறவற்க மாசு அற்றார் கேண்மை துறவற்க
துன்பத்துள் துப்பு ஆயார் நட்பு.

விளக்கம்:

மனதில் அழுக்கில்லாத குற்றமற்றவரின் நட்பு, அவர் செய்த உதவி, அவர் உறவு - இவற்றை மறத்தல் கூடாது. துன்பம் வந்த போது அருகில் துணையாய் நின்றிருந்து உதவி புரிந்தவரின் நட்பைக் கைவிடக்கூடாது. உதவியால் நட்பும் நட்பால் உதவியும் - இரண்டும் ஒன்றையொன்று தொடரும் தன்மை வாய்ந்தவை.

-----------------------

பால்: பொருட்பால்
இயல்: அரசியல்
அதிகாரம்: 62. ஆள்வினையுடைமை
குறள் எண்: 620

ஊழையு முப்பக்கங் காண்ப ருலைவின்றித்
தாழா துஞற்று பவர்.

ஊழையும் உப்பக்கம் காண்பர் - உலைவு இன்றித்
தாழாது உஞற்றுபவர்.

விளக்கம்:

தடைகள் வரும்போது மனம் குலையாது, சோர்வடையாது, தடுக்கும் விதியாலும் வீழாது, விடாமுயற்சியுடன் செயல்பட்டுக் காரியத்தில் கடும் உழைப்பை மேற்கொள்பவர், அங்ஙனம் தடுக்கும் விதியையும் புறமுதுகுகாட்டி ஓடச் செய்து வெல்வர்.

-------------------------
பால்: பொருட்பால்
இயல்: நட்பியல்
அதிகாரம்: 95. மருந்து
குறள் எண்: 942

மருந்தென வேண்டாவாம் யாக்கைக் கருந்திய
தற்றது போற்றி யுணின்.

மருந்து என வேண்டாவாம், யாக்கைக்கு - அருந்தியது
அற்றாது போற்றி உணின்.

விளக்கம்:

ஒருவர் ஏற்கனவே தான் உண்ட உணவு செரித்துவிட்டது என்பதை அறிகுறிகளால் நன்கு அறிந்து கொண்டபின் அடுத்து உணவு உண்டால், அவர் உடம்புக்கு மருந்து என்ற ஒன்று தேவையில்லை.
----------------------

பால்: அறத்துப்பால்
இயல்: இல்லறவியல்
அதிகாரம்: 08. அன்புடைமை
குறள் எண்: 76

அறத்திற்கே யன்புசார் பென்ப வறியார்
மறத்திற்கு மஃதே துணை.

அறத்திற்கே அன்பு சார்பு என்ப அறியார்
மறத்திற்கும் அஃதே துணை.

விளக்கம்:

'அறத்தை வலியுறுத்தி நிற்கும் நல்ல செயல்களுக்கு மட்டுமே அன்பு துணையாகும்' என்று கூறுவர் அறியாதவர். தீமையை எதிர்த்து, நன்மை சார்ந்து நிற்கும் வீரச் செயல்களுக்கும் கூட அன்பே துணையாகும்.

-------------------

பால்: பொருட்பால்
இயல்: அரசியல்
அதிகாரம்: 91. பெண்வழிச் சேறல்
குறள் எண்: 907

பெண்ணேவல் செய்தொழுகு மாண்மையி னாணுடைப்
பெண்ணே பெருமை யுடைத்து.

பெண் ஏவல் செய்து ஒழுகும் ஆண்மையின், நாணுடைப்
பெண்ணே பெருமை உடைத்து.

விளக்கம்:

சிந்திக்கும் துணிவின்றி, பெண் / மனைவி ஏவியதையெல்லாம் கேட்டு அதன்படி கண்மூடித்தனமாய் நடந்து கொள்பவனின் ஆண் தன்மையைக் காட்டிலும் இயல்பான நாணமுடைய பெண்தன்மையே மேலான பெருமையுடையதாகும்.

சில நேரங்களில் சில உணர்வுகள்

2011-01-24T10:28:00.001+03:00

'பொன்னியின் செல்வன்' கனவுகள்

பலரின் நீண்ட நாள் கனவு 'பொன்னியின் செல்வன்' நிகழ்வுகளைத் திரையில் காண வேண்டுமென்பது. மக்கள் தொலைக்காட்சியும் இதற்கான நடிகர் தேர்வுக்கான அறிவுப்புகளை அளித்த வண்ணம் இருக்கிறது. இதற்கிடையில் சன் பிக்சர்ஸ் நிறுவனத்தாரும் இப்படத்தை 500 கோடி ரூபாய் செலவில் எடுப்பதாகப் பரவலாகப் பேசப்படுகிறது. சங்கர் இயக்குவதாக ஒரு செய்தி சொல்ல, மணிரத்னம் இயக்குவதாகவும் சொல்லப்படுகிறது.

கமல், ரஜினி நடிப்பதாகவும் பேசப்படுகிறது. இதற்காகவே காத்திருக்கின்ற பலருள் நானும் ஒருத்தி. பலரின் கனவு கைகூடி வரும் வேளையில், சில பயங்களும் எழாமல் இல்லை. நன்றாகச் செய்ய வேண்டும் என்ற எதிர்பார்ப்பு அனைத்து தரப்பினருக்கும் உண்டு.

அன்றிலிருந்து ஜெமினி, எம்.ஜி.ஆர், கமல் மற்றும் பலரும் செய்ய நினைத்துக் கைவிட்ட முயற்சி, இத்தனை ஆண்டுகளுக்குப் பின், தொழில்நுட்பரீதியாக பலவகை முன்னேற்றங்கள் உள்ள இக்கால கட்டத்தில் எளிதாகவே இருக்கும்.

பாத்திரங்களின் தேர்வு, காட்சி திரைக்கதை அமைப்பு, வசனம், ஒளிப்பதிவு, இசை, இயக்கம் என்று அனைத்துத் தரப்பினருக்கும் சவாலாய் அமையப் போகும் இப்பணி. அவரவர் தனிப்பட்ட கருத்தை, பாணியைத் திணிக்காமல் புத்தக அழகு சற்றும் குறையாமல் கால அவகாசம் சரிவர எடுத்துக் கொண்டு செய்வார்களேயானால்...என்னை போன்ற பலரின் கனவுகள் அழகாய் மெய்ப்பட வாய்ப்புண்டு.

நீயா நானா....இது தகுமா தகுமா?

தொலைக்காட்சி நிகழ்ச்சிகளைப் பற்றி எவ்வளவு விமரிசனங்கள் வந்தாலும் இவர்கள் திருந்துகின்ற வழியாய்த் தெரியவில்லை. நல்ல நல்ல செய்திகளைத் தரும் நிகழ்ச்சிகள் கூட மூன்றாம் தரத்துக்கு இறங்கிப் போகின்ற கொடுமை.....தாங்கவில்லை.

நீயா நானா...நல்லதொரு நிகழ்ச்சி(இனிமேல் அப்படிச் சொல்ல மனம் வரவில்லை.) பிரபலமாவதற்கும், நல்ல பெயர் எடுப்பதற்கும், சுவாரசியம்(?!) சேர்ப்பதற்கும் சில காட்சிகளைத் திட்டமிட்டு, ஒத்திகையுடன் சித்தரித்து அரங்கேற்றுவதாகக் கேள்விப்பட்டதுண்டு. என்றாலும் அதையெல்லாம் மீறி ஆக்கப்பூர்வமான வாக்குவாதங்கள் வாயிலாக நல்ல செய்திகளையும் பல நேரங்களில் நமக்குத் தந்துள்ளது இந்நிகழ்ச்சி.

நேற்று நடந்த நிகழ்ச்சியில் கணவன் - மனைவி விவாதம் என்ற பெயரில் அடித்த கூத்தை என்ன வார்த்தைகளால் விமர்சிப்பது என்றே புரியவில்லை. ஆங்கிலம் பேசத் தெரியாது, கர்னாடக சங்கீதம் ரசிக்கத் தெரியாது, சமையலை ரசித்துச் சப்பிடத் தெரியாது...என்று வார்த்தைகளால் ஒருவரையொருவர் தாக்கிக் கொண்ட பாங்கு, போனால் போகிறதென்று மன்னிப்பும் கேட்டு...அடா அடா .....

இவர்களால் எப்படி இது முடிகிறது? இவர்கள் பெற்றோர், உறவினர், பிள்ளைகள், சம்பந்தமேயில்லாத மூன்றாவது மனிதர்கள் என்று அனைவரும் பார்ப்பார்கள் என்ற உணர்வு கொஞ்சம் கூட இன்றி....நாராசம்!

இவர்கள் பெற்றெடுத்த பிள்ளைகளை எங்ஙனம் வழிநடத்தப் போகிறார்கள்?

குறளின் குரல் - 20

2011-01-24T10:17:00.000+03:00

பால்: அறத்துப்பால் இயல்: இல்லறவியல்
அதிகாரம்:06. வாழ்க்கைத் துணைநலம்
குறள் எண்: 57

சிறைக்காக்குங் காப்பெவன் செய்யு மகளிர்
நிறைகாக்குங் காப்பே தலை.

சிறை காக்கும் காப்பு எவன் செய்யும்? மகளிர்
நிறை காக்கும் காப்பே தலை.

விளக்கம்:

பெண்ணைச் சிறைவைத்துக் காக்கும் காவல் பயன்படாது. பெண் தன்னைத்தானே காத்துக் கொள்ள வேண்டும். தன் மனதை ஒருவழி நிறுத்தும் நிறை காப்பே / பண்பே / நற்குணமே சிறந்ததாகும்.

-------------------------

பால்: அறத்துப்பால்
இயல்: இல்லறவியல்
அதிகாரம் :07. மக்கட்பேறு
குறள் எண்: 61

பெறுமவற்றுள் யாமறிவ தில்லை யறிவறிந்த
மக்கட்பே றல்ல பிற.

பெறும் அவற்றுள் யாம் அறிவது இல்லை அறிவு அறிந்த
மக்கட்பேறு அல்ல பிற.

விளக்கம்:

அறிய வேண்டியதை அறியும் அறிவார்ந்த பிள்ளைகளைப் பெறுவதை விட, உலகில் ஒருவர் பெறக்கூடிய சிறந்த செல்வம் / பேறு வேறு எதையும் யாம் அறியவில்லை.

----------------------
பால்: பொருட்பால்
இயல்: அரசியல்
அதிகாரம் :61. மடியின்மை
குறள் எண்: 605

நெடுநீர் மறவி மடிதுயி னான்குங்
கெடுநீரார் காமக் கலன்.

நெடு நீர், மறவி, மடி, துயில் நான்கும்
கெடுநீரார் காமக் கலன்.

விளக்கம்:

விரைந்து செய்ய வேண்டிய செயலைக் காலம் நீட்டித்துச் செய்தல், செய்ய வேண்டிய / நினைத்த செயலைச் செய்ய மறத்தல், அந்தச் செயலைச் செய்யாமல் சோம்பலாய் இருத்தல், காலம் கருதாது தேவைக்கு அதிகமாயத் தூங்கும் தூக்கம் - இவை நான்கும் தம்மை விரும்பி ஏறியவரை நடுக்கடலில் தள்ளிவிடும் மரக் கலங்கள் / கப்பல்கள் போன்றவை. இவை நான்கையும் விரும்பிச் செய்தோமானால் அழிவு நிச்சயமானது. எனவே இவை தவிர்க்கவேண்டியவை.

---------------

பால்: பொருட்பால்
இயல்: அரசியல்
அதிகாரம் 60. ஊக்கமுடைமை
குறள் எண்: 596

உள்ளுவ தெல்லா முயர்வுள்ளன் மற்றது
தள்ளினும் தள்ளாமை நீர்த்து.

உள்ளுவது எல்லாம் உயர்வு உள்ளல், மற்று அது
தள்ளினும் தள்ளாமை நீர்த்து.

விளக்கம்:

ஒருவர் தம் உள்ளத்தல் தாம் அடைய வேண்டும் என்று நினைப்பவற்றையெல்லாம் உயர்வாக நினைக்க வேண்டும். அது நிறைவேறாமல் தற்காலிகமாய்த் தள்ளிப் போனாலும் கூட முயற்சி செய்து அதன் மூலம் அக்காரியம் நிறைவேறியதற்கு ஒப்பாகுமேயன்றி தப்பிப்போனதாகாது. எனவே ஊக்கத்தை எப்போதும் கைவிடாமல் உயர்வான குறிக்கோள்களை எண்ண எண்ண வாழ்வு உயரும்.

------------------

பால்: பொருட்பால்
இயல்: அரசியல்
அதிகாரம் 49. காலமறிதல்
குறள் எண்: 490

கொக்கொக்க கூம்பும் பருவத்து மற்றதன்
குத்தொக்க சீர்த்த விடத்து.

கொக்கு ஒக்க, கூம்பும் பருவத்து; மற்று அதன்
குத்து ஒக்க, சீர்த்த இடத்து.

விளக்கம்:

காலம் நேரம் பார்த்து அமைதியாகக் காத்துச் செயலாற்ற வேண்டிய காலத்தில் மடையருகில் கொக்கு போல கவனமாய்க் காரியமே கண்ணாக இருந்திடவேண்டும். செயலைச் செய்வதற்கு உரிய காலம் நேரம் வரும்போது, அக்கொக்கு மீனைக் குறிதவறாமல் குத்தி எடுப்பது போலத் தப்பாமல் விரைந்து செயலாற்ற வேண்டும்.

------------
பால்: பொருட்பால்
இயல்: குடியியல்
அதிகாரம்: 98. பெருமை
குறள் எண்: 973

மேலிருந்து மேலல்லார் மேலல்லர் கீழிருந்துங்
கீழல்லார் கீழல் லவர்.

மேல் இருந்தும் மேல் அல்லார் மேல் அல்லர்; கீழ் இருந்தும்
கீழ் அல்லார் கீழ் அல்லவர்.

விளக்கம்:

பதவியால், செல்வத்தால் - இன்னும் பல காரணங்களால் சிலர் வாழ்க்கையில் மேலான நிலையில் வீற்றிருப்பர். அவ்வாறு மேலான நிலையில் இருந்தாலும் கூட அவர்கள், 'இவர் பெரியவர்' என்று அனைவரும் மதிக்கத்தக்க மேல் நிலையை அடைய மாட்டார். குணம், பண்பில் தாழ்ந்தவர் மேலானவர் என்ற பெருமைவாய்ந்த நிலையை அடைய இயலாது.

மாறாக, மேன்மக்கள் சிலர் பதவி மற்றும் செல்வத்தால் கீழ்ப்பட்ட இடங்களில் இருக்க நேரிடலாம். அவ்வாறு தாழ்ந்த நிலையில் இருந்தாலும் கூட அவர்கள், 'இவர் சிறியவர்' என்று பலரும் இகழும்படியான நிலைக்குத் தள்ளப்பட மாட்டார். குணம், பண்பில் உயர்ந்தவர் கீழானவர் என்ற தாழ்நிலையை அடைய இயலாது.

குறளின் குரல் - 19

2011-01-24T10:08:00.000+03:00

பால்: பொருட்பால் இயல்: அமைச்சியல்
அதிகாரம்: 65. சொல்வன்மை
குறள் எண்: 643

கேட்டார்ப் பிணிக்கும் தகையவாய்க் கேளாரும்
வேட்ப மொழிவதாஞ் சொல்.

கேட்டார்ப் பிணிக்கும் தகை அவாய் கேளாரும்
வேட்ப மொழிவது ஆம் சொல்.

விளக்கம்:

தன் சொல்லை விரும்பிக் கேட்டவரைத் தன்வயப்படுத்தி வைக்கும் வகையிலும், தன் பேச்சைக் கேளாது இருந்தவரும் இவர் பேச்சைக் கேட்க வேண்டும் என்று விரும்பும்படியும் பேசப்படுவதே சிறந்த சொல்வன்மையாகும்.
----------------------

பால்: அறத்துப்பால்
இயல்: பாயிரவியல்
அதிகாரம்: 04. அறன் வலியுறுத்தல்
குறள் எண்: 38

வீழ்நாள் படாஅமை நன்றாற்றி னஃதொருவன்
வாழ்நாள் வழியடைக்குங் கல்.

வீழ் நாள் படாஅமை நன்று ஆற்றின், அஃது ஒருவன்
வாழ் நாள் வழி அடைக்கும் கல்.

விளக்கம்:

ஒருவன் நாள் தவறாமல் நல்லது செய்து வருவானாயின், அஃது அவனது வாழ்நாள் எனப்படும் வழியில் இடைவெளிகள் இல்லாது அடைக்கும் கல்லாகும். அது வாழும் நாட்களின் தொடர்ச்சியை / வாழ்க்கையைக் காக்கும் என்பது குறிப்பு. நல்லதைச் செய்யும் நாளெல்லாம் வாழும் நாளாகும்.

-------------------------

பால்: பொருட்பால்
இயல்: நட்பியல்
அதிகாரம்: 94. சூது
குறள் எண்: 940

இழத்தொறூஉங் காதலிக்குஞ் சூதேபோற் றுன்ப
முழத்தொறூஉங் காதற் றுயிர்.

இழத்தொறூஉம் காதலிக்கும் சூதே போல், துன்பம்
உழத்தொறூஉம் காதற்று உயிர்.

விளக்கம்:

ஆடும் போது பொருளை இழக்க நேர்ந்தாலும் சூது, இழந்ததை வென்றிட மீண்டும் மீண்டும் ஆடவேண்டுமென்று ஆசைப்படவைக்கும். அதே போல், இந்த உடம்பு மேன்மேலும் துன்பத்தால் உழன்று வருந்தினாலும், உயிரானது உடலையே மீண்டும் மீண்டும் காதலிக்கும்.

உயிர் / உடல் மேல் இருக்கும் ஆசையும், சூதின் மேல் இருக்கும் பற்றும் அவ்வளவு எளிதில் குறையாது.

--------------------------

பால்: பொருட்பால்
இயல்: அமைச்சியல்
அதிகாரம்: 70. மன்னரைச் சேர்ந்தொழுகல்
குறள் எண்: 700

பழைய மெனக்கருதிப் பண்பல்ல செய்யுங்
கெழுதகைமை கேடு தரும்.

பழையம் எனக் கருதிப் பண்பு அல்ல செய்யும்
கெழுதகைமை கேடு தரும்.

விளக்கம்:

அரசரிடம் தாம் நீண்ட நாட்கள் பழக்கமுடையவர் என்று எண்ணிக் கொண்டு, அந்த நட்பின் உரிமையால் தமக்குப் பொருந்தாத பண்பற்ற செயல்களைச் செய்வது துன்பம் மற்றும் அழிவைத் தரும்.

---------------

பால்: அறத்துப்பால்
இயல்: இல்லறவியல்
அதிகாரம்:17. அழுக்காறாமை
குறள் எண்: 163

அறனாக்கம் வேண்டாதா னென்பான் பிறனாக்கம்
பேணா தழுக்கறுப் பான்.

அறன் ஆக்கம், வேண்டாதான் என்பான் பிறன் ஆக்கம்
பேணாது அழுக்கறுப்பான்.

விளக்கம்:

பிறருக்கு வருகின்ற ஆக்கத்தைக் கண்டு அது அவருக்கு உரியதுதான் என்று கருதாமல் பொறாமைப்படுபவன், தனக்கு அறமாகிய ஆக்கம் வேண்டாம் என்பவனாவான்.

ஆக்கம்: செல்வம், பதவி, முன்னேற்றம் முதலிய ஆகி வரும் தகுதிகளையெல்லாம் குறிக்கும்.

-----------------

பால்: அறத்துப்பால்
இயல்: பாயிரவியல்
அதிகாரம்:01. கடவுள் வாழ்த்து
குறள் எண்: 05

இருள்சே ரிருவினையுஞ் சேரா விறைவன்
பொருள்சேர் புகழ்புரிந்தார் மாட்டு.

இருள்சேர் இருவினையும் சேரா இறைவன்
பொருள்சேர் புகழ் புரிந்தார்மாட்டு.

விளக்கம்:

நற்குணங்கள் அனைத்தும் கொண்ட இறைவன் அவனின் புகழே மெய்யான புகழாகும். அப்புகழுக்குரிய வகையில் நற்செயல்களைச் செய்பவர்க்கு, அப்புகழை எப்போதும் விரும்பிச் சொல்வார்க்கு அறியாமையோடு கூடிய நல்வினை தீவினை இரண்டும் சென்று சேரா.

வல்லவன் வில் - விமர்சிப்பது நல்லகண்ணன்

2011-01-04T19:10:00.001+03:00

'உஸ் அப்பாடா...' என்று வீட்டிற்குள் நுழைந்த நல்லகண்ணன் காலை ஓடி வந்து கட்டிக் கொண்டாள் கீர்த்தி. கீர்த்தி, நல்லகண்ணன் - உமா தம்பதியரின் செல்ல மகள்.

நல்லகண்ணன் ஒரு வார இதழின் சினிமா விமர்சகன். நடுநிலையான நல்ல விமர்சகர் என்று பரவலாகப் பலரும் பாராட்டும் புகழ் அவனுக்குண்டு. இது மேற்படி வருமானத்துக்கான பகுதி நேர வேலைதான். மற்றபடி தனியார் நிறுவனமொன்றில் சொற்பமான சம்பளத்துக்கு வேலை செய்து, தேதி இருபதைத் தாண்டுகையில் அடுத்த மாதம் எப்போது பிறக்கும் என்று நாட்காட்டியைப் பார்த்துக் குடும்பம் நடுத்துகின்ற கீழடுக்கு நடுத்தர வர்க்கம்.

'இந்தாங்க..' தண்ணீர் லோட்டாவைத் தந்தாள் உமா.

'என்னங்க...'வல்லவன் வில்' படத்துக்கு உங்கள் விமர்சனம் படிச்சாங்களாம் மல்லிகாக்கா...அவங்க மனசுல இருக்கிறதை அப்படியே சொல்லிருக்கீங்களாமே....புத்தகம் கொடுத்துட்டுப் போனாங்க....படிக்கணும். நல்லாருக்கா படம்? என்ன எழுதிருக்கீங்க'....என்றவள் குழந்தையைப் பார்த்துக் கொள்ள அவன் வந்துவிட்ட திருப்தியில் பக்கங்களைப் புரட்டிப் படிக்க ஆரம்பித்தாள். படத்தின் நாயகன் அவள் மனம் கவர்ந்தவர் ஆயிற்றே.

'என்னங்க...எல்லாரும் படம் நல்லாருக்குன்றாங்க. நீங்க இப்படி பாடாவதின்ற மாதிரி எழுதிருக்கீங்க....அதானே..மல்லிகாக்கா எப்படி இப்படிப் பாராட்டுனாங்கன்னு நான் அப்பவே நெனச்சேன். அவங்களும் உங்கள மாதிரிதான். எதையும் நல்லாருக்குன்னு அவ்வளவு சுலபமாச் சொல்லிர மனசு வராது.'

'காபி கொண்டு வா உமா'...'கீர்த்திக்குட்டி..அது மேல ஏறாத..விழுந்துறப் போற..'

'இந்த வாரம் இந்தப் படத்துக்குப் போலாம்னு நெனச்சேன்....நீங்க இப்படி எழுதிருக்கதைப் பாத்தாத் திரும்பியும் ஒரு வாட்டி பாப்பீங்களான்னு சந்தேகமாருக்குங்க...'

'...........'

'என்ன..பதிலே காணோம்...அவ்ள மோசமாவாருக்கு படம்?'

'யப்பா...உங்காளு நடிச்ச படம்னவுடன எவ்வளவு ஆர்வம் உமா உனக்கு?'

' ஆமாமா..கதநாயகியத்தான் மாஞ்சு மாஞ்சு வர்ணிச்சுருக்கீங்களே...'

அவளின் உதட்டுச் சுழிப்பை ரசித்தவன் சட்டப்பையிலிருந்து இரண்டு நுழைவுச்சீட்டுகளை எடுத்தான்.

'இந்தா... இந்த வாரம் வெள்ளிக்கிழமை அந்தப் படத்துக்குப் போறோம்...'

புருவத்தை நெறித்து அவனைப் பார்த்த உமா, தொடர்ந்து வந்த அவன் பேச்சைக் கேட்டு இன்னும் ஆச்சரியமானாள்.

'இயல்பா ஓடுற எதார்த்தமான படம். சந்தேகப் புத்தினால வர்ற கேடு, இப்ப சில டிவி சானல்கள் நடத்துற சில கேடுகெட்ட நிகழ்ச்சிகள், சில பணக்காரப் புத்திகள், கொஞ்சம் சோகம், கொஞ்சம் மிகை, கொஞ்சம் நகைச்சுவை, கொஞ்சம் அத்துமீறல்கள், கொஞ்சம் குழப்பம், தவிர்த்திருக்க வேண்டிய விஷயங்கள்.....இப்டில்லாம் நிகழ்ச்சிகள் தொட்டுக்காட்டி எழுதணும்னு ஆசைதான்.

ஆனா அதுக்கெல்லாம் எனக்குச் சுதந்திரம் இல்ல உமா.....எவ்வளவு மோசமா எழுதணுமோ அவ்வளவு மோசமா எழுதணும்...நேரடியா இல்லாம மறைமுகமா...படத்தை விட. படத்தின் இயக்குநரைவிட, மத்த விஷயங்களவிடப் படத்தின் நாயகனத் தாக்கணும்னு எனக்கு உத்தரவு....

ஆங்கிலப்படத்தின் அப்பட்ட காப்பி, தன் கேவலமான கருத்துகளை நாசூக்காய் வெளியிட்டு வேஷம் போடும் நாயகன்......அவர் சொந்த வாழ்க்கை பிரதிபலிப்பு, ஆத்திகம் / நாத்திகம் என்றெல்லாம் விமர்சனம் எழுதவேண்டிய தலையெழுத்து...

இப்ப 'தந்திரன்' படத்துக்கு என்ன எழுதுனேன்....ஆஹா..ஓஹோ...
ஆங்கிலப்படத்திற்கு நிகரான தமிழ்ப்படம்....நினைக்கவே முடியாத பட்ஜெட்டில் எடுத்த படம்.....மறந்தும் கூட நடிகரின் சொந்த வாழ்க்கைய விமர்சனத்தில் இழுக்கக்கூடாது...அதுவும் உத்தரவுதான்...என் எண்ணங்கள் சிலவற்றை மறைச்சு, நடுநிலை மறந்துதான் எழுதவேண்டிருக்கு.

என் சொந்த நினைப்பை நண்பர்கள்கிட்டக் கூடப் பகிர்ந்துக்க முடியாது....வெளிய தெரியாமருக்கணுமே...அலுத்துப்போச்சு உமா..

ஆங்கிலப்படச் சாயல் இருப்பதை ஒருபடத்தில் தூக்கி எழுதிவிட்டு, அடுத்த படத்தில் தாக்குவது...எனக்கே கொஞ்சம் அசிங்கமாத்தான் இருக்கு....என்ன பண்றது சொல்லு?

இதுல சம்பந்தப்பட்ட நாயகனின் ரசிகர்களிடமிருந்து மிரட்டல் கடிதங்கள் வேற போட்டுத் தாக்குது....

நடுநிலைமையோட விமர்சனம் எழுதுறது சொந்த விருப்பு வெறுப்பு இருக்குற ஒரு சாதாரண மனுஷனுக்கு ரொம்பச் சுலபமான காரியமில்ல. இருந்தும் இப்டில்லாம் பண்ண வேண்டிருக்கு.

நல்லவேள...சமுதாய விமர்சனம் பண்ற வேல எனக்கில்ல...அதுலயும் இப்படி எழுத வேண்டிய கட்டாயம் இருந்துச்சுன்னா....கஷ்டம்தான்..

வேற நல்ல வேலை பாத்துட்டு இருக்கேன். கெடச்சதும் சீக்கிரம் இந்த வேலைய விட்டுறலாம்னு இருக்கேன்.... '

குறிப்பு: இது யாரையும் எதற்காகவும் தாக்க எழுதப்பட்டதல்ல...பார்வைகள் நபருக்கு நபர் எப்படி வேறுபடுகின்றன, விமர்சனங்கள் எப்படி, எதனால் மாறுபடுகின்றன, விமர்சனம் செய்வது சுலபமான காரியமா, விமர்சகர்கள் மனநிலை எப்படியிருக்கும்என்று எண்ணிய விபரீத எண்ணத்தின் விளைவான கற்பனையே....